ወተሃደራዊ ቤት ጽሕፈት ኤርትራዊ ደሞክራስያዊ ኪዳን ኣብ መድረኻዊ ትልሚ ዕዮ ፖለቲካዊ ቤት ጽሕፈት ብምብጋስ፡ (ኩሉ ዓቕምታትና ንምቀልጣፍ ውድቀት ምልካዊ ስርዓት ህግደፍ ይቅናዕ!) ኣብ ትሕቲ ዝብል መሪሕ ጭርሖ ንምዑታት ተጋደልቲ ኣባል ውድባት ኤዲኪ ዘሳተፈ ዕዉት ሓባራዊ ወተሃደራዊ ሰሚናር ካብ ዕለት 25 ክሳብ 26 መጋቢት 2014 ኣብ ሓራ መሬት ኤርትራ ከባቢታት ክኒን ቂኒቶን ኣካይዱ።

እዚ ብደረጃ ኤዲኪ ዝተኻየደ ፈላሚ ወተሃደራዊ ሰሚናር እዚ፡ ውሁድ ወተሃደራዊ ዓቕምታትና ካብ ምድንፋዕ ሓሊፉ፡ ኣብ መንጎ ሰራዊት ናይ ተቓለሰቲ ውድባትና ንጹርን ስሙርን ናይ ቃልሲ ኣርኣእያ ብምህናጽ፡ ሕኑን ናይ ቃልሲ ሞራል ብምዕጣቕ፤ ምዉቕ ናይ ሓድነትን ሃገራውነትን ስምዒታት ብምዝራእ፤ ሓያል ናይ ሓርበኝነትን ጅግንነትን መንፈሳት ብምፍጣር፤ ሓባራዊ ጸላኢና ዲክታቶርያዊ ስርዓት ህግደፍ ንምውጋድ ዝበቅዕ ዝዓኾኸ ወተሃደራዊ ቅልጽም ንክጎናጽፍ ከምዝዓለመ ኣቦ መንበር ወተሃደራዊ ቤት ጽሕፈት ኤዲኪ ተጋ/ ዓብድላ ዑመር መሓመድ ኣብ ዝሃቦ መድረ ገሊጹ፡፡

ተጋ/ ዓብድላ ዑመር መሓመድ፡ ኤርትራዊ ደሞክራስያዊ ኪዳን፡ ቅድም ክብል ሓባራዊ ወተሃደራዊ ሽማግለ ብምፍጣር፡ ማእከላይ ወተሃደራዊ ቤት ጽሕፈት ብምጥያስ፡ ኣብ ወተሃደራዊ መዳይ፡ ብሓደን ዝተነጸረን ወተሃደራዊ ስትራተጂ፡ ወተሃደራዊ ዓቕምታቱ ኣወሃሂዱ ኣንጻር ሓባራዊ ጸላኢ ሓቢሩ ክሰርሕ ዘለዎ ቅሩብነትን ተበግሶን ብግብሪ ከምዘመስከረ ገሊጹ፡፡ ኤርትራዊ ደሞክራስያዊ ኪዳን ህጹጽነትን ኣድላይነትን ምጥርናፍ ተቓለስቲ ሓይልታት ኤርትራ ኣብ ጸብጻብ ብምእታው፡ ኩሎም ተቓለስቲ ሓይልታት ኤርትራ ኣብ ዙርያ ሓደን ዝሰፍሐን መቃለሲ ግንባር ተጠርኒፎም፡ ነዚ ኣብ ገምገም ውድቀት ተሳጢሑ ዘሎ ኣዕናዊ ምልካዊ ስርዓት ዘቃብጽ ውሁድ ሓባራዊ ቅልጽም ንምፍጣር ናይ ገዛእ ርእሱ ተብግሶታት ክወስድ ምጽንሑ ዝፍለጥ እዩ፡፡ ከም ውጽኢት ናይዚ ኤርትራዊ ደሞክራስያዊ ኪዳን ዓቕምታት ደምበ-ተቓውሞ ንምጥርናፍ ከካይዶ ዝጸንሔ ጻዕርታት ድማ፡ ንዝተረፉ ካልኦት ተቓለስቲ ሓይልታትን ሲቪክ ማሕበራትን ካልኦት ሕብረተ-ሰባዊ ክፍልታትን ዝሓቁፍ፡ ኤርትራዊ ሃገራዊ ባይቶ ንደሞክራስያዊ ለውጢ ኣብ ምምስራት ግንባርና ኢዲኪ ናቱ ልሉይ ተራ ተጻዊቱ እዩ፡፡

ከም’ውን ኤርትራዊ ደሞክራስያዊ ኪዳን፡ ከም ኣካል ናይቲ ዓቕምታት ደምበ-ተቓውሞ ንምጥርናፍን ንምዕኳኹን ከካይዶ ዝጸንሔ ጻዕርታት፡ ኣብ ወተሃደራዊ መዳይ እውን፡ ኩሎም ወተሃደራዊ ክንፍታት ዘለዎም ውድባት፡ ብውሁድ ወተሃደራዊ ቅልጽም ኣንጻር ሓባራዊ ጸላኢ ንምግጣም ዘብቅዖም ሓባራዊ ወተሃደራዊ ስትራትጂ ብምንዳፍ፡ ውተሃደራዊ ክንፍታቶም ብምውህሃድ ኣብ ልዕሊ ጸላኢ ኣገዳሲ ወተሃደራዊ ፍጻሜታት ንምጭባጥ ክሰርሑ ልዑል ጻዕርታት ከካይድ ከምዝጽንሐ ተጋ/ ዓብድላ ዑመር መሓመድ ሓቢሩ፡፡

ኣብ መወዳእታ ተጋ/ ዓብድላ ዑመር መሓመድ እዚ ንፈለማ እዋን ዝካየድ ዘሎ፡ ድልዱልን ዝተወሃሃደን ወተሃደራዊ ቅልጽም ኣብ ምህናጽ ወሳኒ ግደ ዝጻውት፡ ሓባራዊ ወተሃደራዊ ሰሚናር እዚ ኣብ ምውዳብ፡ ዓቕምታቶም ከይበቐቑ ንዝተረባረቡ ኣባላትን ደገፍትን ኤርትራዊ ደሞክራስያዊ ኪዳን ልዑል ምስጋናኡ ኣመሓላሊፉ፡፡ ብስም ኤርትራዊ ደሞክራስያዊ ኪዳን ነዚ ኣገዳሲ ወተሃደራዊ ሰሚናር እዚ ንኸዕውት ኩለንትናዊ ደገፎም ዘበርክቱ ማሓዙት ልዑል ምስጋናኡ ኣቕርቡ፡፡

እቶም ተጋደልቲ ተሳትፍቲ እቲ ስሚናር ብወገኖም ሕድሕድ ወተሃደራዊ ፍልጠትን ተሞኩሮን ኣብ ምልውዋጥን ሃገራዊ ሞራላዊ መንፍሳት ኣብ ምዕዛዝን ሓድነቶም ኣብ ምድላዳልን ጠቃሚ ከምዘንበረ ኣርጋጊጾም። ኣብ መጻኢ ኩሉም ወተሃደራዊ ክንፊታት ውድባት ተቓውሞ ዝሳትፍዎ ተመሳሳሊ ሰፊሕ ሓበራዊ ወተሃደራዊ ስሚናር ክካይድ ተላቢዎም። ዓይነታዊ ወተሃደራዊ ስርሒታት ኣንጻር ምልካዊ ስርዓት ህግደፍ ብምፍጻም፡ ውድቀቱ ንምቅልጣፍን ስቃይ ህዝብና ሓንሳብን ንሓዋሩን ንምውጋድን ደሞክራያዊ ምሕድራ ንምትካልን ኩሉ ካብኦም ዝድለ መስዋእቲ ክኽፍሉ ድልዋት ምዃኖም ኣረጋጊጾም።

ኣብ መዛዝሚ ጽንበል ሓባራዊ ወተሃደራዊ ሰሚናር፡ ብዝኽሪ ስውኣት ብሓፍሻ፡ ብፍላይ ድማ ንዝኽሪ ስውእ ተጋ፡ እሕምድ መሓመድ ናሰርን ስውእ ተጋ፡ ገ.መድህን መሓሪን ተጅሚሩ። ኣብ’ቲ ጽንበል ዝተሳትፈ ህዝቢ ክኒን ቂኒቶን ምልካዊ ስርዓት ህግደፍ ንምምካትን ሰላምን ደሞክራስን ፍትሕን ዝስፈና ኤርትራ ንምህናጽን ኣብ ጎኑ ኩሉም ኤርትራዊ ሓይልታት ደሞክራስያዊ ለውጢ ብሓፍሽ፡ ኤርትራዊ ዲሞክራያዊ ኪዳን ብፍላይ ጠጠው ክምዝብሉ ገሊጾም።

ሰሚናር ዓወት ድሕሪ ምዝዛሙ ብ26 መጋቢት 2014 ኣብ ቅድመ ግንባር ብርክት ዝበሉ ኣባላት ሰራዊትን ናይቲ ከባቢ ህዝብን ኣባላት ሰሚናር ዝኾኑ ወታሃደራውያን ሓለፍትን ጠርነፍትን ኣ/መንበር ማ/መሪሕነት ተጋዳላይ ሑሴን ከሊፋ ዝተሳትፍዎ ጽንብል ብድሙቅ ተዛዚሙ።

ቤት ጽሕፈት ዜና

ኤረተራዊ ደሞክራስያዊ ኪዳን

26 መጋቢት 2014