ካብ በርሚንግሃም፡ ማንቸስተር፡ ሊድስ ዝኣመሰላ ዝተፈላለያ ከተማታት ዓዲ እንግሊዝ ናብ ለንደን ብውቶቡሳት ንሓያለ ሰዓታት ዝወሓዙ ኣማኢት ኤርትራውያን ደለይቲ ዲሞክራስያዊ ለውጢ ድሕሪ ስርሒት ፎርቶ 21 ጥሪ ንሳልሳይ ግዜ፡ ኣብ ፊት ኤምባሲ ስርዓት ህግደፍ ዕዉት ሰላማዊ ሰልፊ ኣካይዶም።

እቶም ኣዝዩ ቆራሪ ዝነበረ ኩነታት ኣየር ከይዓጀቦም ኣብቲ ንስርሒት ፎርቶ 2013 ደገፎም ንምግላጽ ዝተረኽቡ ግዱሳት ኤርትራውያን ተቓለስቲ ዝበዝሑ መንእሰያት ኮይኖም፡ ሓያለ ቆልዑን ሽማግለታትን ኣዴታትን ‘ውን ይርከቡዎም።

ንሳቶም ኣብቲ ሰላማዊ ሰልፊ፡ ድሕነት ኤርትራን ህዝባን ክረጋገጽ እንተኾይኑ፡ ምልካዊ ስርዓት ኢሳይያስ ብህጹጽ ካብ ስልጣን ወሪዱ መሰረታዊ ዲሞክራስያዊ ለውጢ ክረጋገጽ ዝጠልብ፡ ልዑል ሃገራዊ ስምዒት ዘንጸባርቕ ጭርሖታት እናቃልሑ እዮም ነቲ ሰላማዊ ሰልፊ ኣካይዶሞ።

ቀቅድሚ’ቲ ሰላማዊ ሰልፊ፡ ብለይቲ፡ ኣብ ማዕጾን መናድቕን ኤምባሲ ስርዓት ህግደፍ፡ ንጅግንነት ‘ቶም ኣብ ፎርቶ ናይ ለውጢ ምንቅስቓስ ዘካየዱ ምዑታት ሓይልታት ምክልኻል ኤርትራ ዝምጉስ፡ ስእሊ ናይታ ፎርቶ ዝደየበት ታንክ ደልይቲ ለውጢ ዘላቶ፡ ከምኡ ‘ውን ዲክታተር ኢሳይያስ ብህጹጽ ክወርድ ዝጽውዕ ዝተፈላለየ ጭርሖታት ተጠቂዑ ከምዝሓደረ ‘ውን ተፈሊጡ።

በቲ ዝተኻየደ ምንቅስቓስ ኤርትራውያን ደለይቲ ለውጥን እቲ ተኸታታሊ ሰላማዊ ስልፍን ዝተዳህሉን ሸቐልቀል ዝኣተዎምን ኣምባሳደር ህግደፍን መጋበርያታት ህግደፍን ናብ ፖሊስ ብዘቕረቡዎ ጥርዓን መሰረት ከኣ፡ ኣብ ሰላማዊ ሰልፊ ኤርትራውያን ዓቐኑ ተራእዩ ዘይፈልጥ ብዝሒ ፖሊስ ዓዲ እንግሊዝ ናብቲ ሰላማዊ ሰልፊ ኣብ ርእሲ ምልኣኹ፡ ርሕቀት ሰልፈኛታት ካብቲ ኤምባሲ ስርዓት ህግደፍ ካብ ንቡር ከምዝምሕድግ ተገይሩ።

ደድሕሪ ‘ቲ ዕዉት ሰላማዊ ሰልፊ፡ ሰልፈኛታት ኣብ ሓደ ኣዳራሽ ናይቲ ዘካየዱዎ ተኸታታሊ ሰለማዊ ሰልፍታት ሰፊሕ ገምጋም ገይሮም፡ ናህሪ ናይቲ ምንቅስቓስ ንለውጢ ዝሕይለሉ መንገድታት ተመያይጦም።

ኤርትራውያን ደለይቲ ለውጢ ዓዲ እንግሊዝ፡ ድሕሪ’ቲ ኣብ ፎርቶ ብ21 ዝተኻየደ ስርሒት፡ ኣብ ውሽጢ ወርሒ ንሰለስተ ግዜ ብተኸታታሊ ዘካየዱዎ ሰልፍታት፡ እንተላይ’ቲ ኣብ ውሽጢ ኤምባሲ ምልካዊ ስርዓት ኢሳይያስ ዝገበሩዎ ዕዉት ፍጻሜታት፡  ኣብነታዊ ምንባሩ ብምግምጋም፡ ብዝሓየለ መልክዕን ናህርን ክቕጽል ተወሳኺ ጻዕሪ ክገብሩ ተሰማሚዖም።

ኣብ መወዳእታ፡ እቶም ካብ ርሑቕ ቦታታት ናብ ለንደን ዝመጽኡ ሰልፈኛታት ናይ ድራር እንግዶት ተገይሩሎም።