ብ 24 ነሓሰ 2015፣ እቶም ISIS ተባሂሎም ዝፍለጡ ጥሩፋት እስላማውያን፣ “ሃይማኖትና ኣይንቕይርን” ኢሎም ንዘቕበጹዎም 39 ኤርትራውያን መንእሰያት ኣብ ገምገም ባሕሪ ሊብያ ብኻራሩ ከምዝተሓርዱዎም፣ ሓደ ኣብ መወዳእታ ደቒቕ ጠለቦም ብምቕባሉ ካብ ሞት ዝደሓነ፣ 20 ሜትሮ ርሒቑ ነቲ ኩሉ ግፍዒ ብዓይኑ ዝረኣየ ትሕቲ ዕድመ ናይ ዓይኒ ምስክር ንዝሃቦም ሓበሬታ ብምጥቃስ ቤተሰብ ግዳያት ምስ ድምጺ ኣሰና ኣብ ዝገበሩዎ ቃለመጠየቕ ሓቢሮም።

እቶም ቁመና ሓው ሓደ ግዳይን፣ ቤተሰብን መተዓብይትን ናይ ካልኦት ግዳያትን ዝኾኑ ክልተ መንእሰያት ኣብ ሓበሬታኦም፣ ጠቕላላ ብዝሒ ናይቶም ብኣባላት ISIS ተታሒዞም ነበሩ ኤርትራውያን ግዳያት 78 ከምዝነበሩ ብምጥቃስ፣ ብዘይካ እተንድ ደቂ ኣንስትዮ እቶም ሃይማኖቶም ምቕያር ዝኣበዩ 38 ብትሕዞ ክጕይሑ ከለዉ፣ ሓደ ከምልጥ ዝፈተነ መንእሰይ ድማ ብጥይት ከምዝተቐትለ ኣገንዚቦም።

ብመሰረት ‘ቲ ኣስማት እናጠቐሱ ንድምጺ ኣሰና ዝሃቡዎ ሓበሬታ፣ ገለ ካብቶም ግዳያት ደቂ ሻምብቆን ከባቢኣን እዮም።

እቶም ኣብ ሓዘን ዝርከቡ ቤተሰብ ግዳያት፣ እቲ ከክልተ ሽሕ ዶላር ንነፍሲ ወከፎም ዝተቐበለ ዘይሕጋዊ መሰጋገሪ፣ እቶም ግዳያት ኣብ ሓደጋ ወዲቖም ክንሶም፣ ፈለማ ጸገም ከምዘይብሎም ኣምሲሉ ከታልሎም ከምዝፈተነ ኣብ መወዳእታ ድማ ከምዝተሰወረ ብምጥቃስ ነቲ ኣብ መንጎ ኤርትራውያን ዝርአ ዘሎ ምጭኽኻን ብቝጥዐ ገሊጾሞ።

እቲ ዘይንቡር መቕዘፍቲ ኣሕዋቶም ከቢድ ሓዘን ‘ኳ እንተውረደሎም፣ ኣብ እምነቶም ጸኒዖም ምስውኦም ኣምላኽ ከምዝቕበሎም ምሉእ ተስፋ ከምዘለዎም ዝገለጹ ቤተሰብ፣ ድሕሪ ክንደይ ትጽቢትን ምትላልን መርድእ ምርካቦም ከምዘይከፍኦም ገሊጾም። እቶም ገና ሰንፈላል ኮይኖም ዘለዉ ካልኦት ኤርትራውያን ቤተሰብ መርድእ ረኺቦም መታን ክዓርፉ ጻዕሮም ከምዝቕጽሉ ብምግንዛብ ከኣ፣ ኣብ ኤርትራ ዝርከቡ መንእሰያት ኮነ፣ ኣብ መዓስከራት ስደተኛታት ሱዳንን ኢትዮጵያን ዘለዉ ኤርትራውያን ስደተኛታት ግዳይ ናይዚ ኣረሜናዊ መቕዘፍቲ ከይኮኑ ካብ ኣሕዋቶም ክመሃሩ ኣጥቢቖም ኣተሓሳሲቦም።