ካብ 2001 ኣትሒዙ ምስ ካልኦት ሓያለ ኤርትራውያን ጋዜጠኛታት ኣብ ማሕዩር ምልካዊ ስርዓት ኢሳይያስ ን ልዕሊ 14 ዓመታት ሃለዋቱ ጠፊኡ ዘሎ ኤርትራዊ ገጣማይን ኣሰናዳኢ ብሕታዊት ጋዜጣ ዘመን ነበርን ኣማኑኤል ኣስራት ብ ፔን ዝብሃል ናጽነት ጸሓፍቲ ዘተባብዕ ኣህጉራዊ ማሕበር ዝመሓደር ፔን/ኦክስፋም ናይ ዝተባህለ ሽልማት 2015 ተዓዋቲ ከምዝኾነ ቪላሜድያ ዝተባህለ ናይ ዳች ጋዜጣ ሓቢሩ።

ጋዜጠኛ ኣማኑኤል ኣስራት ኣብቲ ብ 14 ጥሪ 2016 ኣብ ሆላንድ ዝተኻየደ ስነስርዓት ‘ዩ ምስ ቱርካዊ ጸሓፍን ኣዳላዊ ፊልምን ካን ዱናር ከምኡ ‘ውን ምስራዊ ገጣማይን ጸሓፍን ዑመር ሓዘክን ነቲ ንተባዓት ጸሓፍቲ ዝወሃብ ሽልማት ክወስድ ተረቝሑ።

ጋዜጠኛን ገጣማይን ኣማኑኤል ኣስራትን ምስኡ ኣብ 2001 ብምልካዊ ስርዓት ኢስይያስ ዝተኣሰሩ ልዕሊ 12 ጋዜጠኛታት ብሕትን ክሳብ ለይቲ ሎሚ ሃለዋቶም ኣጥፊኦም ከምዘለዉ ይፍለጥ። ገለ ካብኣቶም ብህይወት ከምዘየለዉ ‘ውን ብወግዒ ዘይተረጋገጹ ሓበሬታታት የመልክቱ።