ኣብ እስራኤል ዝርክቡ ኤርትራውያን መንእሰያት፡ ብጉልባብ ‘ቢዝነስ’ ብደገፍቲ ውልቀምልካዊ ስርዓት ህግደፍ ዝኾኑ ስነጥበባውያን፡ ኣኽሊሉ ፎቶ (ተፈኖን) ሙልጌታ በይን (ወዲ ዛግርን) ፕሮፖጋንዳዊ ጎስጓስ ኣካይድካ፡ ነቲ ገስጋስ ከርኢ ዝጸንሐ ምንቅስቓስ ኤርትራውያን መንእሰያት ንምግታእ ክካየድ ተመዲቡ ንዝነበረ ባህላዊ ምርኢት ብተቓውሞን ምክትታልን ደው ከምዘበሉዎ ገሊጾም።
እቶም ካብ ሰሜን ኣመሪካ ብህግደፍ ተዓዲሞም ናብ እስራኤል ዝኸዱ ስነጥበባውያን፡ ሎሚ 30 ታሕሳስ ካብ ሰዓት 8 ምሸት ጀሚሮም ኣብ ተልኣቪቭ ምርኢት ከቕርቡ ኳ መደብ እንተሓዙ፡ ኣስታት 130 ተቓወምቲ መንእሰያት ቲኬት ብምግዛእ፡ ከምኡ ‘ውን ኣብ ኣፍደገ ናይ’ቲ ዝተኻረዩዎ ኣፍደገ ባይታ ሒዞም ክሳብ ሰዓት 10፡30 ብምክትታል፡ እቲ መደብ ኣብቲ ተሓሲቡሉ ዝነበረ ቦታ ካብ ምክያድ ከምዝዓገቱዎ ኣረዲኦም።
ንሳቶም፡ ኣብዚ ኤርትራውያን መንእሰያት ኣሕዋቶምን መዛኑኦምን ቀቢሮም፡ ሞት ሰጊሮም ዝበጽሑዎ ሃገር ዑቕባ፡ ልኡኻት ናይቲ ካብ ኤርትራ ዘባረሮም ጨካን ስርዓት ህግደፍ ኮይኖም ከሳዕስዑዎም ምህቃኖም ንዕቀት ኤርትራዊ ህይወትን ደምን ምዃኑ፡ ነቶም ብቕንያቱ ክከታተሉዎም ዝቐነዩ ደረፍቲ ኣቐዲሞም መልእኽቲ ከምዘብጽሑሎም፡ ነዚ ቃል’ዚ ሰጊሮም ትእዛዝ ናይቲ ስርዓት ዝፍጽሙ እንተኾይኖም ግን፡ ተሰከምቲ ሓላፍነት ዝወርዶም ሳዕቤናት ንሳቶም እቶም ደረፍቲ ባዕላቶም ምዃኖም ከምዘጠንቀቑዎም ‘ውን ኣገንዚቦም።
እቶም ‘ከምዚ ዝዓይነቱ ፕሮፖጋንዳዊ ዳንኬራ ህግደፍ ክካየድ ኣይነፍቅድን ኢና’ ኢሎም ብሓባር ዝተላዕሉ መንእሰያት ገሊኦም 60-70 ኪሎሜተር ተጓዒዞም ናብ ቴልኣቪቭ ከምዝመጽኡ እቶም ምንጭታት ኣብሪሆም።
ብዙሓት ካብቶም ኣብ እስራኤል ዝርከቡ ኣሽሓት ኤርትራውያን መንእሰያት፡ ብውዕዉዕ ሰልፍታትን ዝተፈላለየ ካልእ መንገድታትን ብግህዶ ክቃወሙዎ ዝተዓዘበን ዝሰምበደን ስርዓት ህግደፍ፡ ነቶም መንእሰያት ብብደርፍን ሳዕስዒትን ስሒቡን ከፋፊሉን፡ ንፖለቲካዊ ምንቅስቓሶም ከዳኽም ከም ሜላ ሒዙ ክሰርሓሉ ከምዝወረሐ እቶም መንእሰያት ብተወሳኺ የገንዝቡ።
ነዚ እኩይ ዕላማ’ዚ ንምስልሳል፡ ፈለማ ዳዊት ሽለን ዝተባህለ ደራፋይ ካብ ኤርትራ፡ ኣብዚ እዋን’ዚ ድማ፡ ነቶም ድሕሪ ኽንደይ ዕጥይጥይ ናብቲ ስርዓት ዝተምበርከኹ ወዲ ዛግርን ተፈኖን ብዝተፈላለየ ጉልባባት ናብ እስራኤል ከምዝዓደሙዎም፡ ኣብ ዝመጽእ ቅነ ‘ውን ጠዓመ ዝተባህለ ደራፋይ ከምጽኡ መዲቦም ከምዘለዉ ‘ውን ይሕብሩ።