ሓላፊ ማእከል ወፍሪ ምልካዊ ስርዓት ኢሳይያስ ዶር ወልዳይ ፍጡር፣ ኣብ ዝሓለፈ ቕንያት ኣብ ኣንጎላ ዝርከቡ ኤርትራውያን ኣብ ኤርትራ ርእሰማሎም ከውፍሩ ንምእማን ፈተነ ‘ኳ እንተካየደ፣ ብሓቂ ናይ ወፍሪ ሃዋህው ዘይምህላዉ ዘቃልዑ ሕቶታት ከምዝገጠሙዎ ምንጭታት ንኣሰና ሓቢሮም።

ንሱ ኣብቲ ኣስታት 200 ኤርትራውያን ዝተረኽቡሉ ኣኼባ፣ ኣብዚ እዋን’ዚ 104 ሰብ ርእሰማል ኣብ ኤርትራ ወፍሪ ከካይዱ ኣመልኪቶም ከምዘለዉ ገሊጹሎም። ሓያለ ካብኣቶም ሆቴላት ንምስራሕ ዝሓተቱ ክኾኑ ከለዉ፣ ገለስ ወረ ብዓል 5 ኮኾብ ሆቴል ናይ ምህናጽ መደብ ዘለዎም እዮም ክብል ክምስጦም ፈቲኑ።

እንተኾነ እቶም ኣኼበናታት፣ “ኣብ ኤለትሪክ ዘይብሉ ዓዲ ከመይ ኢልና ከነውፍር ንኽእል? ኩሉ ሰብ ዓጢቑ ኣብ ሃገራዊ ኣገልግሎት እናሃለወ ኸ ሰራሕተኛታት ካበይ ኢና እንረኽቦ? ስለምንታይ እዩ ኸ ዝስተ ማይ ዝሰኣን ዘሎ? ኣንስትና ክንጽበራና ፍቓድ ዘይትህቡወን ከ ስለምንታይ፣ ንምንታይ እየን መውጽኢ ቪዛ ዝኽልኣ ዘለዋ?” ዝብሉ ሕቶታት ኣቕሪቦምሉ።

ዶር ወልዳይ ብወገኑ፣ “ኣመሪካን ወያነን ኣብ ኣይ ሰላም ኣይ ኵናት ኩነታት ሸሚሞምና ከምዘለዉ ክርድኣኩም ኣለዎ። ዶብና እንተተሓንጺጹ ኩሉ ነገር ክፍታሕ እዩ” ብምባል ነቲ ንዓመታት ዝበለየ ተራ ዘረባ ምልካዊ ስርዓት ኢሳይያስ ብጥሪኡ ደጊሙሎም።

90 ሚእታዊት ተሳተፍቲ ናይቲ ኣኼባ፣ ሰራሕተኛታት ናይቶም ኣብ ዱባይ፣ ኣመሪካን ኤውሮጳን ዝነበሩ ኣብ ኣንጎላ ግንዘቦም ዘውፈሩ ኤርትራውያን ሰብ ዋኒን ክኾኑ ከለዉ፣ ብናይ ኤርትራ ፓስፖርት ስለዝንቀሳቐሱ ዘይምስታፎም ተቓውሞ ከይምሰል ‘ሞ ዕንቅፋት ከየጋጥሞም ደኣምበር ካብ ህግደፍ ቁምነገር ተጸብዮም ዝተሳተፉ ከምዘይኮኑ እቶም ምንጭታት ኣገንዚቦም።