ብ ኣወልኼር ዓ/ሓፊዝ

ንነፍሱ ፍትሒ ዘይምነ / ዘይደሊ ሰብ ክሳብ ሕጂ ኣይተወልደን። ኣይክውለድን`ዩ ። ኪኖ`ዚ ዘሎ  በዳሂ ስጉምቲ ግና ንናይ ኻለኦት ፍትሒ  ምምናይን ምስራሕን ምስዋእን `ዩ።

ኣብ`ዚ ዝሓለፈ 200 ዓመት ከም ኣርኣያ ፍትሒ ክንወስዶም እንኽእል ከም ኣብራሃም ልንኮን ንስንሰለት ባርነት ዝበተኸ፤ ብሰንኪ ፍትሓውነቱ ዝተቀትለ። ከም ማህተማ ጋንዲ ጸሬ ወጽዓ ዝተቃለሰ፤ ደቂ ሰባት ፍትሒ ዘይተጋራጨውቲ  ክገብሮም ይኽእል ምዃኑ ዝኣመነ፤ ብሰንኪ`ዚ እምነቱ ዝተቀትለ። ከም ማርቲን ሉተር ክንግ ንፍትሒ ደቂ ሰባት ዝተቃለሰ፤ ብስንኪ`ዚ ፍትሓዊ ቃልሱ ዝተቀትለ። ……….  ንዖኦም ዝመስሉን ኣለዉ።

ካብ`ዚ ፍልይ`ሉ  ሚእቲ ክልተ ሚእቲ ዓመታት ዘይኮነ 14 ሚእቲ ዓመት ንድሕሪት ተመሊስና እንድህስሶ ታሪኽ ፍትሒ ኸኣ  ናይ`ቲ ንነፍሱ ኣትሒቱ ንፍትሒ ክብ ዘበለ ብጸሬ ፍትሒ ዝተቀትለ ኣርኣያ ፍትሒ  ዑመር ብን ኸጣብ`ዩ። ራ.ዓ።

ዑመር ዘማሓደሮ መሬት ፤ ብናይ ሎሚ ኣጸዋውዓ ሃገራት ፡-

• ቱንዝያ- ሊብያ- ግብጺ- ሱዑዲያ- ዑማን- ቀጠር- ኢማራት- ባሕሬን- ኩወት- ዒራቅ- ኢራን- ፓክስታን- ኣፍጋንስታን- ፈለስጢን- ጆርዳን- ሊብናን- ሱርያ- ኣዘርበጃን ምጥቃስ ይከኣል።

ብጠቅላላ ፍትሓዊ ክበሃል ዝጸልእ፤ ጨቋኒ ክበሃል ዝፈቱ የለን። ዋላ Pol Pot  (ከም ኣብነት) ግና ንፍትሓውነት ብፍላይ ኣብ ምምራሕ (ስልጣንካ ይዕበ ይንኣስ ብዘየገድስ) መለለይኡን  ምልክታቱን መዔቀንታቱን ኣለዎ ። ከም ድልየትካ ዝጠማዘዝ ነገር ኣይኮነን። ንኣብነት፡-

ክሳብ ክንደይ መብቲ ናይ ካለኦት ትሕሉን የገድሰካን፤ ክሳብ ክንደይ ንሓለፋ ትጻረር፤ ክሳብ ክንደይ ብሕጊ ትቅየድ?(ሃይባ ፍርዲ ቤት የገድሰካ`ዶ ?)፤ ክሳብ ክንደይ ትሕትና ኣለካ፤ ክሳብ ክንደይ ነቀፌታ (ተቃውሞ) ትጻወርን ትቅበልን፤ ጸሬ ብልሽውና ዲኻ ？ /  ጸሬ ቅጥፈት ዲኻ ?፤ ሃለዋት ዜጋታትካ ትከታተልን ተማሓይሽን`ዶ? ………….

ነዘን ኣብ ላዕሊ ዝተጠቅሳ ምልክታት ፍትሒ ምስ ምምሕዳር ዑመር እናኣሳሰርና  ክንርእየን ክንፍትን ኢና ። ሎሚ ነልዕሎ ዛዕባ ንብልሽውና ዝምልከት ክኸውን`ዩ ፡-

• ቅጥፈት (corruption / فساد ) ኣብ ሕብረተ-ሰብ ዘስዕቦ ሃሰያ ጸብጺብካ ዝውዳእ ኣይኮነን። ቅጥፈት ዝካየደላ ሃገር ክትስልጥን፤ ፍትሒ ክነግሳ፤ ማሕበራዊ ጸጥታ ይኹን ምጣኔ-ሃብታዊ ርግኣት ክረጋገጸላ ማለት ዘበት`ዩ።

ካብቲ ብዙሕ ጸሬ ብልሽውና ስጉምቲ ሰይድና ዑመር ሓንቲ ኣገዳሲት ተርእዮ ንተዓዘብ ። ንምስርን ንምድሪ ሻምን ዘማሓድሩ  ሰባት ሓርዩ (ማዓውያ፡ዓምር፡ኻልድ)፤  መዝነቶም ንኸፍልጦም ኣብ ዝኣከቦም ግዜ ነዚ ዝስዕብ በሎም፡-

“ቅድሚ ሓላፍነትኩም ምጅማር ዘለኩም ሃብቲ ከነመዝግብ ኢና ፤ ሓላፍነትኩም ኣብ ዘብቃዓሉ ግዜ ኸኣ ብዘይካ`ተን ዝነበራኹም ንብረት ካልእ ንቤተል-ማል (ንብረት ህዝቢ) ክምለስ ምዃኑ ትፈልጡ”

ኻልድ ከኣ ብገንዘብና ነጊድና ክንከስብ ኣይፍቀድን ማለት ድዩ ?!” ኢሉ ሓተተ

ዑመር ፡- ” እወ ኣይፍቀን`ዩ“  ኢሉ  መለሰ;; ኻልድ ከኣ በዚ ቅድመ ኩነት`ዚ ነቲ ሓላፍነት ከምዘቅበሎ  ኣብረሄ።

ዓምርን ማዓውያን ግና  ንቅደመ ኩነት ዑመር ተቀቢሎም  ሓደ ናይ ምስሪ፤ እቲ ሓደ ኸኣ ናይ ምድሪ ሻም /ፈለስጢን፣ጆርዳን፡ ሶርያ፡ሊብናን/ ኣማሓደርቲ ኮይኖም ተመዙ ።

ካብ`ዚ ንማሃሮ እንታይ`ዩ ？

• ዝኾነ ንዓቢ ሓላፍነት ዝምረጽ ሰብ ቅድሚ ምምራጹ ዘሎዎ ሃብቲ ክምዝገብ ኣገዳሲ ምዃኑ፤ ድሕሪ ስልጣን ዘርእዮ ዕብየት ምስቲ ዝወስዶ ደሞዝ ዘይሰማማዕ ኮይኑ ኸኣ ብሕጊ ክምንዛዕ ከም ዘለዎ።
• ዝኾነ ንስልጣን ዘማዕዱ ሰብ ስርቂ ከምዘየለን ከም ዘሕትትን ተረዲኡ ክስጉም ይገብሮ ።
• ስልጣንን ንግድን ብሓደ ክኸዱ ዘይግባእ ምዃኑ።
• ኣብ ዕምሪ ስልጣንካ ኣገልጋሊ እምበር ተገልጋሊ ከም ዘይኮንካን፤ ናይ ሃብቲ ብልጫ ኸኣ ክህሉ ከምዘይግባእን።

እዝስ ንስለ ምንጋስ ፍትሒ፤  ሓደሽቲ ወለዶ ክማሃርዎ `ዶ ኣይምተገበኤን？！ዑመር  ንሓደ 10 ዓመትን መንፈቅን`ዩ መሪሑ፤ ብጸሬ ፍትሒ ተቀቲሉ ክመውት እንኮሎ፤  ኣብ ቤተ-መንግስቱ  ካብ ሃጽየታት ፐርሽያን ሮምን ዝተማረኸ ዘይተኣደነ ሃብቲ ተደርዲሩ ነበረ፤ ክዳኑ ለጊቡ ዝተጓዕዘ፤ ዓቢ ክፋል ዓለምና ዘማሓደረ ዑመር ግና ንወዱ ዕዳ ኣስክምዎ / ኣውሪስዎ `ዩ ካብዛ ዓለም ተፈልዩ። ራ.ዓ። እቲ ዕዳ ድሕሪ ሞቱ 7 ማዓልቲ ብቤተ ሰቡ ዘዋጽእዎ ገንዘብ ተኸፍለ።

ኣብ 2ይ  ክፋል  የራኽበና

ምስ ሰናይ ትምኒት

AAHafiz (226)05 Jan 2018

ክቡር ኣንባቢ ኣብዛ ናይ ሎሚ ሓተታ  ሓለፋ/ Privilege امتيار   ብዝምልከት እና ኣብነት ክንጠቅስ፤ እቲ መእተዊ  ልክዕ እቲ ዝሓለፈ ስለ ዝኾነ ነቲ ቀዳማይ ዘንበበ ብቀጥታ ነቲ ናይ ሎሚ ወይ 2ይ ኣርኣያ ዝበልናዮ ወሪዱ ከንብብ ይኽእዩ።

ብ ኣወልኼር ዓ/ሓፊዝ
Subscribe ASSENNA YouTube to get Radio Assenna shows on time: