ኣህጉራዊ ውድድራት ንምክያድ ናብ ወጻኢ ዝገሹ ኤርትራውያን ተጻወቲ ኩዕሶ ብተደጋጋሚ ራሕሪሖሞ ብምኻዶም ዝሰክሐ ስርዓት ህግደፍ ኣብ ስዑዲ ዓረብ ዝነብሩ 7 ኤርትራውያን ስደተኛታት ተጻወቲ ኩዕሶ መሪጹ ኣብ ኣስመራ የለማምዶም ከምዘሎ ምንጭታት ሓቢሮም።

ብመሰረት እቲ ሓበሬታ እቶም ኣብ ኣስመራ ዝዕለሙ ዘለዉ ተጻወቲ 4 ካብ ርያድ፡ 3 ድማ ካብ ጅዳ ዝመጹ እዮም።

ስርዓት ህግደፍ፡ ነቲ ቅድሚ ሕጂ ዘጋጠሞ ጃምላዊ ምርሕራሕ ንምጕዳል ኢሉ ነዞም ድሮ ኣብ ስደት ዝነብሩ መንእሰያት ስፖርተኛታት ናይ ምምራጽ ሜላ ከምዝመሃዘ እቶም ምንጭታት የረድኡ።

ኣብ ዝሓለፈ ዓመታት ሃገራዊት ጋንታ ኤርትራ ብምሉኣ ኣብ ኬንያ፡ ዳርጋ ብምሉኦም ኣባላት ክለብ ቀይሕ ባሕሪ ‘ውን ኣብ ታንዛንያ፡ ነቲ ውልቀምልካዊ ስርዓት ነጺጎም ብጅምላ ኢዶም ሂቦም እዮም። ኣብ ዝተፈላለዩ ዓውድታት ስፖርት ዝነጥፉ ሓያለ ክልኦት መንእሰያት ‘ውን ናብ ዝተፈላለያ ሃገራት ዓለም ምስ ገሹ ኣይተመልሱን።

እዚ ከምዚ ዝኣመሰለ ጃምላዊ ስደት ስፖርተኛታት ኤርትራውያን፡ ብዓቐኑ ኣብ እዋን መግዛእቲ ‘ውን ኣይተራእየን። እዚ ድማ፡ ንዕምቆትን ሕሰምን ናይቲ ብሰንኪ ውልቀምልካዊ ስርዓት ህግደፍ ኣብ ኤርትራ ኣጋጢሙ ዘሎ ፖለቲካውን ቁጠባውን ቅልውላው ዝምስክር እዩ።