ትማሊ 24 ሚያዝያ ኣብ ለንደን ኣብ ዝተኻየደ መበል 36 ቅድድም ማራቶን ንኤርትራ ወኪሉ ዝተሳተፈ ኣትሌት ግርማይ ገብረስላሰ መበል ራብዓይ ክወጽእ ከሎ፣ መበል 12 ዝወጽአ ንዓዲ ዓዲ እንግሊዝ ወኪሉ ዝተወዳደረ ኤርትራዊ ስደተኛ ጸጋይ ተወልደ፣ ኣብቲ ውድድር ካብ ዝተሳተፉ እንግሊዝያውያን ተቐዳደምቲ ካልኣይ ዝቐልጠፈ ኮይኑ ውድድሩ ብምዝዛሙ፣ ኣብ ሪዮ ዲጀነሮ ኣብ ዝካየድ ውድድር ኦሎምፒክስ ክወዳደሩ ካብ ዝተሓጸዩ ክልተ እንግሊዛውያን ሓደ ብምዃን ቦትኡ ኣውሒሱ።

ኣብቲ ኣብ ከተማ በይጂንግ፣ ቻይና ኣብ ዝተኻየደ ማራቶን ወርቂ ማዳልያ ዝተሸለመ ኤርትራዊ ኣትለት ግርማይ ገብረስላሰ ራብዓይ ዝወጽኣሉ ናይ ለንደን ማራቶን፣ ክልተ ኬንያውያን ኣትሌታት ቀዳማይን ካልኣይን ክወጽኡ ከለዉ፣ እቲ ውሩይ ኢትዮጵያዊ ተቓዳዳማይ ከነኒሳ በቀለ ሳልሳይ ብውምጻእ ውድድሩ ዛዚሙ። ኤርትራዊ ኣትሌት ገብረዝግኣቢሄር ክብሮም ‘ውን መበል ዓስራይ ወጺኡ።

ንዓዲ እንግሊዝ ወኪሉ ዝተወዳደረ ኤርትራዊ ስደተኛ ጸጋይ ተወልደ ካብቲ ሓፈሻዊ ውድድር ማራቶን መበል 12፣ ካብቶም ኣብቲ ውድድር ዝተሳተፉ እንግሊዛውያን ድማ መበል 2ይ ዝቐልጠፈ ኮይኑ ውድሩ ድሕሪ ምዝዛሙ፣ ጋዜጣታት ዓዲ እንግሊዝ ካብ ድሕረ ባይትኡ ብምብጋስ ነቲ ዘመዝገቦ ውጽዒት ከም ዓቢ ዓወት ኣድኒቖሞ።

እተን ጋዜጣታት፣ ጸጋይ ተወልደ ቅድሚ 18 ዓመታት ጓሳ ኣብ ዝነበረሉ እዋን ብነታጕ ተሃሪሙ ከምዲ መውጋእቲ ኣጋጢሙዎ ዝነበረ ጸጋይ ኣብ ከምዚ ዝኣመሰለ ዓቢ ውድድር ዝነኣድ ውጽኢት ኣመዝጊቡ ኣብ ሪዮ ዲ ጂኔሮ ኣብ ዝካየድ ውድድራት ኦሎምፒክ ቦታ ክሓዝእ ምኽኣሉ ዓቢ ዓወት ምዃኑ ገሊጾም።

ኣትሌት ጸጋይ ተወልደ ኣብ 2008 ኣብ ግላስጎ ኣብ ዝተኻየደ ናይ ሓገር ኣቋራጭ ቅድድም ንምስታፍ ካብ ኤርትራ ድሕሪ ምምጽኡ እዩ ዑቕባ ሓቲቱ ኣብ ዓዲ እንግሊዝ ዝነበር ዘሎ።

ኣብቲ ትማሊ ዝተኻየደ ናይ ለንደን ማራቶን 40 ሽሕ ፕሮፌሽናልን ሓፋሽ ተቐዳደምትን ከምዝተሳተፉ ይፍለጥ።