ኣብ ጀኔቫ ዝወዓሉ ልኡኻት ውልቀመላኺ ኢሳይያስ፣ ንኣባላት መርማሪ ኮምሽን ውድብ ሕቡራት ሃገራት ኣብ ሰብኣዊ መሰላት ኤርትራ ብዝተወደበ መልክዕ ከምዘፈራርሑዎም፣ ሎሚ 23 ሰነ ኣብ ጀነቫ ክካየድ ንዝወዓለ መበል 29 ስሩዕ ዋዕላ ቤትምኽሪ ሰብኣዊ መሰላት ብዝወግዒ ዝኸፈተ ፕረዚደንት ኣረጋጊጹ።

ፕረዚደንት ናይቲ ዋዕላ ኣስዒቡ፣ ብሰንኪ ኣብ ልዕሊ ኣባላት ምርማሪ ኮምሽን ኣብ ጀነቫ ካብ ዝኣትዉ ዝወረዶም ምጕብዕባዕን ምፍርራሕን፣ ተመዲቡሎም ዝነበረ ሓለዋ ብዕጽፊ ብምውሳኽ ንድሕነቶም ዝያዳ ጥንቃቐታት ከምዝገበረ ‘ውን ገንዚቡ።

ኣብቲ ኣኼባ መግለጺ ዘቕረበ ልኡኽ ጋና ነቲ ልኡኻት ናይቲ መላኺ ስርዓት ብዝተወጠነ መንገዲ ኣብ ልዕሊ ኣባላት መርማሪ ኮምሽን ዝፈጸሙዎ ምፍርራሕ ብምዅናን፣ ነቲ ብመርማሪ ኮምሽን ዝቐረበ ጸብጻብ ዘለዎ ደገፍ ገሊጹ። ልኡኽ ሕቡራት መንግስታት ኣመሪካ ብወገኑ፣ ኣብ ልዕሊ ኣባላት መርማሪ ኮምሽን ውድብ ሕቡራት ሃገራት ዝበጽሐ ምፍርራሕ ምሉእ ብምሉእ ክምርመር ከምዘለዎ ኣተሓሳሲቡ።

ነዚ ዝተጠቕሰ ኩነታት ኣብቲ ቦታ ዝርክቡ ምንጭታትና ኣቐዲሞም ኣብ ዝለኣኹዎ ሓበሬታ፣ ሓደ ካብቶም ኣብቲ ብምልካዊ ስርዓት ኢሳይያስ ዝተወጠነ ዕዋላዊ ተግባር ዝተሳተፈ ሲራክ ባህልቢ ዝብሃል መሓዮ ናይቲ ስርዓት፣ ብኣባላት ጸጥታ ንሓጺር ግዜ ተታሒዙ ከምዝተዋልአ ጠቒሶም።

እቲ ፍጻሜ፣ ብመርማሪ ኮምሽን ውድብ ሕቡራት ሃገራት ንዝቐረበ ጸብጻብ ክቃወሙ ጀኔቫ ንዝወዓሉ  ደገፍቲ ናይቲ ስርዓት ከይተረፈ፣ “ኣብ ኤርትራ ምጥሓስ ሰብኣዊ መሰል የልቦን ኢልና እናተቓወምና፣ ኣብ ጀኔቫ ንኣባላት መርማሪት ኮምሽን ከነፈራርሕ ዝረኣየትና ዓለም፣ ኣብ ጀነቫ ንወጻእተኛታት ዘይገደፉ ኣብ ውሽጢ ንህዝቢ ኤርትራ ደኣ እንታይ ክገድፉሉ ኢላ ክትክዕበና ዘጸግማ ኣይኮነን፣ ጸብጻብ ናይቲ ኮምሽን ምስማዕ ‘ኳ ዝየድልያን’” ብምባል፣ ሕንከትን ውርደትን ከምዝተሰመዖም ምግላጾም ብኣካል ዘዘራረቡዎም ምንጭታትና ኣገንዚቦም።

ነዚ ሕሱር ዓቕሊጽበታዊ ተግባር ኣብ ምጽራይን ምምርማርን ኤርትራውያን ደለይቲ ፍትሒ ምሉእ ምትሕብባር ክገብሩ፣ ብዓቢኡ ድማ ኣብቲ ን 26 ሰነ ኣብ ጀነቫ ዝካየድ ናይ ደገፍ ሰላማዊ ሰልፊ ተረኺቦም ነቲ ብጨፍላቒ ስርዓት ኢሳይያስ ዝሳቐ ዘሎ ውጹዕ ህዝቢ ኤርትራ፣ ማዕሪኡ ድማ ነቶም ኣብዚ ናይ ውርደቱ ዘበን ኣጆኻ ዝበሉዎ ገበርቲ ጽቡቑ ደገፉ ክገልጸሎም ይግባእ።