ኣቦ ወንበር ኮምሽን ንድፊ ቅዋም ኤርትራ ነበር ዶር በረኸት ሃብተስላሰ፣ ውልቀመላኺ ኢሳይይስ ኣፈወርቂ፣ ንሃገራዊ ቅዋም ኤርትራ ኣመልኪቱ ሎሚ ቕነ ኣብ ቴለቭዥን ንዝደገሞ ብድዐ ብዝምልከት ምስ ድምጺ ኣሰና ኣብ ዝገበሮ ቃለመጠየቕ፣ ብሕግን ቅዋምን ተማሓዲርካ ንምንባር ኣብ ልቢ ህዝቢ ኤርትራ ዘሎ ዓሚቝ ባህግን ድሌትን ብመደረ ውልቀመላኺ ኢሳይያስ ክመውት ከምዘይክእል ገሊጹ።

ዶር በረኸት፣ ውልቀመላኺ ኢሳይያስ ነቲ ብናይ ሰለስተ ዓመት ጻዕርን ኣበርክቶን ኤርትራውያንን ህዝባዊ ተሳታፍነትን ዝተነድፈ ፣ ኣብ ምብጋሱን ምጽዳቑን ባዕሉ ኢሳይያስ ዝወዓለሉ ንድፊ ቅዋም ከይትግበር ዝተፈላለዩ ምኽንያታትን ውዲታትን እናፈጠረ ንሓያለ ዓመታት ዓጊቱዎ ድሕሪ ምጽናሕ፣ ሎሚ ሞይቱ ኢሉ ምሽክዕላሉ ዘሕዝን እኳ እንተኾነ፣ ልዕሊ ኹሉ ነቲ ስልጣን ናይ ምግባት ጥሙሑ ዝያዳ ከምዘቃልዐ ኣብሪሁ።

እዚ ከምዚ ዝኣመሰለ ኣብ ኤርትራ ክኸውን እዩ ኢልና ዘይተጸበናዮ ኣሉታዊ ፖለቲካዊ ተመክሮ፣ ዋላ ብደረጃ ናይቶም ኢሳይያስ ዘናሽዎም ዝነበረ መራሕቲ ኣፍሪቃ ‘ውን እንተኾነ መዳርግቲ ዘይብሉ ዘስደምም ቀይደ በተኽነት ምዃኑ ኣረዲኡ።

ኣብዚ እዋን’ዚ ህዝቢ ኤርትራ ብጥልመትን ምትላልን ኢሳይያስ ነቒሑን ተማሂሩን ስለዘሎ፣ እዚ ሕጂ ኢሳይያስ ክነድፎ እየ ኢሉ ዝምድረሉ ዘሎ ቅዋም ሕጋውነት ኮነ ህዝባዊ ተቐባልነት ክህልዎ ከምዘይክእል ‘ውን ኣገንዚቡ።

ኣብ መወዳእታ ዶር በረኸት፣ ኣብ ውሽጥን ወጻእን ዝርከብ ህዝቢ ኤርትራ፣ በዚ ቅብጸትን ፍሽለትን ዘበገሶ መታለሊ ናይ ኢሳይያስ ፖለቲካ ከይተደናገረ፣ ምልካዊ ስርዓት ኣልዩ ብቕዋምን ልዕና ሕግን እትመሓደር ፍትሓዊት ኤርትራ ንምትካል፣ ብውሽጥን ወጻእን ተኣሳሲሩ ስሙር ግንባር ብምፍጣር ቃልሱ ብዝያዳ ከጓሃህር ተላብዩ።

ክቡራት ተኸታተልቲ ድምጺ ኣሰና ምሉእ ትሕዝቶ ናይቲ ዶር በረኸት ምስ ኣሰና ሎሚ ዘካየዶ ቃለመጠየቕ ኣብ ናይ ጽባሕ መደብ ራድዮ ኣሰና ክቐርበልኩም እዩ።