እቲ ብኣባላት ተቓወምቲ ውድባትን ስምረት መንእሰያት ኤርትራ ንለውጢን ዝተወደበ ሰለማዊ ሰልፊ፡ ነቲ “ቁጠባዊ መሰረታት ኤርትራን መጻኢ ዕድላታን፡ ህሉው ማሕበራውን ፖለቲካውን ተጻብኦ ኣንጻር ረብሓ ህዝቢ ኤርትራ” ኣብ ትሕቲ ዝብል ኣርእስቲ፡ ብዶ/ር ተስፋይ ኣርዓዶም ዝተኻየደ ናይ ህግደፍ ኣኼባ ንምቅዋም ዝዓለመ እዩ ነይሩ።

እቶም ተሳተፍቲ፡ ኣብ ትሕቲ ሓያል ጸሓይ፡ ባንዴራታት ኤርትራን ኣሜሪካን እንዳ ኣንበልበሉ፡ ብመጉልሒ ድምጺ (ማክረፎን) “ህዝብና ናብ ባይቶ፡ ኢሰይያስን ጓሓፋቱን ናብ ቢንቶ” ውልቀመላኺ ኢሰይያስ ኣፈወርቂ ይውረድ ሕጂ” “ውልቀመላኽነት ተፍቅሩ፡ ንዓድኹም ኪዱ” “ስቅያት መንእሰያት የብቅዕ” “ሰብኣዊ መሰል ይተሓሎ” “ልዕልና ሕጊ ይከበር” “ናይ ሃይማኖት፡እሱራት ይፈትሑ” “ፖለቲከኛታት ይፈትሑ” “ጋዜጠኛታት ይፈትሑ” “20 ዓመት ይኣክል” “ድምጽና ድምጺ ህዝቢ እዩ” ክብሉ ብዓውታ ጨሪሖም።

እዚ ናይ’ቲ፡ ህዝቢ ኤርትራ ብፍላይ ከኣ መንእሰያት ምእንቲ ፍትሒን ሰብኣዊ መሰልን፡ ናይ’ቲ ብሓለንጊ ስርዓት ህግደፍ ዝሳቐ ዘሎ ውጹዕ ህዝቦም፡ ኣፍልቦም ነፊሖም፡ ብርእሰ ተኣማንነት ደው ዝብልሉ መድረኽን እዋንን ከምዝኣኸለ ዘርእይ ጭቡጥ ኣብነት እዩ።

ዳኒኤል ኣስራት ኣባል መሪሕነት ናይ ስምረት መንእሰያት ኤርትራ ንለውጢ ኣብ ህይስተን እዩ። ንሱ፡ ነቲ ሰለማዊ ሰልፊ ካብ ዘወሃሃዱ መንእሰያት ሓደ እዩ። “እዚ ናይ መጀመርያ እምበር ናይ መወእታ ኣይኰነን። ከም’ዚ እንተቐጺሉ ጽባሕ ንጉሆ፡ ደገፍቲ ህግደፍ ኣብ ህይስተን ቦታ ኣይክህልዎምን እዩ።” ኢሉ። ንሱ ብተወሳኺ፡ መንእሰይ ምእንቲ ህዝቡ ክቃለስ ምኽኣሉ ደስ ከምዘበሎ ከኣ ገሊጹ።

ነቲ ሰለማዊ ሰልፊ ካብ ዘወሃሃዱ ካልእ፡ ኣባል ድሕነት ዝዀነ ጀማል ሰንጋል እዩ ነይሩ። ንሱ ኣብ ኣኼባ ህግደፍ ዝተሳተፉ ሰባት ሒደት እዮም ነይሮም ይብል። “ኣብ ኣኼባ ህግደፍ ዝተረኸቡ ካብ 30 ዘይበዝሑ ሰባት እዮም። መብዛሕትኦም ዓመበይትን ምስድርኦም ዝመጹ ቈልዕትን እዮም። ገሊኦም፡ ኣብ’ቲ ኣኼባ ክሳተፉ መጺኦም፡ ነቲ ናይ ተቓውሞ ሰልፊ ምስረኣዩ፡ ብስንባደ ተጠውዮም ናብ ገዝኦም ክምለሱ ተዓዚብና።” ኢሉ። ጀማል ምብቕጻል፡ “ህዝቢ ደጋፊ ናይ’ቲ ስርዓት ከምዘይኰነ፡ ዘለዓዕሎን ዝመርሖን ይጽበ ከምዘሎ ኣመስኪሩ ኣሎ።”  ንሱ ብተወሳኺ፡ ምስ ህግደፍ ካብዘለዉ መንእሰያት፡ ኣብ ናይ ተቓውሞ ደንበ ዘለዉ መንእሰያት ከምዝበዝሑ ብምጥቃስ፡ ካብ’ቲ ናይ ተቓወሞ መድረኽ እንዳሰፍሐ ከምዝኸይድ ዘለዎ ተስፋ ገሊጹ።

እቲ ኣብ ህይስተን ዝተኻየደ ሰለማዊ ሰልፊ፡ ዓብላሊ ሃዋሁው ከምዝፈጠረ ዝገለጸ ከኣ፡ መንእሰይ ክብሮም ጸጋይ እዩ። ንሱ፡ ስርዓት ህግደፍ ኣብ ልዕሊ ህዝቢ ኤርትራ ዘውርዶ ዘሎ ወጽዓ ብሙሉኡ ክቃወምዎ ከምዝወዓሉ ይገልጽ። “ስለ ናይ ሃይማኖት እሱራት፡ ሰለ ናይ ፖለቲካ እሱራት፡ ስለ ናይ ሕልና እሱራት፡ ከምኡ’ውን እቲ ጨቋኒን ገፋዒን ስርዓት ዘካይዶ ናይ ቶሮሪስት ተግባራት ክንቃወሞ ዊዒልና።” ኢሉ።

ዶ/ር ኪዳነ ኣርኣያ ሓደ ካብ’ቶም ኣብ’ቲ ቦታ ዝተረኸበ ነባር ይህስተን እዩ። ኣብ ህይስተን ከም’ዚ ዓይነት ሰለማዊ ሰልፊ ክካየድ ምኽኣሉ ዓቢ ዓወት ምዃኑ ይገለጽ። “ እዚ ንህይስተን ዓቢ ዝላ ንቕድሚት እዩ። ቀደም፡ ሰብ፡ እንዃን ሰለማዊ ሰልፊ ኽገበር ሓሳቡ ንኽገልጽ’ውን ብጣዕሚ ከቢድ እዋን ነይሩ። እታ ዘጓነፈቶም ናይ ቤት ፍርዲ ጉዳይ ሰጥ ኣቢላቶም እያ። ናብ’ቲ ኣኼባ ብሕፍረት ክኣትዉ ከኣ ርኢናዮም። ንሕና ከኣ፡ እቲ ዘድልየና ጨርሖታት ኩሉ ሒዝና፡ “ኢሰይያስ ምስ ኰራኹሩ ናብ ቢንቶ፡ ህዝቢ ኤርትራ ናብ ባይቶ” እንዳበልና ነቶም ኢሰይያሳውያን ኣስሚዕናዮም። ብጣዕሚ ከኣ ደስ ኢሉና።” ኢሉ።

ኣብ’ቲ ሰለማዊ ሰልፊ፡ ሓንሳብ ባንዴራ የንበልብል ሓንሳብ ከኣ፡ ብማክረፎን ዝጭድር ዝነበረ ከኣ ሚኪኤል (ማንዴላ) እዩ። ንሱ፡ ድምጺ ከስምዑ ከምዝወዓሉ ይገልጽ።” ህዝቢ ኤርትራ ኣብ ከመይ ሕሱም ኩነታት ከምዘሎ ሕጂ እዚን ከም’ዚን ኢልካ ዝግለጽ ኣይኰነን። እቲ ርኡይ ኣብ ዓለም ገኒኑ ዘሎ ሓቂ፡ ህዝቢ ኤርትራ፡ ኣብ ገዛእ መሬቱን ዓዱን እዚ ኩሉ መስዋእቲ ከፊሉ፡ ኩሉ መሰላቱ ተመንዚዑ እሱር ምዃኑ ምህላዉ እዩ። ንሕና ህዝብና ዘለዎ ወጽዓ ተሰሚዑና ሎሚ ድምጹ ከነስምዕ ዊዒልና።”

ደገፍቲ ህግደፍ፡ ድምጺ ህዝቦም ክሰምዑ ከቶ ኣይደልዩን እዮም። በዚ ምኽንያት ኣብ’ቲ ኣኼባ ክሳተፍ ዝደሊ ሰብ፡ ግድን ብዓይኒ መርፍእ ክሓልፍ ኣለዎ። ካብ ብሱል ጥረ ከምዝበሃል መንእሰይ ኣለክሳንደር ክብርኣብ ኣብ’ቲ ኣዳራሽ ኣትዮ ነይሩ። እንተዀነ ከም’ቲ ዝሓሰቦ ኣየረኸበን። “ንዓ ንደልየካ ኣለና ኢሎም፡ ንፖሊስ ነጊሮም ካብ’ቲ ኣኼባ ኣውጺአሙኒ።” ኢሉ።

እሞ ከመይ ተሰሚዑካ?

ኣነ ኣብ’ቲ ኣኼባ ኣትየ ከም ሓደ ዘይምልከቶ ወይ ከም ዘይኤርትራዊ፡ እዚ ቦታ’ዚ ኣይምልከተካን እዩ ኢሎም ከውጽኡኒ ከለዉ ናይ ብሓቂ ተሰሚዑኒ። ኣትሪረ ክረግጽን ኣብ’ቲ ዘለኽዎ ተቓውሞ ክቕጽልን ሓሳብ ኣሎኒ።

ኣብ’ቲ ኣኼባ እንታይ ተዓዚብካ? ንዝብል ሕቶ፡ ኣለክሳንደር ክምልስ ከሎ “ ገና ክኣቱ ከለኹ፡ ሰባት ሽሞም እንዳመዝገቡ፡ ገለ ዓሰርተ፡ ገለ ከኣ ዕስራ ዶላር ከዋጽኡ ርእየዮም። እቲ ኣብ መወዳእታ ዝተኣኸበ ገንዘብ ግና ብዙሕ ኣይመስለንን። እቶም ሰባት፡ ኣብ ነንሕድሕዶም ናይ ዘይምትእምማን መንፈስ ዝነበሮም ይመስሉ ነይሮም።

እቶም ኣውኡ ዝነበሩ ሰባት፡ ብኣፍልጦ ዝድግፉ ኣይመስሉን እዮም። ኣብ’ቲ ቅድሚት ገለ ዓበይቲ ኣንስቲ ከፍ ኢለን ነይረን። ኣብ ድሕሪት ከኣ፡ እቶም ኣብ ከባቢና ኩሉ ጊዜ ንርእዮም ትርጉምን መሰረትን ዘይብሉ ዘረባ ዝዛረቡ ሰባት እዮም ነይሮም።” ኢሉ። ኣለክሳንደር ብተወሳኺ፡ ኣብ’ቲ ኣኼባ ከባቢ 30 ሰባት ከምዝነበሩ’ውን ሓቢሩ።