ኣብ ኤርትራ ኣብ ከባቢ ቋሓይንን ደምበላስን ጀሚሩ ዝቐነየ ኣሻቓሊ ተላባዒ ሕማም ሸሮኽ ብቐጻሊ ናብ ዞባ ጋሽ ባርካ ይላባዕ ምህላዉ ምንጭታት ካብ ኤርትራ ሓቢሮም።

እቲ ሕማም ኣብ ዝላብዓሉ ዘሎ ከባቢታት ዝርከቡ ምንጭታት እቲ ተኸሲቱ ዘሎ ድሮ ሓያለ ሰባት ብምልካፍ ናብ ሞት ኣብጺሑ ዘሎ ናይ ጥዕና ቅልውላው ኣብ ሓደገኛ ኩነታት በጺሑ ከምዘሎ ብምጥቃስ፣ ኣብ ቅድሚ ከምዚ ዝኣመሰለ ኩነታት እቲ ስርዓት ነቲ ለበዳ ሕማም ካብ ዓለም ንምኽዋል ዝኽተሎ ዘሎ ፖሊሲ ስቕታ ፖሊሲ ኣዝዩ ኣጸያፊ ምዃኑ ገሊጾም።

እቶም ንኸምዚ ዝኣመሰለ ለበዳ ንምግጣ ድልዉነት ዘይብሎም ጥዕናዊ ትካላት ናይቲ ስርዓት ነዚ ኣጋጢሙ ዘሎ  ለበዳ  ሸሮኽ ንበይኖም ንምቍጻር ዓቕሚ ከምዘይብሎም ብምምልካት ድማ፣ ኣብ ወጻኢ ዝርከቡ ኤርትራውያን ነዚ ሕማም ኣብ ምዕጋት ክዋስኡ ዝኽእሉ ኣህጉራውያን ናይ ጥዕና ትካላት እጃሞም መታን ከበርክቱ ጎስጓሳት ከካይዱ ኣተሓሳሲቦም።

ብመሰረት እቲ ዝበጽሓና ሓበሬታ፣ እቲ ምልካዊ ስርዓት፣ ነቶም ሓሚሞም ዘለዉ ምንጻል ከምኡ ‘ውን ካብ ዓዲ ናብ ዓዲ ምንቅስቃስ እንተላይ መገሻ መርዓን ተስካርን ምኽልካል ዝኣመሰሉ መሰረታውያን ስጉምታት ወሲዱ ኳ እንተሎ፣ ከም ቀደሙ ነቲ “ሕጂ ‘ውን ብጽፍርና” ዝብል ጓንጓ ፖሊሲኡ ኣብ ዘየምሕረሉ ኩነታት ብምኽታል፣ ህዝቢ ብሕማም እናተለኽፈ እቲ ወረ ከይወጽእ ንምዕባሱ ይጽዕር ኣሎ።

ለበዳ ሕማም ሸሮኽ ኣብ ጎረባብቲ ሃገራት ሱዳንን ኢትዮጵያን ‘ውን ተራእዩ ከምዘሎ ዜናታት ይሕብሩ። ከምዚ ዝኣመሰለ ዶብ ዘይፈሊ ናይ ጥዕና ቅልውላው ኣብ ዘጋጥመሉ እዋን ድሕነት ህዝቢ ብቐዳምነት ብምስራዕ ንምዕጋቱ ዝተወሃሃደ ጻዕሪ ዘድሊ ኳ እንተኾነ ኣብ ከባቢና ምቹእ ፖለቲካዊ ባይታ ብዘይምህላዉ ከምዚ ዝኣመሰለ ስልጡን ስጉምቲ ንምውሳድ ኣጸጋሚ እዩ። እዚ ድማ ን ኣድላይነት ምትሕግጋዝ ኣህጉራውያን ትካላት ዝያዳ ኣገዳሲ ይገብሮ።

ይኹን እምበር ምልካዊ ስርዓት ህግደፍን መጋበርያታቱን ነዚ ኣብ ኤርትራ ኣትዩ ዘሎ ለበዳ ክሓብኡዎ ኣብ ርእሲ ምፍታን ንጎረባብቲ ሃገራት ከም ምንጪ ወይ መላባዕቲ ብምሕማይ ከም ኣመሎም መልክዕ ዘይብሉ ፖለቲካዊ ጸወታ ከዘውትሩ ይረኣዩ ምህላዎም ዘሕፍር እዩ።