ኣብቲ ብ23 ሕዳር ኣብ ማላቦ፣ ኤኳተርያል ጊኒ ዝተኻየደ 4ይ ኣኼባ ኣፍሪቃን ዓረብን ዝተሳተፈ ሚኒስተር ጉዳያት ወጻኢ ምልካዊ ስርዓት ኢሳይያስ ዑስማን ሳልሕ፣ ነቲ ብስም ሃገራዊ ኣገልግሎት ተገዲዶም ናይ ዝተዓስከሩ  ኣምኢት ኣሽሓት ኤርትራውያን ነጻ ጉልበት ዘባኸነ፣ ማእለያ ዘይብሎም መንእሰያት ብዘይልቦም ናብ ስደት ዘንፈጸ ‘ብዋርሳይ ይከኣሎ’ ዝፍለጥ ፍሹል ጊላዊ ወፍሪ ምልካዊ ስርዓት ህግደፍ ብኣብነት ጠቒሱዎ።

ንሱ ኣብ መግለጺኡ፣ “ እቲ ወፍሪ እኩብ ሓይሊ መንእሰያት ኣብ ልምዓትን ብምውዓል ነቶም መንእሰያት ንገዛእ ርእሶም ከምዝልወጡ ገይሩዎም። ኣብ ቅድሚ ‘ቲ ዝገጥመና ዘሎ ከቢድ ብድሆታት ከኣ ዓቢ ውጽኢት ሓፊጽናሉ” ክብል ብሓሶት ተመኪሑ።

ግደ ሓቂ ግን፣ ዋርሳይ ይከኣሎን፣ እቲ ከም ሓጽቢ መንእሰያት ዝጥቀመሉ ጊላዊ ኣግልግሎትን መንእሰያት ኤርትራ ከይፈተዉ ዓዲ ከምዝቕይሩ ደኣ ጌሩዎም እምበር፣ ኣብ ነብሶም ኮነ ሃገርና ኤርትራ ዘምጽኦ ኣውንታዊ ለውጢ የልቦን።

እቲ ኣብ ኤኳተርያል ጊኒ ዝተኻየደ ዋዕላ ኣፍሪቃን ዓረብን ሕብረት ኣፍሪቃ ወኪል ምዕራብ ሰሃራ ኣብቲ ኣኼባ ክሳተፍ ስለዝፈቐደ 8 ሞሮኮ እትርከበን 8 ሃገራት ዓረብ ካብቲ ኣኼባ ብምስሓበን ከይተጀመረ ትርጉም ኣልቦ ኮይኑ እዩ። ዑስማን ሳልሕ ከኣ ኣብቲ ፍሹል ኣኼባ እዩ ናይ ሓሶት ፕሮፖጋንዳ ዘካይድ ነይሩ።

እቲ ንምዕራብ ሰሃራ ነጻ ንምግባር ዝቃለስ ዝነበረ ፖሊሳርዮ ኣብ 1976 ብበይንኣዊ መንገዲ ናጽነት ምዕራብ ሰሃራ ምስ ኣወጀ ብዙሓት ሃገራት ነቲ ውሳኔ ከምዝተቐበላኦ ይፍለጥ።