ሎሚ ቕነ፡ ኣብ መንጎ `ስርዓት ኢሳይያስን` ገለ ፍሉጣት ባእታታት ደምበ ተቓውሞን ብመንጎኛነት ኢትዮጵያ ርክብ ከምእተኻየደ ዝዝርጋሕ ዘሎ ወረ፡ ኣብ ኤርትራውያን ምድንጋር ንምፍጣር ዝዓለመ ጻዕዳ ሓሶት ምዃኑ ኣሰና ኣረጋጊጻ።

እዚ ገለ ንዲፕሎማስያዊ ምንጭታት ብምጥቃስ፡ ብኻልእ ድማ ኣስማት ናይ ገለ ፍሉጣት ባእታታት ተቓውሞ እናረቛሕካ ኣብ ማሕበራዊ መራኸቢታትን ብወርወረ ዝባዛሕ ዘሎ ሓበሬታ ኣብ መንጎ ኤርትራውያን ምጥርጣር ፈጢርካ፡ ነቲ እናተኣከበ ዝኸይድ ዘሎ ናይ ተቓውሞ ማዕበል ንምድኻም ዝዓለመ እንተዘይኮይኑ ሓቅነት ከምዘይብሉ ተረጋጊጹ ኣሎ።

ኣብዚ ቕንያት`ዚ ኣቡኡ ንቐዳማይ ሚኒስተር ኢትዮጵያ ኣቢይ ኣሕመድ ብምዕራፎም፡ ሓላፊ ፖለቲካዊ ጉዳያት ህግደፍ የማነ ገብረኣብ (ማንኪ)፡ ከምኡ `ውን ሚኒስተር ጉዳያት ወጻኢ ህግደፍ ዑስማን ሳልሕ ናብ ኢትዮጵያ ተጓዒዞም ኳ እንተነበሩ፡ ከምዚ ክውረየሉ ዝቐነየ ምስዞም ዝጥቀሱ ዘለዉ ናይ ኤርትራ ተቓወምቲ ምስጢራዊ ርከብ ከምዘየካየዱ ተፈሊጡ።

ኤርትራውያን፡ ነዚ ከምዚ ዝኣመሰለ ብሓደ ጫፍ ተበጊሱ፡ ኣብ መንገዲ ቀመም እናተወሰኾ ዝራባሕ ካብ ዝሓለፈ ስሙናት ኣትሒዙ ብፍላይ ብዝተፈላላዩ ኣርእስታት ንኤርትራውያን ክፈላልን ከተፋንንን ዝርአ ዘሎ፡ ካብ ጸላእቲ ኤርትራን ኤርትራውያንን ጥራይ ክብገስ ዝኽእል ጣቋ ዘይብሉ፡ ንገስጋስ ቃልሲ ንለውጢ ዝጎትት ቤላቤለው ክንጥንቀቐን፡ ብጥሪኡ ናብ ካልኦት ቅድሚ ምትሕልላፍ፡ ሕቶታት ብምቕራብ ምጽራይ ክግበረሉ ከምዝግባእ `ውን ምዝካር ከድልየና እዩ።