ኣምባሳደር ስርዓት ኢሰያስ ተስፋሚካኤል ገራህቱ፣ ኣብ ከተማ ሊድስ ንዘካየዶ ኣኼባ ጸጥታ ንምዉሓስ ንዝተዋፈሩ ኣስታት 100 ሓይሊ ፖሊስ ዝተኸፍለ ገንዘብ ክዓዲ ካብ ምምሕዳር ፖሊስ ሊድስ £7000 ክፍሊት (BILL) ከምዝቐረበሉ ምንጭታት ካብ ከተማ ሊድስ ሓቢሮም።

ኣብቲ ዝሓለፈ ሰምበት 03 መጋቢት 2013 ንቁንጣሮ ደገፍቱ ዘካየዶ ኣኼባ ተዓጻጻፊ ቁጽሪ ደለይቲ ለዉጢ ኣብቲ ኣኼባ ስለዝተረኽቡ ኣኽበርቲ ጸጥታ (ፖሊስ) ልዕሊ ንቡር ዓቕሚ ሰብ ከሰልፉ ከምዝተገደዱ ይፍለጥ። እቲ ብዝኸዶ ከቢድ ተቓዉሞ ዘጋጥሞ ዘሎ ኣገልጋሊ ዉልቀ መላኺ ኢሳይያስ፣ ነቲ ብዉሽጣዉን ግዳማዉን ተቓዉሞ ህዝቢ ኣብ ሰሎሎ ዘሎ ስርዓት ኢሰያስ ገለ ሞራላዉን ፋይናንስያዉን ሓገዝ ተረኸበ ዘካየዶ ፈተነ፣ በንጻሩ ክትቁነን ኢላ ዝኸደት ተነጽያ ተመልሰት ኮይንዎ ሎ።

ምስዚ ኣብ ዝተኣሳሰር ዜና፣ ፖሊስ ምስ ወከልቲ Home Office ሆም ኦፊስ ኣብ ከባቢ በርማቶቭስ ብፍላይ ነቶም ብምትሕብባር ኤርትራዉያን ከተማ ሊድስ ብምባል ፍጮ ማሕበረ ኮም ንምቋም ትንቃሳቀስ ዘላ ቢሻ ዝብል መለለዪ ካርድ ዘለዋ ጉጅለ ንጥፈታታን ኣባላታን ንምጽራይ መጽናዕታቶም ከምዝጀመሩ እቶም ብኣካል ዝተሓቱ ዜጋታት ሓቢሮም።

ብመሰረት እቶም መሰኻክር እቶም ፖሊስ እዞም ሰባት ካብ ኤርትራ ፖለቲካዊ ዑቍባ ሓቲቶም ከብቅዑ ስለምንታይ ምስ ኣምበሳደር እቲ ስርዓት ይታሓባበሩ ዝብሉ ሕቶታት ከምዝሓቱ ተረጋጊጹ ኣሎ። በቲ ብዕለት 03 ስምበት መጋቢት 2013 ዝተኻየደ ብርቱዕ ተቃዉሞ ዝተዳህሉ ደገፍቲ ህግደፍ እዚ ሓድሽ ተበግሶ ምጽራይ ኣርዒድዎም ሸለብ ገለብ ክብሉ ይራኣዩ ከምዘለዉ ተዓዘብቲ የሊጾም።

ብዘይካ እዚ ኣብ ከተማ ሊድስ ዝርከቡ ደለይቲ ለዉጢ ነዞም ምስቲ ሓይኹ ጡፍ ዝበሎም ዉልቀ ምልካዊ ስርዓት ብምትሕብባር ስቃይ ህዝቢ ኤርትራ ኣብ ምንዋሕ ዝጻወትዎ ዘለዉ ኣዕናዊ ንጥፈት ብሕጊ ኣምሳያ ገበናዊ ንጥፈታቶም ንምፍዳይ ምስ ቤትጽሕፈት ሆም ኦፊስን (Home Office) ኣባላት ፓርላማ ዓዲ እንግሊዝን ኣማኸርቲ ሕግን ብምትሕባብ ኣበርቲዖም ይሰርሑ ከምዘለዉ ገሊጾም።