ኣቦ መንበር ደገፍቲ ስርዓት ህግደፍ ኣብ ስታቫንገር ኣቦ መንበር ተኽለ ፈዳይ፡ ኣብ ዝሓለፈ ረቡዕ ዕለት 23.11.16  ኣብ ስታቫንገር ኣብ ዝወዓለ መጋባእያ ምሉእ ብምሉእ ተሳዒሩ።

መበገሲ ናይቲ ጕዳይ ኣብ ዝሓለፈ ዓመት ኣብ ስታቫንገር፡ ብድሆ (Biddho) ብዝብል ስም ዝተጠመቐ ናይ ጓይላ ጕጅለ  ህግደፍ ኣብ ዝነበረ መደብ ሙዚቃን ዳንኬራን ተኽለ ፈዳይ ዝፈጠሮ ናዕቢ እዩ።

ጕጅለ ጓይላ ብድሆ ኣብ ዝሓለፈ ሽዱሽተ ዓመታት ኣብ ከተማ ስታቫንገር ተኣማሚኑ ከቦሮኡ ሃሪሙ ኣይፈልጥን እዩ። ኣብቲ ብክንደይ ምስጢራዊ ኣሰራራሓ ተሓቢኡ ክገብሮ ዝፍትን ዓበድበድ ድማ ኵሉ ግዜ ካብ ፈቐዶ ኣደራሻት ስለ ዝድጐግ ወትሩ ምስ ተዋረደን ምስ ተኸላበተን እዩ።

ጕጅለ ጓይላ ህግደፍ፡ ናይ ስታቫንገር ዑደት ከካይድ ኣብ ዝመጽኣሉ ግዜ ኣብዚ ከተማ ካብ ዝርከቡ ኤርትራውያን ነበርቲ፡ ብፍላይ ድማ መንእሰያት ሰፊሕ ሰላማዊ ሰልፊ ኣጋጢምዎ ነይሩ። መሓዙት ቃልስና ዝኾኑ ኖርወጃውያንን ጋዜጠኛታትን ከይተረፈ ኣብቲ ሰላማዊ ሰልፊ ተሳቲፎም ነይሮም።

ተኽለ ፈዳይ ነቲ ከምዚ ዝኣመሰለ ናይ ህዝቢ ተቓውሞ፡ እሞ ከኣ ኖርወጃውያን ዝተሳተፉዎ ክጻወሮ ስለ ዘይከኣለ መኪናኡ ብናህሪ እናኣወንጨፈ ብምምጻእ ነቲ ሰላማውን ሕጋውን ህዝቢ ንሓደጋ ኣቃሊዑዎ። ናይ ዕድል ነገር ኮይኑ ግን ከም ዝሓሰቦ ኣይሰለጦን። ሰብ ኣይተጐድአን ንብረት’ውን ኣይዓነወን። ድሕሪኡ ኣብ ዝሰዓበ ዕግርግር ግን ተኽለ ፈዳይ ተሃሪሙ ኣፍንጫኡ ተዳዕሚሱ ናብ ሕክምና ከይዱ። ድሕር’ዚ ጭጕራፍስ ሃሪማ ተእዊ ከም ዝብሃል፡ ጐጀላ (ኣብ ፓልቶክ   ሕዳቕ 23 ኢሉ ዝኣቱ ብጻይ) ዝተባህለ ደላይ ፍትሒ ሃሪሙኒ ክብል ኣብ ፖሊስ ኣመልኪቱ::

ድሕሪ ዳርጋ ናይ ሓደ ዓመት መርመራ ድማ እቲ ጕዳይ ንውሳኔ ዕለት 23.11.16 ኣብ ቤትፍርዲ ቀሪቡ።

ብወገን ኣኽባር ሕጊ ይኹን ጠበቓ፡ ሰብ ጕዳይ ይኹኑ መሰኻኽር ነጥብታቶም ምስ ኣቕረቡ፡ ንባዕላ እታ ንከሳሲ ተኽለ ፈዳይ ወኪላ ዝቐረበት ኣኽባሪት ሕጊ፡ እቲ ንኣማኑአል በይን ንምውንጃል ዝቐረብ ክሲ እኹል መርትዖ ስለ ዘይብሉ ክስና ስሒብና ኣለና። ክሱስ ድማ ካብ ቀሪቡሉ ዘሎ ክሲ ናጻ ክኸውን ንሓትት ዝብል መደምደምታ ሂባ። ቤትፍርዲ ድማ ሎሚ መዓልቲ ናይ መወዳእታ ውሳኔኡ ብምውሳድ ንሓው ጐጀላ ካብቲ ዝተመስረተሉ ክሲ ናጻ ኢኻ ኢሉዎ።

ተኽለ ፈዳይ ኣብቲ ባዕሉ ዘበገሶ መሰረት ዘይነበሮ ክሲ ስለ ዝተሳዕረ ሕፍረት ተጐልቢቡ ወጺኡ። ተኽለ ፈዳይ፡ ኣብ ኤርትራ ዘሎ ግዲ መሲሉዎ፡ ኣብቲ ክብሩ ዝሓለወ ቤትፍርዲ ዘርኣዮ ስነምግባር ዝጐደሎ ጠባይ፡ ወኪል ውልቀ መላኺ ኢሳያስ ኣፍወርቂ ምዃኑ ብጭቡጥ ኣመስኪሩ ኣሎ።

ሃብተማርያም ሃይለ፡ ስታቫንገር