ዳዊት ሽለን ዝብሃል ካብ ኤርትራ ብነጋዶ ተዓዲሙ ናብ እስራኤል ዝመጸ ውሩይ ደራፋይ ኣብ ቴልኣቪቭ ምርኢት ከካይድ ኣብ ዝተረቐረበሉ ኣጋጣሚ፡ ኣምባሳደር ስርዓት ህግደፍ ኣብታ ሃገር ኣቶ ተስፋማርያም ተኸስተ (ወዲ ባሻይ) መኽፈቲ ክህብ ናብ መድረኽ ምስ ደየበ፡ ኤርትራውያን መንእሰያት፡ “ንዓና ንኤርትራውያን ኣይትውክለናን ኢኻ፡ መደረኻ ክንስመዕ ኣይንደልን ኢና፡ ውረድ” ኢሉም ዝሰትዩሉ ዝነበሩ መትሓዚታት ናብ መድረኽ ብምድርባይ፡ ዘረብኡ ከይጀመረ ካብ ስቴጅ ክለቅቕ ከምዘገደዱዎ፡ ብኡ ኣቢሉ ‘ውን ካብቲ ኣዳራሽ ክምእተባረረ ምንጭታት ካብቲ ቦታ ሓቢሮም።

ኣብቲ ትማሊ ምሸት ፓና ሮማ ሊሎድ ላቫሊም ዝተባህለ ኣዳራሽ ዝተኻየደ ባህላዊ ምሸት፡ ኣምባሳደር ህግደፍ ካብቲ ኣዳራሽ ምስ ከደ ‘ውን ገለ ደገፍቲ ናይቲ ስርዓት ስዒቦሞ ከምዝወጹ እቲ ሓበሬታ ብተወሳኺ የመልክት።

ድምጻዊ ዳዊት ሽለን፡ “ተወሊደ ንዓደየ” ዝብል ደርፊ ምስ ጀመረ ‘ውን፡ እቶም መንእሰያት፡ “ ህግደፍ ምንባር ከሊኡና እምበር ንሕናስ ተወሊድናላ እንዲና” ኢሉም ስለዝሸደዱዎ፡ ጸወታ ከቋርጽ ከምዝተደናደነን፡ ብለመና ወደብትን ኣባላት ጸጥታን ጸወታ ከምዝቀጸለን እቶም ምንጭታት ኣገንዚቦም።

ኣብዚ እዋናት’ዚ ካብ ኤርትራ ተዓዲሞም ናብ ወጻኢ ዝለኣኹ ደረፍቲ፡ ብፍላይ ብስርዓት ህግደፍ ኣብ ዝተወደበን ተሳታፍነት ወከልቲ ህግደፍ ዘለዎን ኣጋጣሚታት ብስደተኛታት ኤርትራውያን ተጻብኦታት የጋጥሞም ከምዘሎ ይፍለጥ።

ንዝርዝር ትሕዝቶ ናይቲ ኩነታት ብዝምልከት ምስ ናይ ዓይኒ መሰኻኽር ካብ እስራኤል ዝገበርናዮ ዝርርብ ኣብ ናይ ሎሚ ናይ ራድዮ ኣሰና ፕሮግራምና ከነቕርበልኩም ኢና