ኤርትራ ብመስፈሪ ኢብራሂም ሞኣ 2015፡ ኣብ ምምሕዳር ምስ’ተን ሓሙሽተ ታሕተዎት ሃገራት ኣፍሪቃ ከምእተሰርዐት ኣጃንስ ፍራንስ ፕረስ(AFP) ሓቢሩ፡፡ በቲ ንሃገራት ኣብ ሰብኣዊ ምዕባለ፡ ሰብኣዊ መሰል፡ ቀጻሊ ቁጠባዊ ዕድል፡ ድሕነትን ግዝኣተ ሕግን መሰረት ብምግባር  ብሚእታዊት ዝተኻየድ ኣርባዕተ መምዘኒ፡ ኤርትራ 29.9%  ብምምዝጋብ ነተን ብኵናት ሓድሕድ ዝተጠቕዓ ሃገራት ኣኸቲላ ድሕሪት ሰፊራ፡፡ ሱዳን 28.3%፡ ማእከላይ ረፐብሊክ ኣፍሪቃ 24.9%፡ ደቡብ ሱዳንን19.9% ሶማልያን 8.5% ኣመዝጊበን፡፡

እተን ንኡድ ምዕባለ ዝተመዝገበለን ቀዳሞት ሓሙሽተ ሃገራት ድማ ሞሪሽየስ 79.9% ኬፕ ቨርደ 74.5%፡ ቦትስዋና 74.2%፡ ደቡብ ኣፍሪቃ 73.0%፡ ናሚብያ 70.4% ኢየን፡፡ 21 ካብ’ተን ዝለዓለ ሸቶ ከምዘመዝገባ ዝተጠቕሳ 54 ሃገራት ኣፍሪቃ ፡ ኣብ’ዚ ዝሓለፈ ኣርባዕተ ዓመት ምዕባለአን ደስኪሉ፡ ወይ ድሕሪት ተመሊሱ ብምባል እቲ መምዘኒ ይጠቅስ፡፡ኣብ ዝሓለፈ 15 ዓመት መነባብሮ ኣፍሪቃውያን ኣብ መዳያት ጥዕናን ዲሞክራስን ምምሕያሽ ከምዘርኣያ ተገሊጹ፡፡

እተን ዱልዱል ትካላት፡ ውሑድ ብልሽውና ዘለወንን ምርጫ ዘካይዳን ኣብ ማሕበራውን ቁጠባውን ዕውታት ከምዝኾናኢብራሂም ሞኣ ጠቒሱ፡፡ ናብ ኩሉ ዝባጻሕን ቀጻሊ ምምሕያሽ ኣብ ኩሉ መዳያትን ጠለብ ኣፍሪቃውያን ከምዝኾነ ብምምልካት ድማ ኣብ ሃገራት ኣፍሪቃ ዝርአ ዘሎ ኣንፈት መጠንቀቕታ ደወል ከም ዝኾነ ኣዘኻኪሩ ፡፡

ሃገራት ኣፍሪቃ ምዕባለአን ንከመሓይሻ ንምትብባዕ ኢብራሂም ሞኣ ነዚ መስፈሪ ብ2006ዓ.ም ከም ዝጀመሮ ይፍለጥ፡፡ ሱዳናዊ ቢልየነር ትካል ተለፎን ኢብራሂም ሞኣ፡ ብዘይካ’ዚ ስልጣኖም ብወለንታኦም ንዝገድፉ ብዲሞክራስያዊ ኣገባብ እተመርጹን ድንቂ ብቕዓት ኣመራርሓ ንዘመስከሩን መራሕቲ ሃገራት ትሕተ ሰሃራ፡ ኣብ 10 ዓመት ዝወሃብ ሓሙሽተ ሚልዮን ዶላርን፡  ክሳብ ብሂወት ዘለው ዝኽፈል 200,000 ዶላር በብዓመቱ ከም መተባብዒ ከም ዝህብ ጸብጻባት የመልክቱ፡፡ ዛጊት ድማ ኣብ 2007 ናይ መጀመርያ ጸሊም መራሒ ደቡብ ኣፍሪቃ ፕረዚደንት ማንደላ፡ፕረዚደንት ጅዋኪን ቺሳኖ ናይ ሞዛምቢክ፡ኣብ 2008 ፕረዚደንት ቦትስዋና ኮትባንየ ሞገ፡ ኣብ 2013 ፕረዚደንት ኬፕ ቨርደ ሮድሪገዝ ፒረዝ፡ ኣብ 2014 ፕረዚደንት ናሚብያ  ፖሃምባ ነቲ ሽልማት በቒዖም፡፡