ኣብ ዱባይ ንልዕሊ ሰለስተ ዓመታት ስልጠና ሓይሊ ኣየር ክወስዱ ካብ ዝጸንሑ 15 ኤርትራውያን መንእሰያት፣ እቶም ሰለስተ ንምልካዊ ስርዓት ኢሳይያስ ብምርሕራሕ ኣብ ወጻኢ ሃገር ዑቕባ ሓቲቶም ከምዘለዉ ተፈሊጡ።

እቶም ንሰለስተ ዓመት ዝተዋህቦም ስልጠና ገዲፎም ዑቕባ ሓቲቶም ዘለዉ ኤርትራውያን፣ ሲራክ ቴድሮስ፣ ኣቤል ገብሪሂወት፣ ኣማን ዝብሃሉ ልዕሊ 22 ዓመት ዝዕድሚኦም መንእሰያት እዮም።

እቶም 15 መንእሰያት፣ ኣብ ትምህርቲ ብዘመዝገቡዎ ልዑል ነጥቢ ተሓርዮም ‘ዮም ንሞያዊ ስልጠና ሓይሊ ኣየር ናብ ዶባይ ተላኢኾም።

ይኹን’ምበር እቲ መጻኢ ዕድል መንእሰያት ዘይዓጦ ምልካዊ ስርዓት ኢሳይያስ፣ እቶም መንእሰያት ናይ ሓይሊ ኣየር ስልጠናኦም ንሰለስተ ዓመት ድሕሪ ምክትታል ናይ መኮንናት ምዓርግ ተቐቢሎም ስልጠናኦም ንምፍጻም ኣብ ዝተቐራረቡሉ እዋን፣ ንፍርቆም፣ ብዘይ ዝኾነ ይኹን ወግዓዊ ምግለጺ መደብ ስልጠናኦም ናብ ሓይሊ ባሕሪ ክቕይሩ ከምዘገደዶም ተፈሊጡ።

ብሰንኪ ምልካዊ ምሕደራ ስርዓት ኢስይያስ፣ ነባራትን ሓደስትን ኣባላት ሓይሊ ኣየር ኤርትራ፣ ገለ ነፈርቲ ሒዞም ገሊኦም ድማ በብዝገሹዎ ነቲ ስርዓት እናራሕርሑዎ ብምኻዶም፣ ሓይሊ ኣየር ኤርትራ ሞያዊ ዓቕሙ ተጸንቂቑ ኣብ ዝተሓተ ደረጃ ወዲቑ ኣሎ።