ንሓደ ሰሙን ኣብ ትሕቲ ቁጽጽር ተቓወምቲ ደቡብ ሱዳን ኣብ ዝጸንሐት ከተማ ቦር ኣብ ቀጽሪ ውድብ ሕቡራት ሃገራት ተዓቝቦም ዝቐነዩ ልዕሊ 450 ኤርትራውያን፣ ኣብ ልዕሊ ህይወት ሰብ ዝወረዶም ጉድኣት ከምዘየልቦ፣ እንተኾነ፣ ንብረቶም ብምሉኡ ከምዝተዘምተ ኣብቲ ቦታ ዝርከቡ ኤርትራውያን ንኣሰና ሓቢሮም።

ኣብዚ እዋን’ዚ ቦር ኣብ ትሕቲ ቁጽጽር ሰራዊት መንግስቲ ሱዳን ትርከብ ኳ እንተላ ጸጥታ ናይታ ከተማ ግን ዛጊት ዘተኣማምን ከምዘይኮነ ተፈሊጡ።

ቶኽሲ ምስዓረፈ ብወተሃደራት ተሰንዮም ደሃይ ንብረት ኤርትራውያን ክገብሩ ካብቲ ተዓቝቦምሉ ዘለዉ ቀጽሪ ውድብ ሕቡራት ሃገራት ናብታ ከተማ ዝተንቀሳቐሱ ወከልቲ ናይቶም ኤርትራውያን ኣሰር ንብረቶም ከምዘይረኸቡ፣ ካብቲ ዝደቀቐ ክሳብቲ ዝዓበየነ ንብረቶም ብምሉኡ ከምዝተዘምተ ሓቢሮም።

ንሳቶም፣ ነቲ ተዛማዲ ጸጥታ ብምምዝማዝ ቀንዲ ተዋሳእቲ ናይቲ ስርቅን ዘመተን በርጌስ ህዝቢ ኮይኑ ከምዘሎ ብምምልካት፣ ምናልባት ካብቲ ተቓወምቲ ኣብ ዝነበሩሉ እዋን ንላዕሊ ወፍሪ ዝምታ ተወዓዊዑ ከምዘሎ ኣገንዚቦም። እቶም “ኣብዚ እዋን’ዚ ኣብ ነብስና ዘሎ ክዳውንቲ እንተዘይኮይን ጥራይና ኢና ተሪፍና ዘለና። ኣብዘን ሒደት መዓልታት፣ ብትሕዝቶና ምስቶም ቆጺርና እነስርሖም ዝነበርና ሽቃሎ ሓደ ኴንና” ዝበሉ ኤርትራውያን፣ ብህይወት ምድሓኖም ኳ እንተሐጎሶም፣ ናብታ ሃገር ሂዞሞ ዝመጹ ገንዘን ርሒጾም ዘፍረዩዎ ንብረትን ምብራሱ ከምዘጕህዮም ገሊጾም።

ኣብዚ እዋን’ዚ ነቲ ዝወረዶም ራስያ ብጭቡጥ ኣብ ምግምጋምን ኣብ ምግምጋምን ይርከቡ። ብዛዕባ ጸጥታ ናይታ ከተማን ድሕነቶምን ዘተኣማምን ስእሊ ስለዘይብሎም፣ ንውሕስነት ኣብቲ ተዓቝቦምሉ ዘለዉ ቀጽሪ ምጽናሕ ከምዝመረጹ ብምጥቃስ ከኣ፣ ዛጊት ብዛዕባ ምሕዋይ ዝበረሰ ንብረቶምን ናይ ዳግመ ምጥያስ ጉዳዮምን ርጉጽ ኣንፈት ከምዘይብሎም ኣረዲኦም።

እታ መካካል እትብሃል ከተማ ገና ካብ ተቓወምቲ ምሉእ ብምሉእ ነጻ ኣይወጽአትን። ነታ ኣብ ትሕቲ ተቓወምቲ እትርከብ ከተማ ባንትዩ ነጻ ንምውጻእ ኣብዚ ቀረባ መዓልታት ስጉምቲ ክወስዱ ምዃኖም ከኣ መራሕቲ ሰራዊት ሱዳን ገሊጾም ኣለዉ። ስለዚ ኣብዘን ነዳዲ ዝፈርየለን ዞባታት ዘለዋ ከተማታትን ከባቢኡን ዝርከቡ ኤርትራውያን ኩነታቶም ከም ቀደሙ ውሑስ ኣይኮነን ዘሎ።