ከምዚ ትሕት ኢልኩም ትርእዩዎ ዘለውኹም፡ ኣብ ናይ 25 ሕዳር 2011 ሕታም ሓዳስ ኤርትራ ኢሳይያስን መሓዮኡ ዓሊ ዓብዱን ብብርዒ ስም ዝጸሓፉዎ ‘ርዝን ንበል’ ኣብ ትሕቲ ዝብል ኣርእስቲ ከምዚ ዝብል ተረካብ ዘረባ ይንበብ።

“….ካድራትን ሓለፍትን – እንተላይ ሚኒስተራት። ኣመሓደርቲ ዞባታት። ፈጻሚ ሽማግለ ህግደፍ – ቅድሚ ስራሕ ምዝራብ፡ ቅድሚ ስራሕ ምርኣይ… ዝብሕጐግ ስነ–ምግባር ይቀላቐል ኣሎ፣ ኣብ ኣሃዱኻን ትካልካን ንዝተሰርሐ ፍጹም ምግናን ወይ’ውን ዘይተሰርሐ ከምእተሰርሐ ምምሳል። ተዓዛቢ ክሳብ ዝቕየፈካ ምሸት ምሸት ኣብ መራኸቢ ብዙሃን ብተደጋጋሚ ምቕልቃል።”

ነቶም ተስተውዕሉ መቸም፡ እዚ ኣበሃህላ’ዚ ኢሳይያስ ኣፈወርቂ ኣብ 1987 ከምኡ ‘ውን 1994 ነብሱ ብዘይንሕስያ ሓራ ገይሩ ‘መሪሕነት መሽሚሹ፡… ሓድሽ ደም፡ ውዑይ ደም የድሊ’ሎ” ክብል ዘስምዖ ተኮለኛ ዘረባን ዝወሰዶ ናይ ቃጻ ስጉምትን ኣዘኪሩኩም ይኸውን። መሳኪን፡ እቶም ኣብ ቅድሚ ኢሳይያስ ካብ ኮንዶም ዘይሕሹ፡ ተጠቒምካ ንምስንዳው ዝተቐረቡ ‘ሓለፍቲ’ ህግደፍ፡ ሕጂ ‘ውን ሴፍ ዲዩ ኩርማጅ ደኣ’ዩ ኣይተፈልጠን እምበር ገለስ ተቐሪቡልኩም ኣሎ። እዛ ኣብ ክንዲ ‘መራሕቲ’ ‘ሓለፍቲ’ እትብል ኣብ መዝገበ ቃላት ህግደፍ እትርከብ ኣምር፡ ንሃለዋት ሰበስልጣን ህግደፍ ብልክዕ እያ ትገልጾ፡ ንሶም ኩሎም ሓለፍቲ (ከየድቲ) እዮም፡ ብዘይክኡ (መን ደኣ ኢሳይያስ እምበር) ክንደይ ‘ሞ ዘይሓለፉ!

ኣብዛ ሓንቲ ንእሽቶ ውዲተኛ ብጣስ ጽሕፍቲ እቲ ካልኣይ ዝዓበየ መስሓቕ፡ እዚ ዝስዕብ ጥቕሲ እዩ።

“…ታሕተዎት ዝሰርሕዎን ዝለፍዕሉን ውጽኢት ምሽምጣጥን ብኡ ዝና ክትገብር ምፍታንን… ወዘተ ልሙድ እናኾነ ይመጽእ ኣሎ፣”

ኣውራ ዋና ናይዚ ሕማም’ዚ ደኣ ‘ሞ መን ዲዩ? ኣይተ ኢሳይያስ ባዕሉ ዶ ኣይኮነን? ፒሮ ዝቐደዶ ጁባ ዘለዋ ካምቻ ተረፍ ጥይት ኣምሲልካ ንምርኣይ ትጠቅም’ያ ዝተባህለት  መከረኛ ስእሊ እናደጋገምካ፡ ንሞያን ኣበርክቶን ‘ቶም ኣሽሓት ጀጋኑ ከም ናይ ብሕትኻ ብምግባት፡ “ቃላት ብወርቂ ቀለም” ኣብ ትሕቲ ዝብል ዘይምቕሉል ኣርእስቲ ንቴለቪዥን ኤርትራ ኣልቡም ዝገበሩዋ His Excellency ፕረዚደንት ኢሳይያስ ዶ ኸ ኣይኮኑን? ኣብ ሃገር ሰብ ተሳኢኑስ፡ ኣብ ውሽጢ ሓደ ወርሒ ምስ 33 ጋዜጣታት ቃለመጠየቕ ክገብር ዝወረሐ ኸ ኢሳይያስ ኣፈወርቂ ዶ ኣይኮነን? እሞ፡ ሕልፊ ኢሳይያስ ደኣ መን እዩ፡ ፍረጻዕሪ ካልኦት ዝሽምጥጥ፡ ክረዲት ዝዘምት?

ኣብዛ መንቃም ጽሕፍቲ ግን ሓንቲ ከም ገለ ኢላ ዝሰቶኸት ሓቀኛ መስመር ኣላ፡ “ህዝቢ ኤርትራ ለባም፡  መስተውዓልን ህዱእን ህዝቢ’ዩ፣ ካብ ዓይኑ ዝኽወል ቅንጣብ ነገር የለን፣ ኮይኑ ድማ ዋዕዋዕ ከይበለ “ዔብ” ይብል ሎ”… እወ፡ ህዝቢ ኤርትራ ብሓቂ ብልቡ ዔብ ይብለኩም ኣሎ።  እቲ ቅድሚ ሕጂ፡ “እዚ ሰብኣይ ንበይኑ ኾይኑ፡ ኣግዲዖሞ፡ እንታይ ‘ሞ ዘይገበረ” ዝብል ብኢሳያስን ረረውቱን ልሒኹ ህዝቢ ዘደናግር ዝነበረ ምስጢር ተቐሊዑ፡ ህዝቢ ነቒሑሉ እዩ። እወ ምስኪን ህዝቢ ኤርትራ፡ ብሰንኪ’ቲ ብዘይካይ ኩሉ ናይ ኤርትራ በላዪ፡ ተቐያሪ (Dispensable) እዩ ዝብል ውልቀመላኺ ኢሳይያስ ኣፈውርቂ፡ ማህጸኑ ደም ተሓሊቡ ዘፍረዮ ናጽነት ባኺኑ፡ መብጽዓን ሕድርን ሰማእታቱ ተጠሊሙ፡ ደም ይነብዕ ኣሎ። ንስቕተኛ መርገሙ ዘግህደሉ መዓልቲ ይቐረብ ከም ዘሎ ስለዝተረድኡ ኸኣ’ዮም ኢሳይያስን ዓሻክሩን፡ ነዚ ብተደጋጋሚ ዝተጠቕምሉ ዝዓሰወ ሜላ ዳግማይ ክሰርሑሉ ዝወሳወሱ ዘለዉ። እንተ ንሕና ‘ደጊም ርዝነት ክትዝክሩ ኣብዘይትኽእሉሉ ደረጃ ፍዅሰት ስለዝበጻሕኩም፡ ብንፋስ ተበቍጽኩም ክትጠፍኡ ጥራይ ‘ዩ ተሪፉኩም ዘሎ እንኮ ዕድል፡’ ጥራይ ኢና ክንብሎም እንደሊ።  ነቲ መከረኛ ውጹዕ ህዝቢ ኤርትራ ኸኣ፡ ሓልዮትን ሓላፍነትን ዝስምዖ ረዚን ስርዓት ይፍጠረሉ። ኣሜን።

ኣማኑኤል ኢያሱ

8 ታሕሳስ 2011