ኣብ ከተማ ለንደን ኣብ ውሽጢ ቀጽሪ ፓርላማ ዓዲ እንግሊዝ፣ ሓደ ፖሊስ ብኻራ ክጉዳእ ከሎ፣ ኣሸባሪ ብ ፖሊስ ተቐቲሉ፣  ኣብ ጥቕኡ ኣብ ዝርከብ ድንድል ብመኪና ኣብ ዘጋጠመ ሽበራዊ ናይ መኪና ግጭት ‘ውን ሰላማውያን ሰባት ከምዝቖሰሉን ከምዝሞቱን ኣብቲ ባይታ ዝርከቡ ናይ ዓበይቲ ማዕከናት ዜና ጋዜጠኛታትን ናይ ዓይኒ መሰኻኽርን ይሕብሩ ኣለዉ።

ነቲ ፍጻሜ ዝምልከቱ ሓበሬታታት ገና ኣብ መስርሕ ምጽራይ ኳ እንተለዉ፣ ብመሰረት እቶም ጸብጻባት፣ ዛጊት፣ ብዘይካ ብኻራ ዝተወቕዐ ፖሊስን፣ ብፖሊስ ዝተቐትለ ኣሸባርን፣ ሓንቲ ካብቶም ኣብ Westminster Bridge ካልእ ኣሸባሪ ብዝፈጸሞ ናይ መኪና መጥቃዕቲ ብኸቢድ ካብ ዝቖሰሉ ቁጽሮም ብልክዕ ዘይትገልጸ ሰላማውያን ሰባት ሓንቲ ጓል ኣንስተይቲ ድሮ ሞይታ ኣላ።

እቶም ክልተ መጥቃዕትታት ዝተኣሳሰሩ ምዃኖም ማዕከናት ጸጥታ ዓዲ እንግሊዝ ይእምቱ።

ኣብ ከባቢ ናይቲ ብ Westminster ዝፍለጥ ትእምርቲ ከተማ ለንደን ዝኾነ ህንጻ ፓርላማ ዓዲ እንግሊዝ ኣዝዩ ጽዑቕ ናይ ፖሊስን ዕጡቓት ሓይልታት ጸጥታን ምንቅስቓስ ይርአ ‘ሎ።

ሎሚ ኣብ ፓርላማ ዓዲ እንግሊዝ ቀዳመይቲ ሚኒስተር ዓባይ ብሪጣንያ ተሪዛ መይ ዝተረኽበትሉ ዘተ ክካየድ ኣርፊዱ ነይሩ።

እዚ ብ ፖሊስ ዓዲ እንግሊዝ ከም ግብረሸበራዊ መጥቃዕቲ ምጽራይ ዝካየደሉ ዘሎ ፍጻሜ፣ ድሕሪ እቲ ኣብ መስመር ባቡራት ከተማ ለንደን ብ ሓምለ 2005 ዝተኻየደ ልዕሊ 50 ሰላማውያን ዝሞቱሉ ግብረሸበራዊ መጥቃዕቲ ሓደ ካብቶም ዝዓበዩ ፍጻሜታት ሽበራ እዩ።