ኣብ ለንደን ዝርከቡ ኤርትራውያን ደለይቲ ለውጢ፡ ቀዝሒ በረድ ተጻዊሮም፡ ብምስጢራዊ ዕድመ ናይቲ ስርዓት ከይተደናገሩ፡ ብህጹጽ ተወዳዲቦም፡ ዕሱባት ሓለፍቲ ውልካዊ ስርዓት ህግደፍ፡ ሓላፊ ፖለቲካዊ ጉዳያት የማነ ገብረኣብ (ማንኪ) ከምኡ ‘ውን ሚኒስተር ጉዳያት ወጻኢ ህግደፍ ዑስማን ሳልሕ ብሰላሕ መላሕ ሎሚ 5 ለካቲት ኣብ ለንደን ንዘካየዱዎ ናይ ኮራኹሮም ኣኼባ ብምቅዋም ዕዉት ሰላማዊ ሰልፊ ኣካይዶም።

እቶም ምዑታት ሰልፈኛታት ኣብቲ ሰላማዊ ስለፊ፡ ዲክታተርያዊ፡ ግብረሽበራዊ፡ ቀታሊ ስርዓት ህግደፍ ካብ ስልጣን ይወገድ፡ ድሕሪ ቐዛፊ ኢሳያስ ተቐዛፊ፡ ምልኪ ይፍረስ ፍትሒ ይንገስ፡ ሰብኣዊ መሰላት ይከበር፡ ዝብሉ ዝርከቡዎም፡ ነቲ ንኤርትራ ሃገርና ዘዕኑ፡ ንህዝብና ዝበታትን ዘሎ እኩይ ዲክታተርያዊ  ስርዓት ህግደፍ ዝኹንን፡ ኣብ ዝኾነ እዋን ኣብ ጎኒ ውጹዕ ህዝቦም ከምዘለዉ ዘረጋግጽ ክብ ዝበለ ሞራላዊ ድምጺ ኣስሚዖም። ኣቓልቦ በቲ ኣውራ ጎደና ዝተሓላለፉ ዝነበሩ ሓያለ እንግሊዛውያን ‘ውን ስሒቦም።

እቶም ብጸቢብ ረብሓታት ተገዚኦም ኣብቲ ኣኼባ ንምስታፍ ዝጠራቐሙ ዝነበሩ ዕሱባት ደገፍቲ ናይቲ ዲክታተርያዊ ስርዓት፡ ነቲ ሕልናዊ መልእኽታት ክጻወሩዎ ስለዘይከኣሉ ደኒኖም ናብቲ ኣዳራሽ ኣኼባ ክኣትዉ ከለዉ፡ ኣብ ኮፍ መበሊኦም ከለዉ ንኮራኹሮም ዝፈጠረሎም ናይ መንፈስ ረበሻ ንምድዕዓስ ምሩጻት መሓዮታቶም ነቲ ሰላማዊ ሰልፊ ክዝርጉ ዘካየዱዎ ፈተነ ፈሺሉ።

እቶም ርእሰ ምትእምማን ዘይብሎም ህግደፋውያን፡ ኣብ ውሽጢ’ቲ ኣኼባ ንዝኣተዉ ኤርትራውያን ተቓወምቲ ኢኹም ብዝብል ጥርጣሬ ለልዮም ብሓገዝ ፖሊስ ኳ እንተውጽኡዎም፡ በቲ ቆሎጥጡቖ ዝበዝሖ ትሕዝቶ ናይቲ ኣኼባ፡ ‘እቶም እንታይ ኮን ክብሉ እዮም’ ኢሎም ዝኣተዉ ኤርትራውያን ከይተረፈ ምስ ህግደፍ ብዘጥፍኡዎ ግዜ ከምዝጓሃዩን፡ ብቐልቢ ኣልቦነት ኮራኹር ስርዓት ህግደፍ ‘ቶባእ’ ከምዝበሉን ገሊጾም።

ኣብዚ ሃገርና ኤርትራ ብሰንኪ ስርዓት ህግደፍ ካብ ዓለም ተነጺላን ተኣጊዳን፡ መንእሰያትና ድማ ኣብ ሲናይ ኣደዳ ሞትን መሸጣ ህዋሳትን ኮይኖም ዘለውሉ ግዜ፡ ደገፍቲ ህግደፍ፡ ኣብቲ ኣኼባ ዘቕረቡዎ ብዛዕባ መሸይጣ ሲሚንቶ ኣብ ኤርትራ፡ እንግሊዝ ኣብ ኣርብዓታት ካብ ኤርትራ ሰሪቓቶ ብዛዕባ ዝበሉዎ ንብረት ንምኽሳሳ እንታይ ክግበር ከምዝከኣልን፡ ዝብሉ ዝርከቡዎም መትሓዚ ዘይብሎም ኣርእስታት ከምዘልዓሉ፡ ብኣብነት ጠቒሶም።

እቲ ኣብ ጎደናታት ነውዮርክ ብመንእሰያት ንለውጢ ተሃዲኑ ዝተዋረደ የማነ ማንኪ፡ ኣብ ለንደን ‘ውን ተመሳሳሊ ውርደት ከየጋጥሞ፡ መንነቱ ሓቢኡ፡ እቲ ኣኼባ ብምስጢር ከምዝዕደም ኳ እንተገበረ፡ ኤርትራውያን ደለይቲ ለውጢ ኣብ ለንደን ግን፡ ተዓጻጺፎም ኣብ ሓጺር ሰዓታት ብዘወሃሃዱዎ ሰልፊ፡ መቓልሕ ኣውያት ውጹዕ ህዝቢ ኤርትራን ድሌቱን ንዲሞክራስያዊ ለውጢን ኣብጺሖም።

ልኡኻት ስርዓት ህግደፍ የማነን ዑስማንን፡ ናብ ለንደን ዝመጽኡሉ ቀንዲ ምኽንያት፡ ኣብቲ ብመንግስቲ እንግሊዝ ተወዲቡ ኣብ ኣጋ መወዳኣታ ናይዚ ወርሒ’ዚ ኣብ ለንደን ዝካየድ፡ ጉዳይ ሶማል ንምፍታሕ ዝጋባእ ኣስታት 40 ሃገራት ዝሳተፋኦ ኣህጉራዊ ዋዕላ፡ ስለዘይተዓደሙ እንጽርጽሮቶም ንምግላጽ ምዃኑ ተፈሊጡ ኣሎ።