ኣብ ዝሓለፈ ሰሙን ንምልካዊ ስርዓት ኢሳይያስ ራሕሪሑ ከምዝተሸርበ ብመርበብ ሓበሬታ demo.archive.assenna.com ተጠቒሱ ዝነበረ 1ይ ጸሓፊ ኤምባሲ ምልካዊ ስርዓት ኢሳይያስ ኣብ ኢማራት ዓረብ ነበር ኣልኣሚን ናፍዕ ኣብ ኣውስትራልያ ዑቕባ ከምዝሓተተ ምንጭታት ሓቢሮም።

ነቲ ሓበሬታ ኣብ ኣውስትራልያ ዝመደበራ መርበብ ሓበሬታ farajat.net ‘ውን ኣረጋጊጻቶ።

ኣቶ ኣልኣሚን ናፍዕ፣ “ እቲ ስርዓት ንክብርታት ሕብረተሰብ ኤርትራ የዕንዎ ስለዘሎ ክገድፎ ከምዝተገደደ” ኣገልግሎት ዜና ቱርኪ (Anadolu Agency) ንመግለጺኡ ብምጥቃስ ኣብ ዝዘርግሖ ሓበሬታ ኣረዲኡ።

ምልካዊ ስርዓት ኢሳይያስ፣ ነቲ ብኣጋጣሚ ኣብ ኣስመራ ዝጸንሐ ኣምባሳደር ኢማራት ዓረብ ዑስማን መሓመድ ዑመር ኩነታት ኣልኣሚን ክሳብ ዝጻረ ናብ ምዱብ ናይ ስራሕ ቦትኡ ናብ ኢማራት ዓረብ ከይምለስ ኣዳናጕዩዎ ድሕሪ ምጽናሕ፣ ጽባሕ ናብ ቦትኡ ክምለስ ትጽቢት ከምዝግበረሉ ምንጭታት ካብ ኣቡዛቢ ሓቢሮም።

ንሳቶም፣ ኣልኣሚን ኣብቲ ቦታ ንዝርከቡ ኤርትራውያን ጽቡቕ ምትሕግጋዝ ይገብረሎምን ኣብቲ ስርዓት ዘለዎ ቅሬታ ይገልጸሎምን ብምንባሩ፣ ናብ ኤርትራ እንተተመሊሱ ዕድሉ ማእሰርቲ ጥራይ ክኸውን እዩ ኢሎም ተሻቒሎም ከምዝነበሩ ብምጥቃስ፣ ነቲ ምልካዊ ስርዓት ምርሕርሑ ብዓቢኡ ምስኡ ‘ውን ነብሱ ምድሓኑ ከምዘሐጎሶም የገንዝቡ።

ቤትጽሕፈት ኤምባሲ ምልካዊ ስርዓት ኢሳይያስ፣ ኣምባሳደሩ ኣብ ኤርትራ ተዓጊቱ፣ 1ይ ጸሓፊኡ ድማ ዑቕባ ሓቲቱ፣ ክሳብ ሎሚ ብዘይ ላዕለዎት ሓለፍቲ በረውረው ክብል ከምዝቐነየ ይፍለጥ።