ህግደፍ ከም ወትሩ ንህዝቢ ኤርትራ ብዅሉ መዳይ ከሳቒ ዝተፈጥረ ሽርሐኛ ጭፍራ ከም ምዃኑ መጠን፡ ኣብ ውሽጢ ሃገር ዝገብሮ ናይ ባጤራ ኣሲሩ ንቍጠባ ሃገር ምሕናቕ ከይኣኽሎ፡ ኣብ ዝተፈላለየ ኵነታትን ቦታን ሜላ እናቐያየረ ኣብ ልዕሊ ቃልሲ ደለይቲ ፍትሒ ብፍላይ ከኣ ኣብ ልዕሊ መንእሰያትን ዕንወት ክፍጽም ብርቱዕ ጻዕሪ የካይድ ኣሎ። እቲ ቀንዲ ቃልሱ እንተ ኽኢሉ ንመንእሰያት ኣብ ናቱ ሰኪዔት ከም ዝኣትዉ ብምግባር ኣብ ትሕተኢኡ ተወዲቦም ኣንጻር ህዝቦም ክለዓሉ፡ እንተ ዘይክኢሉ ድማ ኣብ ደምበ ቃልሲ ከይተሳተፉ ከይተረድኦም ምስኡ ክደጋገፉ፡ ብመንገዲ ሃሱሳቱ ድማ ገንዘቦምን ጕልበቶምን ዝግሕጠሉ መንገዲ ሃሰስ ምባል እዩ። መራሕቲ ህግደፍ እናኣረጉ ይኸዱ ስለ ዘለዉ ንሓደ ሰብ ኣብ ስልጣን መታን ከጽንሑ ዝጀመሩዎ ቃልሲ ከምቲ ክኸደሎም ስለ ዘይከኣለ፡ ብፍላይ ኣብ ደገ ቈላሕታኦም ናብ መንእሰያት ብምስዳድ ነቶም ኣብ ኤውሮጳ ዝተወልዱን ኣብ ግዜ ቈልዕነቶም ምስ ስድርኦም ንኤውሮጳ ዝመጽኡን መንእሰያት ክውድቡ ካብ ዝጅምሩ ዳርጋ ሓሙሽተ ዓመታት ኣሕሊፎም ኣለዉ። እቀንዲ ሃንዳሲ ናይዚ ጕጅለ’ዚ የማነ ገብረኣብ (ማንኪ) ኮይኑ፡ ክኢለዮ ኢሉ ኣብ ዝተፈላለየ ኣኼባታት ዘድልዮን ዘየድልዮን መደረታት የስምዕ ነይሩ። ውዒሉ ሓዲሩ ግን እቲ ብጃህራን ፈኸራን ተላዕጢጡ ዝቐርብ ዝነበረ ኣኼባታት መንእሰያት ህግደፍ መውቅዒኦም ኮይኑ። ኣብ ልዕሊ መሰረትን ኣሕዋቱን ዝወረደ ኣይንርኣዮ ዘብል ውርደት ድማ ንህግደፍን ተደናገጽቱን ዓቢ ሕፍረት ከም ዝኾነ ክንሰምዕ ቀኒና።

ህግደፍ ዝብሃል ጭፍራ ክሳዕ ግብኣተ መሬቱ ጸይቅታቱ ንምፍጻም ፍንጥርያዕ ካብ ምባል ኣይከቋርጽን እዩ። ስለ ዝኾነ ኣብ ኤውሮጳ ይኹን ኣብ ካልእ ሃገራት ኣብ ልዕሊ መንእሰያት ድላዩ ክገብር ስለ ዘይክእል ኣንፈቱ ናብ ኣፍሪቃ ገጹ ብምቕናዕ፡ እቲ ቀንዲ ኣተኵሮኡ ኣብ ልዕሊ እቶም ካብ እስራኤል ብሓይሊ ይኹን ብድሌቶም ናብ ሳልሳይ ሃገር ዝመጽእ ዘለዉ መንእሰያት ኮይኑ ኣሎ። ኤርትራውያን ስደተኛታት ካብ እስራኤል ናብ ሩዋንዳ ክመጽኡ ከለዉ ምስ ህግደፍ ርክብ ዘለዎም ኣባላት ጸጥታ ሩዋንዳ ተቐቢሎም ኣብ ዶባ ኡጋንዳ የብጽሑዎም። እዚ ህግደፍ ብዝወደቦ ብዝተጸንዐ መንገዲ’ምበር ብሃውለከ ዝግበር ዘሎ ስራሕ ኣይኮነን። ድሕር’ዚ ከም ደላሎ ኮይኖም ዝቐርቡ ሰለይቲ ህግደፍ ነዞም መሳኪን መንእሰያት ኣብ ዘይፈልጡዎ ዓዲ ምስ ኣተዉ ሓበሬታ መታን ከይረኽቡ ምስ ዝኾነ ሰብ ከይተራኸቡ ኣብ ሓደ ፍሉይ ሆቴል ይእትዉዎም። ካብ ሆቴልኩም እንተ ወጺእኩም ፖሊስ ክወስዱኹም ስለ ዝኽእሉ ኣይትንቀሳቐሱ ብምባል ድማ ነቕ ከም ዘይብሉ ይገብሩዎም። ነዚ መታን ክጥዕሞም ድማ ኣብቲ ሆቴል ከብልዑዎምን ከዘናግዑዎምን ይቕንዩ። ድሕር’ዚ ጕዳይ ትራንስፖርት ምስ ወድኡሎም ናብ ጁባ፡ ካብኡ ድማ ብመንገዲ ካርቱም ንሊብያ ከም ዝቕጽሉ ይገብሩዎም።

እቲ ቀንዲ ዕላማ፡ እዞም ካብ እስራኤል ዝመጽኡ ናጻ ኮይኖም ኣብ ካምፓላ ኮፍ ምስ ዝብሉ ቃልሲ ከይጅምሩን ከይወዳደቡን፡ ገንዘብ ስለ ዝጸንሖም ኣብ ዋኒን (ቢዝነስ) ተዋፊሮም ንህግደፍ ይኹን ደገፍቱ ከይወዳደሩዎም፡ እቶም ገንዘቦም ዝወድኡ ድማ ኣብ ብረታዊ ቃልሲ ክሳተፉ ናብ ኢትዮጵያ ከይከዱ እዩ። እዚ ረቂቕ መደብዚ ህግደፍ ብረቂቕ ዝሰርሓሉ ዘሎ ውጥን እዩ። እቲ ዕላማ፡ እዞም መንእሰያት’ዚኦም ኣብ ኡጋንዳ ወይ ኣብ ደቡብ ሱዳን እናበዝሑ እንተ ኸይዶም ውዒሎም ሓዲሮም ኣንጻር ህግደፍ ምንቅስቓስ ክጅምሩ ስለ ዝኽእሉ፡ ወይ ድማ ገንዘቦም ምስ ወድኡ ናብ ኢትዮጵያ ብምኻድ ኣብ ብረታዊ ቃልሲ ክሳተፉ ተኽእሎ ስለ ዘሎ ግድነት ናብ ሊብያ ዝኸዱሉ መንገዲ ክፍጠር ኣለዎ። ካብዚ ተበግሲኦም ድማ ሃሱሳት ህግደፍ ካብ ጁባ ናብ ሊብያ ዝወስድ መንገዲ ይጸርጉሎም። ስለዚ፡ እቶም ካብ እስራኤል ናብ ሩዋንዳ ይኹን ኡጋንዳ ትኸዱ ዘለኹም መንእሰያት ከሎ ገና ክትንቀቑ በዚ ኣጋጣሚዚ ይሕብረኩም ኣሎ። ህግደፍ ነቲ ኣብ ኤውሮጳ ክገብሩዎ ዘይከኣሉ ብብልሽውና ንፖሊስን ሓለውቲ ጸጥታን ብገንዘብ ምዕዳግ ኣብ ምድረ ኣፍሪቃ ብፍላይ ድማ ኣብ ኡጋንዳ፡ ሰሜንን ደቡብን ሱዳን ይገብሩዎ ኣለዉ። ስለዚ፡ ነፍስወከፍ ሕልና ዘሎዎ ኤርትራዊ ነቒሑ ክከታተሎን ዓይኑ ክኸፍትን ንላቦ።

ሓደ ግዱስ ካብ ከባቢ ጁባ