ኣብ ቀዳምይ ክፋል፡ እዚ ሕጂ ኣብ መንጎ ኢሳያስን ዶ/ር ኣብዪን ዘሎ ምስጢራዊ ፍቕሪ ናብ ጽልኢ ከይቕየር’ሞ፡ ከምቲ ቅድሚ ሕጂ ኣብ መንጎ ኢሳያስን ነብሰሀር መለስን ዝነበር ኩነታት ከይደግሰና ንፈርሕ ኢልና ነርና። እቲ ሕጂ ክንፈርሖ ዘለና “ደግሲ” ግን፡ ኢሳያስን ዶ/ር ኣብዪን ከይጻልኡ’ሞ፡ ንኤርትራን ንኢትዮጵያን ካኣ ናብ ዳግማይ ናይ ዶብ ውግእ ከየእትውወን ዘይኮነስ፡ እቲ ፍቕሪ ናብ ‘መርዓ’ ተለዊጡ፡ ኤርትራ ካኣ ናይ ኢሳያስ ገዝሚ ኮይና ናብ ኢትዮጵያ ከይትኸይድ/ከይትድመር እሞ፡ ህዝቢ ኤርትራ ካኣ ናብ ካላኣይ ናይ ሓርነታዊ ቃልሲ ክኣቱ ከይግደድ ኢዩ። መቸስ፡ ኢሳያስ ንኤርትራ ከም ናይ ውልቑ ንብረት ስለዝቖጽራ በቲ ሓደ ወገን፡ እንታይ ትገብር ኣለኻ ኢሉ ዝሓቶ ‘ዕሕሕ’ ዝብል ሓይሊ መንእሰይ ይኹን ሓይሊ ህዝቢ ከምዘየለ ስለዝገበረን ስለዝፈልጥን ካኣ በቲ ካልእ ወገን፡ ብዘይ ገለ ናይ ህዝቢ ውከሳ ይኹን ኣፍልጦ፡ ንበይኑ (ዋላ ነቶም ብቐረባ ምስኡ ይሰርሑ ኢዮም ዝባሃሉ ከይሓወሰ) ምስ መራሕቲ ኢትዮጵያ ዘይንጹሩን ሚስጥራውን ውዕላትን ስምምዓትን ብሽም ኤርትራ ክገብር ጸኒሑን ኣሎን። ብዛዕባ እዞም ተገይሮም ኣለዉ እንዳተባህለ ካብ ወገን ኢትዮጵያ ዝናፈሱ ናይ ውዕላት ስምምዓት፡ ኢሳያስ ንህዝቢ ኤሪትራ ዝሓበሮ ‘ዝኾነ ይኹን’ ንጣር ወግዓዊ መግለጺ ጥራሽ የለን ጥራሕ ዘይኮነስ፡ ብኣንጻሩ፡ ኣብ ኢትዮጵያ ነናሻብ እንዳተመላለሰ ንኽብርን ንሉዕላውነትን ኤርትራ ኣዝዮም ዝድውኑ፡ ኣሕፈርትን ኣጸየፍትን ተግባራትን መደረታትን ክገብርን ከስምዕን ጸኒሑን ኣሎን። እስከ ካብቶም ኢሳያስ ዝበሎምን ዝገብሮም፡ ንገለ ካብኣቶም ንርአ፦