ኣብ ዝተፈላለያ ሃገራት ኤውሮጳ ዝርከቡ ኤርትራውያን ኣብቲ ኣብ ለንደን ዝካየድ ሰላማዊ ሰልፊ ተቓውሞ ንምስታፍ ምድላዋት ይገብሩ ከምዘለዉ ተፈሊጡ።

ኣብቲ ን22 ጥቅምቲ ኣብ ለንደን ክካየድ ተመዲቡ ዘሎ ሰላማዊ ሰልፊ ንምስታፍ ካብ ዓዲ ጥልያን፡ ኣየርላንድ፡ ጀርመንን ዝኣመሰላ ሃገራት  ኤውሮጳ ዝረከቡ ኤርትራውያን ምድላዋት ይገብሩ ከምዘለዉ ተፈሊጡ።

እዚ ከምዚ ኢሉ ኸሎ፡ ብናህሪ ናይቲ ምሽብሻብ ዝግበረሉ ናይ ተቓውሞ ሰልፊ ዝተሻቐለ ኣምባሳደር ህግደፍ ኣብ ዓዲ እንግሊዝ፡ ተስፋሚካኤል ገራህቱ፡ ኣብቲ ናይ ህግደፍ ፈስቲቫል ክሳተፉ ምስ ዝዓደሞም ደረፍትን ሙዚቀኛታትን ኣኼባ ከምዝገበረ ምንጭታት ሓቢሮም።

ንሱ ኣብቲ ዝገበሮ ርክብ፡ እቲ መዲቦሞ ዘለዉ ፈስቲቫል ጸገም ከጋጥሞ ትጽቢት ኳ እንተለዎ፡ ነቲ ካብ ሰልፈኛታት ዝመጽእ ተቓውሞ ንምግታእ ናይ ጸጥታ ሰራሕተኛታት ከብዝሕ መደብ ከምዘለዎ ብምሕባር ሞራል ክህቦም ከምዝፈተነ እቶም ምንጭታት ብተወሳኺ ኣገንዚቦም።

በዚ ኣጋጣሚ፡ ኣብ ለንደንን ካልኦት ከተማታት ዓዲ እንግሊዝን ሃገራት ኤሮጳን ዝርከቡ ብህዝቦምን ሃገሮምን ዝግደሱ ኤርትራውያን ኣብቲ ሰላማዊ ሰልፊ ንምስታፍ ዝለዓለ ጻዕሪ ከካይዱ ኣዳላዊት ኮሚተ ሰላማዊ ሰልፊ ለንደን ዳግም ኣዘኻኺራ።