ካብ መወዳእታ ኣዋርሕ 2015 ኣትሒዞም ክሳብ ዝሓለፈ ቀረባ ኣዋርሕ ናይዚ ዓመት ‘ዚ ማእከላይ ባሕሪ ሰጊሮም ዓዲ ጥልያን ዝኣተዉ ኤርትራውያን ሓተቲ ዑቕባ፣ በቲ ሕብረት ኤውሮጳን መንግስቲ ጥልያንን ዝኣተወሎም መብጽዓምሰረት ምሰል ዑቕባኦም ክሕለወሎም ዝጠልብ ሰፊሕ ሰላማዊ ሰልፊ ትማሊ 8 ሓምለ ኣብ ሮማ ኣካይዶም።

እቶም ምልካዊ መግዛእቲ ስርዓት ኢሳይያስ መሪሩዎም ካብ ኤርትራ ክስደዱ ዝተገደዱ፣ ኣብ ጉዕዞ ስደት ኣብ ምድረበዳ ሰሃራ፣ ሊብያን ማእከላይ ባሕርን በቶም ዘይሕጋውያን መሰጋገርትን ባህርያዊ ተጻብኦን ጽንኩር ጉዕዞ ዘሕለፉ ኣደ ቆልዑ ዝርክባኦም ኤርትራያን ስደተኛታት፣ ሕብረት ኤውሮጳ ካብ ኤርትራን ተመሳሳሊ ጸገም ዘለወን ኣብ ቅውላው ዝርከባ ካልኦት ሒደት ሃገራትን ዝመጹ ስደተኛታት መሰል ዑቕባኦም ሕሉው ምዃኑ ኣሚኑ ጉዳዮም ኣብ ሓጺር እዋን ከሳልጠሎም መምርሒ ኳ እንተውጽአ እቲ መብጽዓ ኣይተኸብረን ብምባል እዮም ኣብ ጎደናታት ሮማ ወጺኦም ተሰሊፎም።

ንሳቶም፣ ኣብቲ ተዓቝቦምሉ ዘለዉ መጽንሒ መዓስከር ኩነታት መነባብሮኦም ኣዝዩ ዝኸፍአ ምዃኑ ብምጥቃስ ዝግበረሎም ሕክምናዊ ኣገልግሎት ከምዘየልቦ ኣብቲ እዋን ሰላማዊ ሰልፊ ምስ ድምጺ ኣሰና ኣብ ዝገበሩዎ ዝርርብ ኣገንዚቦም።

ንሳቶም ጥራይ ዘይኮኑ፣ ብዙሓት ካልኦት ኤርትራውያን ኣብ ካልኦት ዝተፈላለየ መዓስከራት ዓዲ ጥልያን ኣብ ከምዚ ዝኣመሰለ ናይ ሰንፈላል ኩነታት ከምዝርከቡ ብምጥቃስ ድማ፣  ማሕበረሰብ ዓለም ብፍላይ ድማ ሕብረት ኤውሮጳ ህጹጽ ፍታሕ ክገብረሎም ኣተሓሳሲቦም። ግዱሳት ኤርትራውያን ጸገሞም ኣብ ምፍታሕ ክተሓባበሩዎም ‘ውን ኣዘኻኺሮም።