ኣብ ዓበይቲ ጎደናታት ሲያትል ዋሽንግተን ሰላማዊ ሰልፊ ተኻይዱ ።

እቲ ንሰላማዊ ሰልፊ ኣስመራ ደጊፉ ብህዝቢ ሲይትልን ከባቢኣን ዝተኻየደ ሰላማዊ ሰልፊ ሲያትል ሓድነታዊ ስኒት ኤርትራውያን ዝተንጸባረቐሉ ፣ ባህጊ ሓድነት ዝደመቅሉ ባህ ዘብል ዕለት’ዩ ነይሩ ። ኩሎም ተሳተፍቲ ሰልፊ ነፍሲ-ወከፎም ባህጊ ኩሉ ኤርትራዊ ጭርሖ ሒዞም እዮም ወፊሮምን ኣቃሊሖምን ። ኣብቲ ዕለት ካብቶም ብተደጋጋሚ ክቃላሕ ዝውዓላ ጭርሖታት ሕቶ መሰል እዞም ዝስዕቡ ይርከብዎም።

“ ንሕና ምስ ህዝብና ፣ ህዝብና ምሳና “ , እሱራትን ይፈትሑ , ቃል ሓጂ ሙሳ ፣ ሕቶ መሰል ኩልና ፣ ዲሞክራሲ ሕጂ ,…ይርከብዎም

እቲ ሰለማዊ ሰልፊ ካብ ቤት ጽሕፈት ማሕበረሰብ ኮሚኒቲ ኤርትራ እዩ ተበጊሱ ። ብቀንድን ዓበይትን ጎደናታት ሲያትል ድማ መሪሹ ። ብፖሊስ ትርፊክ ተዓጂቡ ክኣ ኣብቲ ቤት ጽሕፈታት ፊደራል/ማእከላይ መንግስቲ የዕሪፉ። እቶም ወከልቲ ህዝቢ ሲይትል ክኣ ንዝምልከቶም ሰበ ስልጣን መንግስቲ ኣሜርካ ብጽሑፍ ዝቀረበ ናይ ደገፍ መልእኽቲ ንሰላማዊ ሰልፊ ኣስመራን ተቃውሞ ክኣ ነቲ ብሰበስልጣን ኤርትራ ዝፍጸም ዘሎ ገበናትን ዘብርህ ጽሑፍ ኣረኪቦም።

ህግደፍ ብምኽንያት ፍጻመ 31 ጥቅምቲ በጺሕዎ ዘሎ መጻብቦ መተንፈሲ ንምርካብ ብኣባላት ጸጥታን ወተሃደራዊ ሓይሊን ክፈትሖ ፈቲኑ ስለዘይሰለጦ ፣ ከም ዘይሰልጦን ብምግንዛብ ሕሱር ፈላላይ ሜላ ሃሰው ኣብ ምባል ይርከብ ሰለ ዘሎ ፣ ዝኾነ ዝወሃብ ጠቀነ ግን ንግብርን መንፈስን እቲ ሰላማዊ ሰልፍን ዘይውክል ጻዕዳ ሓሶት ምኾኑ ማንም ሕልና ዘለዎ ኤርትራዊ ዜጋ ዝፈልጦ ምኾን ብተደጋጋዊ ተሳተፍቲ ኣዘኻኪሮም ።

ህግደፍ ኣብ ዕርበቱ ፡ ኣብ ኩሉ ኵርናዓት ዓለም ብደለቲ መሰል ዘጋጥሞ ዘሎ መኸተ እንዳ ዓበየን ናብ ናይ ውድቀቱ መወዳታ እንዳ ኣሰጋገሮ እዩ ዝረከብ ዘሎ።ሓይልታት ጸጥታን ወኪል ሃገራዊ ድሕነትን ስርዓት ህግደፍ ኣብ ልዕሊ ምስቲ ተቃውሞ ምትእስሳር ኔርዎም ኢሎም ዝጠርጠርዎም ሰባት ዝወስድዎ ናይ ምእሳር ስጉምቲ ይቅጽል ስለ ዘሎ ፣ በዚ ኣጋጣሚ ነዚ ምልዕዓል ንምቕሃም ተመዚዝኩም ዘሎኹም ኩሉኹም ላዕለዎት ሓለፍቲ ሃገራዊ ድሕነት፡ መሓውራት ስለያ፡ ፖሊስን ተራ ኣባላት ምክልኻል ሓይልታትን፡ እዚ ተጨቚኑ ዘሎ ህዝቢ ህዝብኹም፡ ሓውኹም ሓፍትኹም ካብ ብርኩ ዝወጻእኩም ወላዲኹምን ምዃኑ ኣስተውዒልኩም፡ ኣብ ጎድኑ ደው ክትብሉ፡ ሃገራዊን ሞራላውን ሓላፍነት ከምዘለዎምን ናብ ብርሃን ዘይወጽእ ገበን ድማ ከምዘይሎ ኣዘኻኺሮም።

ኣብቲ ዕለት እቲ ብዙሕ ተሳታፋይ ናይቲ ሰልፊ ኣብ ሓድነትና ዘተኮረ መደረታት ኣስሚዖምን ንሑሱር ፕሮፖጋንዳ ህግደፍ ኣቃሊዓምን ። ኣብ መዛዘሚ እቲ ሰላማዊ ሰልፊ ፣ ብምኽንያት ፍጻመ ሰላማዊ ሰልፊ ኣስመራ ዝተዳለወ ጽሑፋት ንኤርትራውይንን ወጻእተኛታትን ተዓዲሉ።

ዓወት ንህዝቢ ኤርትራ !

ኣንጻር ምልኪ ዝግበር ቃልሲ ክዕወት’ዩ።

ደለይቲ ፍትሒ ሲያትልን ከባቢኣን

ሲያትል – ዋሺንግተን 11-09-2017