ኣብ ምዕራባዊ ካናዳ ክፍሊ ሃገር ኣልበርታ ኣብ ዝርከባ ዊኒፔግ፣ ካልጋርን ካልኦት ከተማታትን ዝነብሩ ኤርትራውያን፣ ገሊኦም ማዕረ 1300 ኪሎሜተር ብመካይን ተጓዒዞም ናብ ከተማ ኤድመንተን ብምጋሽ ኣብ ዝሓለፈ ቀዳመ ሰንበት ንመበል 23 ዓመት ዝኽሪ ናጽነት ንክልተ መዓልታት ብውዕዉዕ ሃገራዊ መንፈስ ጸምቢሎሞ።

ኣብቲ ብ ኤርትራውያን ደለይቲ ፍትሒ ዝተወደበ ብዝሒ ተሳታፍነት ዝተራእየሉ ጽምብል፣ መስራትን ኣሰናዳእን ኣሰና ኣማኑኤል ኢያሱ ተረኺቡ፣ ኤርትራውያን ደለይቲ ፍትሒ ፍልልያቶም ኣወጊዶም ኣብ ሓደ ጽላል ህዝባዊ ምንቅስቓስ ብምጥርናፍ ድሕነት ሃገርን ዲሞክራስያዊ ለውጥን ኣብ ምርግጋጽ ክገብሩዎ ብዛዕባ ዝኽእሉ ኣበርክቶ ሰፊሕ መብርሂ ሂቡ።

ኣብቲ ኣጋጣሚ፣ ኤርትራውያን ካናዳውያን ብዘካየዱዎ ዲፕሎማስያዊ ጻዕሪ እቲ ዘይሕጋዊ ክልተ ካብ ሚእቲ ክፍሊት ምልካዊ ስርዓት ኢሳይያስ ከምዝእገድ ኣብ ልዕሊ ምግባር፣ ቆንስል ናይቲ ስርዓት ብመንግስቲ ካናዳ ናብ ኤርትራ ክስጎግ ክገብሩ ምኽኣሎም ኣብነታዊ ስጉምቲ ምንባሩ ብምጥቃስ፣ ንዲሞክራስያዊ ለውጢ ከም ቀዳማይ ዕላማ ኣተኵሮም ብሓባር እንተተንቀሳቒሶም ዝበለጸ ውጽኢት ከመዝግቡ ከምዝኽእሉ ኣዘኻኺሩ።

ኣብ ክልቲኡ መዓልታት እቲ ካብ ነዊሕ እዋን ኣብ ደምበ ደለይቲ ፍትሒ ብሙዚቃዊ ሞያኡ ህርኩት ኣበርክቶ ዝገብር ዘሎ ድምጻዊ ኣሮን ነጋሲ እዋናዊ ሃገራዊ ደርፍታት ብምቕራብ ኣዘናጊዑ።

ኣብቲ ጽምብል ንምስታፍ ካብተን ሓያለ ከተማታት ዝመጹ መንእሰያት ‘ውን ምንቅስቓስ ንዲሞክራስያዊ ለውጢ ንምድራኽ ክጻወቱዎ ብዛዕባ ዝኽእሉ እጃም ምይይጥ ኣካይዶም።