ኣብ ዱባይ ንልዕሊ ሰለስተ ዓመታት ስልጠና ሓይሊ ኣየር ብምውሳድ ካብ ዝተመረቑ 12 ኤርትራውያን መንእሰያት፣ እቶም ኣርባዕተ ንምልካዊ ስርዓት ኢሳይያስ ብምርሕራሕ ኣብ ወጻኢ ሃገር ዑቕባ ሓቲቶም ከምዘለዉ ተፈሊጡ።

እቶም፣ ናይ ልዕሊ ሰለስተ ዓመታት ስልጠና ፈጺሞም ድሕሪ ምምራቖም ነቲ ምልካዊ ስርዓት ራሕሪሖም ዑቕባ ሓቲቶም ዘለዉ መንእሰያት ካብ 19 ክሳብ 22 ዝዕድሚኦም፣ ሄኖክ ተስፋጋብር፣ ዓወት ሙልጌታ፣ መሓመድ ስሌማን ከምኡ ‘ውን ዳንኤል በረኸት እዮም።

ኣብ ድምጺ ኣሰና ፈለማ ብዜና ቀጺልና ድማ ብቓለመጠየቕ ኣቕሪብናዮ ከምዝነበርና፣ 3 ካብቶም ሰልጠቲ ሓይሊ ኣየር ኣቐድም ኣቢሎም ዑቕባ ሓቲቶም እዮም። ካብቶም ጠቕላላ 15 ሰልጠንቲ፣ ነዞም ናይ ሎሚ ሓዊስካ ብድምር 7 ኤርትራውያን መንእሰያት ነቲ ምልካዊ  ስርዓት ብምቅዋም ዑቕባ ሓቲቶም ኣለዉ።

እቶም 15 መንእሰያት፣ ኣብ ትምህርቲ ብዘመዝገቡዎ ልዑል ነጥቢ ተሓርዮም ‘ዮም ንሞያዊ ስልጠና ሓይሊ ኣየር ናብ ዶባይ ተላኢኾም ነይሮም።

ይኹን’ምበር እቲ መጻኢ ዕድል መንእሰያት ዘይዓጦ ምልካዊ ስርዓት ኢሳይያስ፣ እቶም መንእሰያት ናይ ሓይሊ ኣየር ስልጠናኦም ንሰለስተ ዓመት ድሕሪ ምክትታል ናይ መኮንናት ምዓርግ ተቐቢሎም ስልጠናኦም ንምፍጻም ኣብ ዝተቐራረቡሉ እዋን፣ ንፍርቆም፣ ብዘይ ዝኾነ ይኹን ወግዓዊ ምግለጺ መደብ ስልጠናኦም ናብ ሓይሊ ባሕሪ ክቕይሩ ከምዘገደዶም ተፈሊጡ።

ብሰንኪ ምልካዊ ምሕደራ ስርዓት ኢስይያስ፣ ነባራትን ሓደስትን ኣባላት ሓይሊ ኣየር ኤርትራ፣ ገለ ነፈርቲ ሒዞም ገሊኦም ድማ በብዝገሹዎ ነቲ ስርዓት እናራሕርሑዎ ብምኻዶም፣ ሓይሊ ኣየር ኤርትራ ሞያዊ ዓቕሙ ተጸንቂቑ ኣብ ዝተሓተ ደረጃ ወዲቑ ኣሎ።