ኢሳያስ አፈወርቂ መሬት ኤርትራ ንኢራን የካሪ ኣሎ

መሬታት ኤርትራ ንኢራንን እስራኤልን ተኻሪዩ ከምዘሎ ንፈልጥ ዶ? ንምንታይ ንኽራይ ከም ዝዋዓለ ንርዳእ ዶ? ናይዚ ሳዕቤን ከ እንታይ ኢዩ?

ብወርሒ ዲሰምበር ዕለታት 16፣ 22ን 29ን 2013 “ኣል-ወጠን” ዝተባህለ ጋዜጣ መንግስቲ ኤርትራ መሬታቱ ንኢራን የካሪ ከምዘሎ ተኻታተልቲ ጹሑፋት ምስ ጭብጥታት የቕርብ እሞ ኣብ ሚንስትሪ ወጻኢ ጉዳያት ኤርትራ  ሓላፊ ጉዳያት ማእከላይ ምብርቕ ኢብራሂም ዑስማን ማሕሙድ ድማ ጭብጢ ዘይብሉን ካብ ንቡር ዲፕሎሚስያዊነት ዝረሓቐ ዓይነት መግለጺ ይህብ።

ሓደ ስሙ ክጠቅስ ዘይደለየ ኣባል ጽሕፈት ቤት ጠቕላሊ ሚንስተሪ የመን ከምኡ ድማ ኣብ ዩኒቨርስቲ ኩዌት ፕሮፈሰር ፓለቲካ ሳይንስ ዶ/ር ዓይድ መናዕ ኤርትራ ኣብ ጥቓ ባጽዕ ዝረከቡ መርሳታት ንኢራን ከምዘካረየት ጭብጢ ኣሎና ይብሉ። የመን ኣብ መሬታ ኣብ መንጎ መንግስቲ የመንን ኣል-ሓውሲ ዝተባሃሉ ወገናት ዘሎ ግጭት ኢራን ብመሬት ኤርትራ ኣቢላ  ተጓሁሮ ኣላ ትብል። ዶ/ር መናዕ ጭብጥታቱ ብኸምዚ መልክዕ የቕርብ።

ኣል-ወጠን ኢራን ብ ኤርትራ ኣቢላ ንኣልሓውስይን ከተዕጥቕ ድልየት ከምዘለዋ ዝገልጽ ሓቤረታ ምስ ጭብጢ ኣቕሪቡ። ኣብ 20 ኖቨምበር 2012 ኣብ ዓሰብ “ ሆቴል የመናውያን” ኢራናውያንን ምስ ኣልሓውስይን ርክብ ዘለዎም የመናውያን ኣኼባ ከም ዝገበሩ እውን ኣልወጠን ገሊጹ እዚ ኣኼባ ብድብድቡ ንተጻባእቲ መንግስቲ የመን ዝኾኑ ኣልሓውስይን መሳርሒ ውግእ ዝሰጋገረሉን ኣባላት ዚ ተጻባኢ ወገን ኣብ ኤርትራ ሰልጢኖም ንየመን ዝሾልኹሉን   ዓቕም ከምዝጠመተ ሓቢሩ።
ዛጅል ወኪል ዜና ኤርትራ ብ27/12/2013 መንግስቲ ኤርትራ ወደብ ባጽዕ ካብ ሰራሕተኛታት እቲ ወደብን ዜጋታት ከምዝዓጸዎ ገሊጹ እዚ ድማ ካብ ኢራን ዝመጸት መርከብ ተቐቢሉ ንኸራግፋ ምዃኑ ሓቢሩ። እዛ መርከብ ዝጸዓነቶ ሓገዝ ንመንግስቲ ኤርትራ ድዩ ወይስ ንኣልሓውስይን ኢሉ? ኢሉ ድማ ሓቲቱ።

ህግ(ደፍ) መሬት ኤርትራ ኣካሪዩ ዝረኽቦ ባጤራ ስልጣኑ ንምንዋሕ ኢዩ። ከም ኣመሉ ንጎረቤት ሃገር  ከምኒ የመን ብምስትንዓቕ ብሓዊ ይጻወት ኣሎ። ካብ ኩሉ ንላዕሊ ድማ እዚ ሽፍትነት ዝመለኦ ተግባሩ ካብ ሕዝቢ  ይሰውሮ ደኣ እምበር ነገራት ሓርቢቶም ምስ ዝሓንቅዎ  እግረይ ኣውጽእኒ ኢሉ ምስኪን እቲ ዕዳ ሕዝቢ ዕዳ ይኽፈሎ ክብል ኢዩ። ካብ ባድመ ንምሃር ምስ ህግ(ደፍ) እትሻረኽ ዘላ ኢራን ኢዳ ካብ ሃገርና ክትእክብ ንስራሕ ኢለ ይላቦ።

Reference: http://adoulis.com/entry.php?id=3853

ኢድሪሶም