ኤርትራውያን ተቐማጦ ዓዲ እንግሊዝ፣ ዶር ተወልደ ተስፋማርያም (ወዲ ቫካሮ) ኣብ ዝተረኽበሉ ኣጋጣሚ፣ ሎሚ 4 ግንቦት ኣብ ለንደን ኣብ ዘካየዱዎ ኣኼባ፣ ቀዋሚ ሽማግለ ‘ሓድነት ኤርትራውያን ንፍትሒ’ ኮይኖም ዘገልግሉ 9 ኣባላት ብዲሞክራስያዊ መንገዲ መሪጾም።

እታ ካብ ለንደንን ካልኦት ከተማታትን ዓዲ እንግሊዝ ዝመጽኡ ሓያለ ኤርትራውያን ኣብ ዝተረኽቡኩ፣ ብኽፉትን ልዙብን መንገዲ  ብድምጺ ዝተመርጸት ናይ ሓደ ዓመት ዕድመ ዝህልዋ ሽማግለ፣ ኤርትራውያን ተቐማጦ ዓባይ ብሪጣንያ ብውድብ ይኹን ማሕበር ከይተፈላለዩ ሃገራዊ ዕላማታት ለውጢ ንቕድሚት ኣብ ምድራኽ ኣብ ዝካየድ ህዝባዊ ምንቅስቓስ ሓቢሮም ዝዋስኡሉ መድረኽ ምፍጣርን ምውህሃድን እዩ።

ዶር ተወልደ ተስፋማርያም (ወዲ ቫካሮ) ቅድሚ ምርጫ ምክያዱ፣ ዕላማታት ‘ሓድነት ኤርትራውያን ንፍትሒ’ እንታይ ምዃኖም ብምንጽብራቕ ኣወዳድባን ቅርጽርን ነቲ ዕላማታት’ቲ ንምትግባር እተድሊ ኣካያዲት ሽማግለ ሓፈሻዊ መብርሂ ሂቡ።  ፖለቲካውን ሰብኣውን ቅልውላው ሃገርናን ህጹጽነት ለውጥን ዕድል ዘይህብ ምዃኑ ብምጥቃስ ከኣ፣ ኩሉ ኤርትራዊ እጃሙ ንምብርካት ተወፋይነት ከርኢ ተላብዩ።

ኣብ ስዊዘርላንድ ዝርከቡ ኤርትራውያን ‘ውን ብተመሳሳሊ መንገዲ፣ 15 ኣባላት ዝሓዘት ሽማግለ ‘ሓድነት ኤርትራውያን ንፍትሒ’ ብዲሞክራስያዊ ኣገባብ መሪጾም ከምዘለዉ ካብቲ ቦታ ዝበጽሓና ኣፈናዊ ሓበሬታ ኣረዲኡ።

ካብ ስዊዘርላን ዝርዝር ሓበሬታ ምስ በጽሓና ብሰፊሑ ከነቕርበልኩም ምዃና ነዘኻኽር።

ዶር ተወልደ ተስፋማርያም ወዲ ቫካሮ ኣብ ኣመሪካን ኤውሮጳን ሓድነት ኤርትራውያን ንምቅልጣፍ ድሕሪ ዘካየዶም ሰፋሕቲ ህዝባዊ ሰሚናራት ዛጊት ኣብ 15 ሃገራት ሽማግለታት ‘ሓድነት ኤርትራውያን ንፍትሒ’ ቆይመን ኣለዋ።