ኢሳያስ ኣፈወርቂ ኣብቲ ብናጻ ምንቅስቓስ ወተሃደራት ኢትዮጵያ ኣብ 1990 ኣንጻር ደርግ እተኻየደ ፈተነ ዕልዋ ዝምስረት መሰጋገሪ መንግስቲ ክሳተፍ ብክታሙ ኣረጋጊጹ ምንባሩ ተገሊጹ:: ነዚ ዝገለጸ ብወጻኢ ነቲ ምንቅስቓስ ዝመርሕ ዝነበረ ሻለቃ ዳዊት ወልደጊዮርጊስ ምስ ረድዮ ኢሳት ብ8 ግንቦት ኣብ ዘካየዶ ቃለመጠይቕ ኢዩ:: ሻለቃ ዳዊት ምስ ኢሳያስ ኣብ ዋሺንግተን:ኒውዮርክ: ለንደንን ናቕፋን ብምርኻብ ኣብ ዘካየዶ ዘተ: ብወገን ኢሳያስ ብዛዕባ ናጽነት ኤርትራ ከም ዘይተላዕለ ጠቒሱ: ሰራዊት ኢትዮጵያ ብውሽጢ ለውጢ እንተኣምጺኡ ኢሳያስ ብዛዕባ መጻኢ ኤርትራ ኣብቲ ዝቐውም ሓባራዊ መሰጋገሪ መንግስቲ ከምዝዝተየሉ ከም እተሰማምዐ ሓቢሩ::በዚ መሰረት ድማ ህዝባዊ ግንባር ንምዕባለ እቲ ፈተነ ዕልዋ በይናዊ ተኹሲ ደው ናይ ምባል ኣዋጅ ብምውጻእ ከም ዝደገፎ ሻለቃ ዳዊት ኣብሪሁ:: ብዘይካዚ ሻለቃ ዳዊት ምስ ኢሳያስ ኣብ ዝገበሮ ርክብ ኤርትራ: ብፈደረሽን ይኹን ብኮንፈደረሽን ጉዳያ እንተተፈቲሑ: ንጽባሒቱ ምስ ኢትዮጵያ እትጽንበረሉ ኣገባብ ከም ዝዝተየሉ ከምዝገለጸሉ ኣፍሊጡ::

እቲ ፈተነ ዕልዋ ብምፍሻሉን ወተሃደራዊ መጥቃዕቲ ህዝባዊ ወያነን ህዝባዊ ግንባርን ንቕድሚት ብምድፍኡን እቲ መደብ ከምዘይተዓወተ ሻለቃ ዳዊት ጠቒሱ: መራሒ ህዝባዊ ወያነ መለስ ዜናዊ ኣብቲ ብመኮነናት ኢትዮጵያ ዝቐውም መሰጋገሪ መንግስቲ ከም ዘይሳተፍ ኣቐዲሙ ከም ዘፍለጠ ገሊጹ::

ኢሳያስ ብውልቁ ንስልጣኑ ክብል ብዝወስዶ ውሳነ መጻኢ ዕድል ህዝቢ ኤርትራ ኣብ ሓደጋ ክኣቱ ከምዝኽእል:እዚ ምስ ሃገራት ዓረብ ዝገብሮ ዘሎ ምስጢራዊ ስምምዕ ምስ እቲ ምስ መኮነናት ኢትዮጵያ ዝገበሮ ዝፈሸለ ምስጢራዊ ስምምዕ ብምንጽጻር ምርኣዩ ኣገዳሲ ከም ዝኾነ ተንተንቲ ፖለቲካ እዚ ከባቢ የጠንቅቑ::

¨Isaias sees problems in independence and does not want to rush and create difficulties for himself¨ late Prime Minister Meles Zenawi.