ኣምባሳደር ምልካዊ ስርዓት ኢሳይያስ ኣብ ናይጀርያ ዝነበረ ገዲም ተጋዳላይ መሓመድ ዓሊ ዕማሮ፣ ከምኡ ‘ውን ሓላፊ ኤምግሬሽን ናይቲ ስርዓት ለቴናል ኮለኔል መሓሪ ብርሃነ (ወዲ ብርሃነ) ብምልካዊ ስርዓት ኢሳይያስ ከምዝተኣሰሩ ምንጭታት ሓቢሮም።

ማእሰርቲ ክልቲኦም ሓለፍቲ ከምቲ ኣብ ምልካዊ ስርዓት ኢሳይያስ ዝተለምደ ዛጊት ምኽንያቱ ብወግዒ ኣይተፈልጠን።

ኣምባሳደር ዕማሮ ኣብዚ ራብዕቲ ክእሰር ከሎ፣ ሓላፊ ኢምግሬሽን ኮይኑ ንልዕሊ ክልተ ዓመት ዘገልገለ ለተናል ኮለኔል መሓሪ ብርሃነ ካብ ዝእሰር 2 ሰሙን ኣቢሉ ገይሩ ከምዘሎ እቶም ምንጭታት ኣገንዚቦም።

ኣምባሳደር ዕማሮ ኣብ ፈለማ 60ታት ናብ ገድሊ ዝተጸንበረ፣ ኣብ ዘበነ ክፍልታት ክብ ዝበለ ጽፍሒ ሓላፍነት ዝነበሮ ገዲም ተጋዳላይ ክኸውን ከሎ፣ ድሕሪ ናጽነት ብውልቀመላኺ ኢሳይያስ ካብ ኣምባሳደርነት ዘይሓለፍ መዝነት ተዋሂቡዎ ካብ ኤርትራ ወጻኢ ተመዲቡ ተርኡ ክሃስስ ከምዝጸንሐ ይፍለጥ።

ብዘይካ ወዲ ብርሃነ ዝተኣሰሩ ካልኣት ኣባላት ክፍሊ ኢምግረሽን ከምዘለዉ ‘ውን እቲ ካብ ኣስመራ ዝበጽሓና ሓበሬታ ብተወሳኺ የመልክት።

ብመሰረት ‘ቲ ሓበሬታ እቲ ክፍሊ ሚኒስትሪ ውሽጣዊ ጉዳያት ዝነበረ ክፍሊ ኢሚግሬሽን ብቐጥታ ኣብ ትሕቲ ቤትጽሕፈት ፕረዚደንት ይመሓደር ኣሎ።