ካብ ዝተፈላለይያ ስቴትስ ሕቡራት መንግስታት ኣመሪካ ዝመጽኡ ልዕሊ 400 ኤርትራውያን ኣብ ዋሺንግተን ዲሲ ፊት ቤት መንግስቲ ዋይት-ሃውስ ተረኺቦም ውልቀምልካዊ ስርዓት ህግደፍ ኣብ ልዕሊ ኤርትራውያን ዝፍጽሞ ዘሎ ደረት ዘይብሉ ዘስካሕክሕ ግህሰት ሰብኣዊ መሰላት ዝዅንን ሰፊሕ ሰላማዊ ሰልፊ ኣካይዶም።

ኣብቲ ብምኽንያት ‘ቲ ትማሊ 10 ሕዳር ተዘኪሩ ዝወዓለ ኣህጉራዊ መዓልቲ ሰብኣዊ መሰላት ዝተኻየደ ሰላማዊ ሰልፊ ዝተረኽቡ ወድብትን ተሳተፍትን ንድምጺ ኣሰና ኣብ ዝሃቡዎ ሓበሬታ ኣብ ውሽጥን ወጻእን ብስርዓት ህግደፍ ዝፍጸም ዘሎ ዓመጽ ሰብኣዊ መሰላት ብፍላይ ድማ፡ ኣብ ልዕሊ’ቶም ብስርዓት ህግደፍ ተደሪኾም ናብ ስደት ኣብ ዘምርሑሉ ግዜ ኣብ ምድረበዳታት ሲናይ ዝግፍዑን ዝጠፍኡን ዘለዉ ኤርትራውያን መንእሰያት ከምዘቖጥዖም ብምግላጽ፡ ግህሰት ሰብኣዊ መሰላት ኤርትራውያን ክዓርፍ ስርዓት ህግደፍ ካብ ሱሩ ተማሕዩ ኮዓኑ ከምዘለዎ ኣገንዚቦም።

እቲ ብብዝሒ መንእሰያት ዝተሳተፉዎ ሰላማዊ ሰልፊ ብመንፈሱን ውዕውዕነቱን ፍሉይ ከምዝነበረ ድማ ኣረዲኦም።

ብኻልእ ወገን ኣብ ግላስጎ ዓባይ ብሪጣንያ ዝርከቡ ግዱሳት ኤርትራውያን ‘ውን ብምኽንያት መዓልቲ ሰብኣዊ መሰላት ተመሳሳሊ ሰላማዊ ሰልፊ ከም ዘካየዱ ካብቲ ቦታ ዝበጽሓና ሓበሬታ የገንዝብ።

ክቡራት ተኸታተልቲ ኣሰና፡ ኣብ ናይ ጽባሕ ሰኑይ መደብ ድምጺ ኣሰና ነቲ ኣብ ዋሺንግተን ዲሲ ዝተኻየደ ሰልፊ ብዝምልከት ዘዳለናዮ ጸብጻብ ከነቕርበልኩም ኢና።

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

Pictures Contributed by Alex