እቶም ኣብ ምዕራብ ኤርትራ ቆርመናዕ ኣብ ዝበሃል ቦታ ብግዴታ ድሕሪ ምዕላሞም ኣብ ፈለማ ወርሒ ሚያዝያ ብናይ ጽዕነት መካይን ብኣስመራ ናብ ዓሰብ ክሓልፉ ኣድማ ብምግባሮም ብሓይልታት ጸጥታ ስርዓት ኢሳይያስ ብጥይት ኣብ ተረሽረሹሉ እዋን ኣብ ኣስመራ ብፍላይ ድማ ከባቢ ኣባ ሻውል ኣብቲ ዕግርግር ዝነበረሉ ኣከባቢ ዝተራእዩ ሰባት፣ ኣንስትን ቆልዑን ከይተረፈ ብ ሰለይቲ ምልካዊ ስርዓት ኢሳይያስ ከካብ ኣባይቶም ተጭውዮም ኣብ ናዅራ ምስ ተሓየሩ ደሃዮም ጠፊኡ ከምዘሎ ምንጭታት ሓቢሮም።

እቶም ብስግረብን ካልእ ዝተፈላለየ ምኽንያትን በቲ ስርዓት ምስ ተቐየዱ ኣብቲ ንጹል ቦታ ንነዊሕ እዋን ወተሃደራዊ ታዕሊም ዝወሰዱ መንእሰያት ካብ ህዝቢ ዝያዳ ንምንጻሎም ናብ ዓሰብ ኣብ ዝገዓዓዙሉ ዝነበሩ እዋን፣ ጥርዚ ናይ ተቓውሞኦም ኣብ ኣስመራ ኳ እንተነበረ፣ ክሳብ ዓሰብ ዝበጽሑ ኣብ ምሉእ ጉዕዞኦም፣ ዋላ ናብ ባሕሪ ዘሊሎም እናጠለቑ ተሪር ተቓውሞኦም ከምዝቐጸሉ ድሒሩ ዝበጽሓና ሓበሬታ ኣረዲኡ።

እቲ ህዝቢ ፈሊጡዎ ዘሎ ልዕሊ 20 ቁጽሪ ምውታት ናይቲ ኣብ ኣስመራ ብቐጥታ ዝረኣዮ ኣጋጣሚ ኳ እንተኾነ፣ ኣብ ከባቢ ከረን ባጽዕን ጉዕዞ ባሕርን ዘጋጠመ ብዙሕ ሞት እንተተወሲኹዎ እቲ ዝጠፍአ ህይወት ናይዞም መንእሰያት ክብ ዝበለ ምዃኑ እቶም ምንጭታት ኣፍሊጦም።