ኣብ ዝሓለፈ ሰሙን፡ ኣብ ከባቢ ጸሮና፡ ኣብ መንጎ ሰራዊት ኢትዮጵያን ኤርትራን ውግእ ከምዝተገብረ እሙናት ምንጭታት ሓቢሮም።

ብመሰረት’ቲ ሓበሬታ፡ ቁጽሮም ዘይተፈልጡ ወተሃደራት ክሞቱ ከለዉ፡ ሰለስተ ኣባላት ሓይልታት ምክልኻል ኤርትራ ከምዝተማረኹ፡ ሰራዊት ኢትዮጵያ ነቲ ውግእ ዝተኻየደሉ ቦታ ተቖጻጺሩዎ ከምዝነበረ፡ ብርክት ዝበለ ፈኮስቲ ብረታት ‘ውን ብሰራዊት ኢትዮጵያ ከምዝተመንዝዐ ተፈሊጡ።

ብኻልእ ወገን፡ ኣብ ተመሳሳሊ እዋን፡ ኣብ ከባቢ ዛላምበሳ ‘ውን ፍዅስ ዝበለ ውግእ ከምዝተገብረ እቶም ምንጭታት ብተወሳኺ ኣገንዚቦም።

እቲ ዝተኻየደ ውግኣት ዛጊት ብኽልቲኦም ወገናት ኣይተዘርበሉን።

ኣብ ሰሜን ኢትዮጵያ፡ ኣብ ዞባ ዓፈር፡ ኣብ ዝሓለፈ ሳምንታት 5 ኤሮጳውያን ወጻእተኛታት ተቐቲሎም፡ 2 ተጨውዮም ደሃዮም ካብ ዝጠፍእ ንደሓር፡ ኣብ ዶባት ኤርትራን ኢትዮጵያ ጽዑቕ ወተሃደራዊ ምድላዋትን ምንቅስቓሳትን ከምዘሎ እቶም ምንጭታት ደጊሞም ኣረጋጊጾም።

ነቲ ኣብ ልዕሊ’ቶም ወጻእተኛታት ዝተፈጸመ መጥቃዕቲ፡ ኢትዮጵያ፡ ብምትሕብባር ስርዓት ህግደፍ ከምዝተፈጸመ ብምኽሳስ፡ ነብሳ ናይ ምክልኻል መሰል ክትጥቀም ምዃና ከተተንቅቕ ከላ፡ ስርዓት ህግደፍ፡ ነቲ ጉዳይ ኣሉ ከምዝበሎ ይፍለጥ።

ነቲ ኩነታት ብተገዳስነት ዝከታተሉዎ ዘለዉ ኤርትራውያን ተዓዘብቲ፡ “ዓንዳሪ ስርዓት ህግደፍ፡ ኤርትራውያን መንእሰያት ኣብ ዘይምኽኑይ ኵናት ተጠቢሶም ክሃልቁ፡ ዳግማይ ፈሪዱዎም ኣሎ” ክብሉ፡ ሻቕሎቶም ብምግላጽ፡ ህዝቢ ኤርትራ፡ ነዚ ዘንጸላሉ ዘሎ ኣሰቃቒ ህልቂትን ዕንወትን ከወግድ፡ ሓቢሩ ነቲ ስርዓት ክዅንኖን ክቃወሞን ኣዘኻኺሮም።