ዓንደብርሃን  ወልደ ገርግሽ – ሕጂ ኸ ናበይ?

ናይ ኣስመራ ዩኒቨርሲቲ ፕረሲደንት ነበር ዓንደ ርሃን ወልደ ገርግሽ ፡ ኣብዚ መድረኽ እዚ፡ ንስርዓት ኢሳያስ ብምቅዋም ፡ ፕረሲደንት ኢሳያስ ካብ ስልጣን ተወጊዱ ፡ ኣብ ኤርትራ ፍትሓዊ መንግስቲ ንክትከል ከምዝቃለስ ፡ ዘስምዖ  ዘሎ መደረታትን ሰሚናራትን ፡ ዘሓጉስ እዩ ፡፡ ሕጂ ውን ኣብ ዓዲ እንግሊዝ፡ ኣብዚ ቀረባ እዋን፡  ህዝባዊ ኣኼባ ከየካየደ ኣይተርፍን ተባሂሉ ይዝንቶ፡፡ ይኹን እምበር ኣብቲ ቅድሚ ሕጂ፡ ዘካይዶ መደረታትን ሰሚናራትን  ግን ፡ ብፍላይ እኳ ኣብ ከለን ጀርመንን ፡ ኣብ ስዊስን ተረኺቡ ፡ ካብ ህዝቢ ንዝቐርበሉ ሕቶታት ዝህቦ  መልሲ ፡ ኣዝዩ ኣስካፍን ካብ ሓቂ ዝረሓቐን ስለዝኾነ ፡ ከየሰንበደኒ ኣይተረፈን፡፡

ብፍላይ ድማ ፡ ዓንደ ብርሃን ወልደ ገርግሽ ፡ ቅድሚሎሚ ብኢሳያስ ኣፈወርቂ  ፡ ብደረጃ እሙን ወኪል  ተሓርዩ ፡ ፕረሲደንት ናይ ኣስመራ ኮይኑ ፡ ኣብ ዘመሓድረሉ ዝነበረ እዋን ፡ ኣነ ውን ፡ ኣብቲ ግዜቲ ኣብ ኣስመራ ዩኒቨርሲቲ ፕሮፈሰር ኮይነ የገልግል ስለዝነበርኩን፡ ኣብ ልዕለና ኣብ ልዕሊ መማህራን ዩኒቨርሲቲን፡ ኣብ ልዕሊ ኣሽሓት ተመሃሮን  ዝተጻወቶ ፡ ሰፍ ዘይብል ኣዕናዊ ተራን፡  በደልን ፡ ኣብ ክንዲ ይቕረታ ምሕታት፡ ከምዘይወዓሎን ዘይፈልጦን ኮይኑ ፡ ክኽሕድ ስለዝረኣኹ ፡ ሓቂ  ንከይሽፈንን፡   ንጹር መጻኢ ራእይ  ንኽህሉን ብማለት፡  ነዚ ሓጺር ጽሑፍዚ ከቕርብ ተገዲደ፡፡  ንዝሓለፈ ጊጋታትካ ክትእርም ዘይምድላይን፡ ሸፋፊንካ ምኻድን  ግን ፡ ኣብ  መጻኢ እዋን ውን ፡ ዕድል እንተጋጢሙኒ፡ ነቲ ቅድመ ሕጂ ዝፈጸምኩዎ ተግባራት፡ ኣዳህሊለ ክደግሞ  እየ ማለትዩ  ዘስምዕ ፡፡ መምዘኒ ናይ መንነት ድማ  እዩ፡፡

እዚ ስለዝኾነ፡ እቲ ዝሓለፈ ገበናት ዳግማይ ንከይደግሞ ፡ ንሓው ዓንደብርሃን ፡ገለ ካብቲ ዘካየዶ በደላት ናይ ዓይኒ ምስክር ኮይነ ክትንትን ከለኹ፡ ኣብ ሕሊና ዝተሞርኮሰ ፡ ኣስተንትኖ  ጥራይ ልቢ ውጹዓት ከምዘረስርስ  ተረዲኡ ፡ ወግዓዊ ይቕረታ ንህዝቢ ክሓትት ከምዘለዎ ንምዝኽኻር እየ፡፡