ኣብዚ ዝሓለፈ ቅንያት 5 ጀላቡ ኤርትራውያን ዓፈር ብደብዳብ ነፈርቲ ናይታ ኣብ ዓሰብ ወተሃደራዊ መዓስከር ደኲናት ዘላ ሕቡራት ኢማራት ዓረብ ድሕሪ ምዕናወን ቁጽሮም ዘይተፈልጠ ኤርትራውያን ገፈፍቲ ዓሳ ከምእተጎድኡ ምንጭታት ሓቢሮም።

እቶም ኣብዚ እዋን`ዚ ደቡባዊ ቀይሕባሕሪ ገማግም ኤርትራ ምሉእ ብምሉእ ኣብ ትሕቲ ቁጽጽር ሕቡራት ኢማራት ዓረብ ከምዘሎ ዝሓበሩ ምንጭታት፡ እቶም ብያታዊ ምግፋፍ ዓሳ ዝናበሩ ኤርትራውያን ዓፈር፡ ዓሳ ገፉ እንተደኣደልዮም ናብቲ ወከልቲ ኢማራት ዓረብ ኣብ ዓሰብ ከፊቶሞ ዘለዉ ቤትጽሕፈት ኢማራት ከይዶም ብምምልካት ንዝተወሰነ ሰዓታት ፍቓድ ከምዝወሃቦም ይገልጹ።

ካብ ፍቓዶም ወጻኢ ዓሳ ክገፍፍ ንዝረኸቡዎ ወዲ መሬት ህዝቢ ዓፈር ድማ ከም ጓና ብደብዳብ ነፈርቲ ይቐትሉዎ ኣለዉ።

በቲ ዝተረኽበ ሓበሬታ መሰረት፡ ውልቀመላኺ ኢሳይያስ፡ ምእንቲ ጸቢብ ረብሕኡ ብምስጢር ምስ ሕቡራት ኢማራ ዓረብ ውዕል ገይሩ ኣብ ዓሰብ ወተሃደራዊ መደበር ካብ ዘፍቅደሎም እዋን ንደሓር፡ ዛጊት ክሳብ 50 ጀላቡ ገፈፍቲ ዓሳ ብደብዳብ ነፈርቲ ኢማራት ክዓንዋ ከለዋ፡ ቁጽሮም ዘይተፈልጠ ሓያለ ዜጋታት ከምዝሞቱ፡ መሓውሮም ዝተቖርጸ ዝርከቡዎም ልዕሊ 80 ስንኩላን ኣብ ዓሰብ ይርከቡ።