ኣገልግሎት ስደተኛታት ደንማርክ፣ ንጉዳይ ኤርትራውያን ስደተኛታት ብዝምልከት፣ ካብ ኤርትራ ብዘይሕጋዊ መንገዲ ዘምለጡ ስደተኛታት ናብ ሃገሮም እንተተመሊሶም ካብቲ ስርዓት ዝወርዶም ሓደጋ ስለዘየልቦ፣ ቀጥታዊ ውልቃዊ ስግኣቶም ክሳብ ዘየረጋገጹ ኣብ ደንማርክ ዑቕባ ከምዘይወሃቦም ኣብ ጸብጻቡ ኣስፊሩዎ ብዛዕባ ዝነበረ መደምደምታ ሓሳቡ ከምዝቐየረ ምግላጹ The Local  ዝተባህለ መርበብ ሓበሬታ ገሊጹ።

ኣገልግሎት ስደተኛታት ደንማርክ፣ ነቲ ጸብጻብ ድሕሪ ምዝርግሑ ካብ ዝተፈላለየ ኩርናዓት፣ እንተላይ ካብ ኣባላት ፓርላማ ናይቲ ሃገር ቀጻሊ ነቐፌታታት ክበጽሖ ከምዝቐነየ ይፍለጥ። ምልካዊ ስርዓት ኢሳይያስ ‘ውን ድሮ ክሽቅጠሉ ጀሚሩ ጸኒሑ እዩ።

ኣገልግሎት ስደተኛታት ደንማርክ ሓሳቡ ከምዝቐየረ ንምግላጽ ብዘውጽኦ ጋዜጣዊ መግለጺ መሰረት፣ እቶም ካብ ሃገራዊ ኣገልግሎት ኣምሊጦም ዝስደዱ ኤርትራውያን ‘ውን ናይ ዑቕባ ሕቶኦም ግምት ክወሃቦ እዩ።

ኣገልግሎት ስደተኛታት ደንማርክ፣ ኣብ ወርሒ ሓምለ ናብ ሃገሩ ናይ ዝኣተዉ ስደተኛታት ብዝሒ ብዝተዓጻጸፈ ቁጽሪ ናህሪ ምስ ኣርኣየ እዩ ነቲ ናብ ዘይቅኑዕ መደምደምታታት ዝነበሮ ዝንቡዕ ጸብጻብ ብሃታሃታ ኣዳልዩዎ።