ኤርትራ፡ ድሕሪ 50 ዓመት

ዝኸበርኩም ኣሕዋትን ኣሓትን፡ ኣነን ከምዚ ናተይን ደረጃ ዕድመ ዘለኹምን፡ ድሕሪ 50 ዓመት ኣብ ገጽ መሬት የለናን፡ ሓመድ ኣዳም በሊዑና’ሎ። ዕድለኛታት እንተኾይናን ስደት እንተኣብቂዑን ድማ ናይ መወዳእታ ግብኣተ መሬትና፡ ኣብታ ወለድናን ኣባሓጎታትናን ዝተቀብሩላ ቦታ በብእምነትና፡ ስነ-ስርዓት ቀብርና ክፍጸመልና ንምነ። እዚ ሕጂ ኣብ ልዕሊ ህዝብናን ሃብትናን ዘሽካዕልል ዘሎ ውልቀ መላኺ ስርዓት ኢሳያስን ስዓብቱን’ውን ብዕድመ ድሕሪ 50 ዓመት ብህይወት ኣይክህልዉን’ዮም። ማንታ ወይ ቅዳሕ ናቶም ተኪኦም ስልጣኖም እንተቀጺሉ ግን፡ ሬሳና ጥራይ ዘይኮነ ሓመድ ዓድና ዝስእን፡ ደቅና-ደቂ ደቅና’ውን፡ “ሃገር ኣላትና ወይ ስድራቤት ኣለዉና” ኢሎም ንኤርትራ ኣይክመጹን’ዮም፡ ብብዘለውዎ ከም ደቂ ዛግራ ክጠፍኡ’ዮም። ብሰንኪ ስርዓት ህግደፍን ናትና ስንፍናን፡ ደቅናን ደቂ ደቅናን ምስ ሃገሮም፡ ታሪኾምን መበቆሎምን ዝተኣሳስሮም ንሕና ብህይወትና እንከሎና ዕድላት እንተዘይረኺቦም፡ ኤርትራ ትብሃል ሃገር ኣበይ ከምትርከብን መበቆሎም ንምፍላጥን፡ ኣብ ጉጉል(Google) ሃሰስ ክብሉ’ዮም። እዚ ንዓና፡ ንህሉዋት ኤርትራውያን ዓቢ ሕፍረትን ክሳራን’ዩ። እቲ፡ “ኢትዮጵያ ኣፍደገ ባሕሪ ስለዘድልያ ንወደብ ዓሰብ ክትብል ክትጎብጠና’ያ፡ ኣብ ከባቢናን ዞባናን ዘሎ ሃይማኖት ምስልምናን ሕሉፍነትን ንኤርትራ ዓቢ ስግኣት’ዩ፡ ኤርትራ ንእሽቶ ሃገር’ያ” ዝብልን ካልእን ስክፍታ ከምዘሎ ፍሉጥ’ዩ። እቲ ወሳኒ ግን ብምስልምና ወይ ብክርስትና፡ ብሓያላት ወይ ብድኹማት ሃገራት ምኽባብናን ምንኣስናን ዘይኮነ፡ ንሕና ከም ሓደ ህዝቢ፡ ከም ኤርትራውያን ብሓደ ድምጺ ንውሽጣውን ግዳማውን ብድሆታት፡ ባህርያውን ሰብ ዝሰርሖን ተጻብኦታት መኪትና ብኸመይ ክብረትናን ሰላምናን ዓቂብና ንነብር’ዩ። ንሕና ኤርትራውያን፡ ዘመድናን እምነትናን ኤርትራን ህዝቢ ኤርትራን እምበር፡ ምስ ምዕራብ ምስ ምብራቅ ወይ ምስ ኤውሮጳ፡ ኣመሪካ፡ ኤስያ ተሓናጊርና ኣብዛ ዓለም ክንቅጽል ክንሓስብ የብልናን። ምኽንያቱ ክንህሉ ወይ ክንጠፍእ፡ ናትና ሓድነት፡ ሓያል ስራሕን ጠባይ ዓለም ፈሊጥና ብኸመይ ተቃዲና ንምንባር ምብልሓትን’ዩ ዝውስኖ።

ስርዓት ህግደፍ፡ ንጸሊም ጻዕዳ ኢሉ ናይ ምእማን ተኽእሎ ስለዘለዎን ካብ ዝፍጠር ደምን ስጋን ንጹሃት ኤርትራውያን እናሰተየን እናበልዐን ስለዝመጸን፡ ቀዳማይ ጸላኢ ህዝቢ ኤርትራ’ዩ። ኣብ ዝሓለፉ 10 ዓመታት ጥራይ፡ ናብ ጎረባብቲ ሃገራት ኢትዮጵያን ሱዳንን ከምኡ’ውን ብባሕርን መሬትን ኣቢሎም ናብ ክፍለ ዓለማት ኣፍሪቃ፡ ኤውሮጳ፡ ሰሜን ኣመሪካን ካልኦት ከባቢታት ዓለምን ዝተሰዱ ኤርትራውያን፡ ኣብ ባሕሪ ዝጠሓሉ፡ ኣብ ምድረበዳ ዝተረፉ፡ ብነጋዶ ሰብ ዝተጨውዩ፡ ኣብ ኣብያተ ማእሰርቲ ዝተዳጎኑ፡ ረዳኢ ስኢኖም ብጭንቀት ኣእምሮኦም ዝሰሓቱ፡ ክብረ ንጽህነአን ዝተደፍራ ወይ ጥንስን ሕርስን ዘጋጠመን ኣሕዋትና፡ ብድኽነትን ስእነትን ግዳም ሓደር ዝኾኑ ኤርትራውያን ማእለያ የብሎምን። ታሪኾም ንኽትሰምዖ’ውን ዘዘግንን’ዩ። እዚ ሕጂ ኣብ ኤርትራ ዘሎ ስቃይን ኣደራዕን ተፈቲሑ፡ ሃገርና ቅሳነትን ተስፋን ከይሰፈናን ዝተበታተነ ስድራቤታት ዳግም ከይተሓቋቆፈን ምስ ከቢድ ጓሂና ፈጣሪ እንተወሲዱና ግን፡ ብዘይ ሩፍታ ንመዋእል እንተ ኣብ ገነት እንተ ኣብ ሲኦል ክንቅመጥ ኢና። እቶም ኣቀዲሞም ጽቡቅ ኤርትራ እናበሃጉ እንተኾነ ኩሉ ከይርኣዩ ዝተሰውኡ፡ “ወረ ዓዲ እንታይ ኣሎ” ኢሎም ምስዝሓቱና ድማ፡ ብስክፍታ፡ “ኤርትራ ከምታ ዝገደፍኩማ፡ ሞት፡ ማእሰርቲ፡ ጥሜት፡ ግህሰትን ስደትን ወሪርዋ’ሎ” ኢልና ክንምልሰሎም ኢና። እቶም ስውኣት ድማ ዳግማይ ሓዘን ክድበሱ’ዮም። እቲ ዝኸበደ ሓዘን’ና ግን፡ ናይ ጽባሕ ኣዕናዊ ሓድጊ ህግደፍ እምበር ናይ ዝሓለፈን ህሉዉን ኣይኮነን።

ስርዓት ህግደፍ፡ ቁንቁነን ቁርዲድን ህዝቢ ኤርትራ ስለዝኾነ፡ ንሱ ክሳብ ዘሎ መጻኢና ካብዚ ሕጂ ዘሎ  ኩነታት ዝኸፍአ እምበር ዘሐጉስ ከምዘይከውን ርዱእ’ዩ። እንተ’ቶም ኣብዚ እዋን’ዚ ኣብ ሕቁፊ ወለዶም ዘለዉ ህጻናት፡ ንዓለም ማንካ ዝየልዓሉላ ወርጠበታት፡ ጎራዙትን ኣባጽሕን ኤርትራ፡ ድሕሪ 50 ዓመት እንታይ ዕድል’ዩ ዘለዎም ንምትንባይ የጸግም’ዩ። የግዳስ እንተ ጽቡቅ እንተ ሕማቅ፡ እንተ ኣብ መሬቶም እንተ ኣብ ዓዲ ጓና፡ ክልተ ምርጫ’ዩ ዝጽበዮም ዘሎ። እዚ ጉዳይ’ዚ፡ ነቶም ብህይወት ዘሎና ኩልና ኤርትራውያን ብፍላይ ድማ ተቃወምቲ ወይ ደገፍቲ መንግስቲ ተበሃሂልና ብዝተፈላለየ ደረጃ ንዋሳእ ዘሎና ዜጋታት፡ ልዕሊ’ቲ ንዓና ኣብዚ እዋንዚ ዘጋጥመና ዘሎ ኩሉ ዓይነት ኩፉእ ገጻት ህይወት፡ ነቶም ህሉዋት ህጻናትን ጽባሕ ዝውለዱን ክንሓልየሎም ይግባእ። ኣብ ክንዲ ቤትና ሰተ ሰምሃልን ሽላንን ንሽልሞ፡ እሾኽ መርገም ዘሪእናሉ እንተሓለፍና ዘይወጽእ ጣዕሳ’ዩ። እዚ ንሕና ሎሚ ንሓልፎ ዘሎና መስገደል፡ ኣብ መጻኢ ወለዶና ክድገም የብሉን። ከምቶም ዝሓለፉ ኣቦታትናን ኣቦሓጎታትናን ኣብ መጽሓፍ ቅዱስን ቁርኣንን ምሒሎም ንውሽጣዊ ፍልልያቶም ዓቂቦም ንተንኮላት ገዛእቲ ዝመከትዎን፡ እዛ ሎሚ ዘላ ኤርትራ ካብ ገጽ ዓለም ንኸይትሕከኽ ዝተወፈዩላን፡ ንሕና’ውን ኣሰር ቀዳሞት ንስዓብ ንደቅና ድማ ሰላምን ፍቅርን ዝዓሰላ ዘይትቁርመም ሕፍርቲ ኤርትራ ነረክቦም።

ጽላል፡ ካብ ሕቡራት መንግስታት ኣመሪካ (14 ጥሪ 2017)