ኣብ ዝመጽእ ዘሎ 19 ሰነ፣ ድሮ መዓልቲ ሰማእታት ኤርትራ፣ ኣብ ጀርመን፣ ከተማ ከለን ንዝኽሪ እቶም ካብ 2000 ዓመተ ምህረት ክሳብ ሕጂ ኣብ ጉዕዞ ስደት ኣብ ማእከላይ ባሕሪ ዝሃለቑ ሓያለ ኤርትራውያን ዝርከቡዎም 23 ሽሕ ስደተኛታት፣ 23 ሽሕ ግዜ ደወል ክድወል ምዃኑ ግዱሳት ኤርትራውያን ካብ ጀርመን፣ ከተማ ከለን ሓቢሮም።

ነዚ ግብራዊ ንምግባር፣ ኣብ ከተማ ከለን ዝርከባ 230 ኣብያተ ክርስትያናት ሚእቲ ሻዕ ክድውላ እየን። ነፍሲ ወከፍ ድምጺ መቓልሕ ደወለን ከኣ ንሓደ መዋቲ ስደተኛ ክትውክል እያ።

ነቲ ጥፍኣት ስደተኛታት ብምዝካር ሕልና ኣብታ ከተማን መላእ ጀርመን ዝርከብ ህዝቢ ንምዅሕኳሕ ብመራሕቲ ሃይማኖት ተዋዲዱ ዘሎ መደብ ርዝነት ንምሃብ፣ ዲግፕተር ዝብሃል 24 ቶን ዝኽብደቱ፣ ኣብ ከም ምርጫን ሞትን ጳጳሳት ዝኣመሰልይ ፍሉያት ኣጋጣሚታት ጥራይ ዝድወል ዓቢ ደወል ስለ ‘ቶም ኣብ ግዳያት ማእከላይ ባሕሪ ዝሃልቁ ዝለዉ ስደተኛታት ደወሉ ከቃልሕ እዩ።

ብመሰረት እቲ ሓበሬታ፣ እቶም ንስደተኛታት ርህራሀን ምድንጋጽን ዘለዎም ቀዳማይ ኣቡን ናይ ከለን ከባቢኣን ካርዲናል ራይነማሪያ ቮልኪ፡ እቶም ራህዋ ንምርካብ ዝስደዱ ዘለዉ ግዳያት ኣብ ማእከላይ ባሕሪ ድሕነት ክረኽቡ፣ እቶም ድሮ ኣብታ ከተማ ዝርከቡ ኸኣ ህዝባዊ ሓልዮትን ምትሕብባርን ከይፍለዮም ዝወሰዱዎ ስጉምቲ ክውኸውን ከሎ፡ 20 ሰነ ‘ውን መዓልቲ ስደተኛታት ክትከውን ወሲኖም ኣለዉ።