ኣብ ኢትዮጵያ ሎሚ 22 ሰነ ፡ ኣብ ክልላዊ ምምሕዳር ኣምሓራ ፈተነ ዕልዋ ከምእተኻየደ፡ ኣብ ቤትጽሕፈት ቀዳማይ ሚኒስተር ኢትዮጵያ፡ ሓላፊ ፕረስ ሰክረታርያ ንጉሱ ጥላሁን ኣብ ስቱድዮ ቴለቭዥን ኢትዮጵያ ተረኺቡ ኣረጋጊጹዎ።

ንሱ ኣብ መግለጺኡ፡ እቲ ፈተነ ዕልዋ ኣዝዩ ብዝተወደበ ምልክዕ ከምእተኻየደ ብምጥቃስ፡ ኣብዚ እዋንዚ ፈሺሉ ከምዘሎ ኣገንዚቡ።

ሓይልታት ጸጥታ ፈደራላዊ መንግስቲ ኢትዮጵያ፡ ነታ ኣብ መጥቃዕቲ ወዲቓ ዝነበረት ዋና ከተማ ምምሕዳራዊ ክልል ኣምሓራ ባህርዳር ተቖጻጺሩ፡ ነቲ ዕልዋ ዘካየደ ሓይሊ ስጉምቲ ኣብ ምውሳድ ከምዝርከብ `ውን ኣረዲኡ።

ህዝቢ ክልል ኣምሓራ፡ እቲ መጥቃዕቲ ኣብ ልዕሊ መንስቲ ጥራይ ዘይኮነ ኣብ ልዕሊኡ ዝተወስደ ስጉምቲ ምዃኑ ክግንዘብ ከምዘለዎ ድማ ኣዘኻኺሩ።

ኣብ መንጎ ኤርትራን ኢትዮጵያ ዓሚ 2018 ርክብ ዳግም ካብ ዝጅመር ንደሓር፡ ምምሕዳር ክልል ኣምሓራ ምስ ምልካዊ ስርዓት ኢሳይያስ ዝጠበቐ ዝምድና ዝነበሮ ክልል ኢትዮጵያ ምዃኑ ይፍለጥ።

ውልቀመላኺ ኢሳይያስ ናብቲ ክልል ክበጽሕ ከሎ፡ መራሕቲ ናይቲ ክልል ድማ ንተደጋጋሚ ግዜ ኣስመራ በጺሖም እዮም።