ናይ ዝተላኣኹዎ ጸብጻቦም ከቕርቡ

ኣያ ኣብ ዚጠለቦ ካቢነ ይእከቡ

ሓፋሽ ዘይሰምዖ ምስጢር ተዛሪቡ

ምዒዱ የፋንዎም መልእኽቱ ኣንቢቡ!

ህዝቢ ከይዕምጽ እንተደኣ ጸጊቡ

ውሕስነት መግቢ ኢልኩም ምህርቱ ኣክቡ

ብተስፋ ኣንብርዎ እናበልኩም ቀሪቡ

ዘዕረምርም ዘማርር እንተተረኺቡ

ክርዳድ ኣብቲ ስርናይ ከይፈሪ ዓንቢቡ

ሕማም ከየልገበ ቀልጢፍኩም ወሽቡ

ብቕጽበት ይመሖ ግዜ ኣይትሃቡ!

ኢሉ ይሰዶም ኣያ ብጥብቂ ኣጠንቂቑ

ካብ ምስጢር መልእኽቱ ቃልውን ከየምሉቑ

ሕማቕ ከይቃላሕ ጥራይ ጸጽብቑ

ዋላ ኣብ ግዜ ሓዘን ፈትኑ ክትስሕቑ

ፈተና ከይመጽእ ንኸይትጭነቑ

ብሒም ንዝበለ ጨዊኹም ኣሕቕቑ!

መባእ ናይዛ ሃገር ስውኣት ጀጋኑ

ተቐባሊ ሕድሪ ኣምባገነን ኮይኑ

ጨካናት መልሚሉ ሓዎም ዝርሽኑ

ዓንዲ ናይዛ ሃገር እኖሆ ይዓኑ

ይበታተን ኣሎ’ወ ናብ በብወገኑ

ማህጸን ኣደታትና ወላድ መኻን ኮይኑ

ሃየ ሰብ ሕልና ካብ ምጽናት ኣድሕኑ!

ካብ ሓውኹም ተስፋማርያም ገረሱስ