ኣዛብእ ህግደፍ ሃገራዊ ድሕነትን ሃይማኖታዊ ጉዳያትን ኣብ ደምበ ተዋህዶ ቤተ ክርስቲያን ተፋጢጦም ኣለዉ።

ስርዓት ህግደፍ ነቶም ክልተ ካድራቱ ካብ ቤተ ክርስትያን ተዋህዶ ድሕሪ ምስጓጉ፥ ሞባእ ቤተ ክርስቲያን ኣብ ጥቕሚ ጁቦኡም ንምእታው ኣዝማድን ዓሌትን ጀነራል ኣብርሃ ካሳን፥ ሓላፊ ሃይማኖታዊ ጉዳያት ሰመረ በይን ዝርከብዎም ክፍሊ ሃይማኖታዊ ጉዳያትን፥ ኣብ ከቢድ ምፍጣጥ ኣለዉ።

ነቶም ብዕድመ ሽማግለታት ኣረገውቲ ጳጳሳት ንልዕሊ ሰለስተ ሰሙን ዓጽዮም፥ ነናቶም ካድራት ክስኩዑ ለይትን መዓልትን ይጓየዩ ኣለዉ።

እታ ቤተ ክርስትያን ኣብ መንጎ ክፍሊ ሃይማኖታዊ ጉዳያትን ኣዝማድ ጀነራል ኣብርሃ ካሳን፥ ግሉጽ ብዝኾነ ኣውራጃዊ ወገናዊን ጉቦን ምምንጣል ወዲቓ፥ ኩሎም ኛምኛም ኢሎም ክበልዕዋ ይጓየዩ ኣለዉ።

ኣባላት ሃይማኖታዊ ጉዳያት ከም በዓል ኮሎኔል ሰመረ በይን ዝኣመሰሉ፥ ምስ ዮፍታሄ ድሜጥሮስን ቀሺ ሃብቶም ርእሶምን ኮይኖም፥ ዋና ዘይብሉ ሞባእ ቤተ ክርስትያን ተዋህዶ ክጋናዘዩሉ ጸኒሖም እዮም። እዚ ምስጢር እዚ ንኸይቅላዕን ከይክሻሕን ድማ ንዮፍታሄን ንቀሺ ሃብቶምን፥ ዝኾነ መርመራ ከይካየደሎም ብዝከኣሎም ይከላኸሉሎም ኣለዉ። እዚ ድማ ናባታቶም ንኸይበጽሕ ዝግበር ምክልኻል እዩ።

ክፍሊ ሃይማኖታዊ ጉዳያት ብስም ትምህርቲ ሰንበት ዝፍለጡ ኣብ ኪዳነ ምህረት ማይ ተመናይ ዝተኣከቡ ኣጓብዝ ቦታ ዮፍታሄ ክትካእ፥ ምስ ሓደ ጳጳስ (ንኽብሪ ቤተ ክርስትያን ክበሃል ስሞም ምጥቃስ ዘየድሊ) ጥብቕ ኢሎም ይሰርሑ ኣለዉ፣ እቶም ጳጳስ እንቶስ ብጉርሒ እንተስ ብገርሂ ካብቶም ሃይማኖታዊ ጉዳያት የርብሑኒ እዮም ዝብሎም ሰባት እንተ ኾነ ካብ ክልተ ንላዕሊ ካብኡ ዝተረፈ ድማ እቲ ኣዝዩ ተመን ዝኾነን ብምድንጋርን ምትላልን ዝፍለጥ ኣቶ ግርማይ ኣብ ቦታ ቀሺ ሃብቶም ወይ ቦታ ዮፍታሄ ክምደብ ንኽብሪን ጥቕምን ሃይማኖታዊ ጉዳያት ዘይተሓለለ ጻዕሪ የካይዱ ኣለዉ።

በቲ ካልእ ወገን ጀነራል ኣብርሃ ካሳን ኣዝማዱን ኣረገውቲ ፈለስቲ ሓለውቱ ዝኾኑ ሞባእ፥ ኣምላኽ ዋንኡን ሓታቲኡን ምዃኑ ስለ ዝረስ\ዐ፥ ኣዝማዱን ዓሌቱን ኣዋፊሩ ሞባእ ንምዝማት ተዓጢቑ ይሰርሕ ኣሎ። ነዚ ቦታ እዚ ንምሓዝን ገንዘብ ቤተክርስቲያን ሓታቲ ዘይብሉ ንምዝማትን ብዙሕ ጉቦታትን ምቅድዳምን ይካየደሉ ኣሎ፣ “ከሎ ዘይበልዐስ ምስ ተሳዕረ ይጠዓስ ዝበሃል ምስላ፥

እቶም ክልተ ካድራት ህግደፍ፥ ክሳብ ዝሰናበቱ ዘየጣዕሶም፥ መዋእሎም ከንብሮም ዝኽእል መነባብሮ ኣጣጢሖም እዮም፣  ዮፍታሄ ድሜጥሮስ ኣብ ሓዝሓዝ ኣዝዩ ዘደንቕ ገዛ ሰሪሑ ኣብ ሓጺር ጊዜ ተረኪብዎ ኣሎ። ቀሺ ሃብቶም ርእሶም ድማ ደሞዙ 1500 ናቕፋ ንወርሒ፥ ክነሱ ኣብ መንጎ ዓዲ ኣቤቶን ወኪድባን ኣዝዩ ዓቢ ገዛ ሃኒጹ ይርከብ ኣሎ። እዚ ገንዘብ እዚ ካበይ መጺኡ ኢሉ ናይ ምሕታት ነገር ከይለዓለ ሃይማኖታዊ ጉዳያት ተኻፋሊ እዚ ገበን ስለ ዝኾነ ዓባቢጥዎ ክኸይድ ይፍትን ኣሎ። ከመይሲ እዚ ኣባይቲ እዚ ክስራሕ እንከሎ፥ ጁባ ሓላፍቲ ህግደፍ ሃይማኖታዊ ጉዳያት ይሃጥር ነይሩ እዩ።፣

“ወዲ ሓሜን ኣቡኡ ጸሪፉ ይድረር” ዝበሃል ምስላ ካብቶም ብስስዐ ገንዘብን ንብረትን ቤተ ክርስትያን ዝፍለጡ ውሑዳት ይሁዳታት ናይ ቤተ ክርስትያን ሰባትውን ኣብዚ ረሳሕ ተግባራት እዚ ተዋፊሮም ምህላዎም እዩ ዝፍለጥ። ከም ቀሺ ሳሙኤል ጸጋይ፥ ሓደ ጳጳስን ዝኣመሰሉ ካድራት ናይ ሃገራዊ ድሕነትን ሃይማኖታዊ ጉዳያትን እቶም ድሕሪ መጋረጃ ኮይኖም ንጳጳሳት ንምግጋይ ዝጽዕሩ ዘለዉ እዮም።

ክሳብ ሕጂ ኣብ ምሉእ ኣስመራ ብስፍሓት ዝዕለል ዘሎ ግን፥ እዚ ምእላይ እዞም ክልተ ናይ ታሪኽ ሓተላ፥ ስርዓት ህግደፍ ናህሪ ህዝቢ መኣዝኑ ንምስሓት ዝካየድ ዘሎ ድራማ እዩ። እቲ ፍታሕ ንሱ ኣይኮነን፥ ንዮፍታሄን ንሃብቶምን ምልዓል ወጮ እንተገልበጥካዮ ወጮ እዩ፥ ግልባጥ ዮፍታሄ ዮፍታሄ እዩ ዝመጽእ። ስርዓት ህግደፍ ንፓትርያርክ ኣቡነ እንጦንዮስ ኣብ ቦታኦም ክሳብ ዘይመለስዎም፥ ህዝቢ ተዋህዶ ደቂሱ ክሓድር የብሉን ዝብል ሰፊሕ ምንቅስቓሳት ይካየድ ኣሎ፣ ገለ ኣባላት ሃይማኖታዊ ጉዳያትውን ጳጳሳት ይመለሱ ጥራይ ይበሉ እምበር ሕጂ ንመልሶም ዝብል ነቶም ጳጳሳት ኣሕሊፍካ ናይ ምሃብ ጥበብ ይካየድ ኣሎ።

ህዝቢ እዚ መወራዘዪን መባልጾን ኣደዳ ዘመተን ኮይኑ ዘሎ ሞባእ ቤተክርስትያን ኣረገውቲ ኣዴታትና ቅናተን ፈቲሐን መግዝኢ ዕጣንን ጥዋፍን ኢለን ዝመጽወተኦ ገንዘብ ኣዴታትናን ኣምላኽናን ስለ ዝኾነ፥ ኣቦ ኩልና ህዝቢ ተዋህዶ ኣቡነ እንጦንዮስ ክሳብ ዝምለሱ ነዞም ጎሓሉ ክንምክቶም ኣሎና።

ግዱሳት ካብ ከተማ ኣስመራ።