አቲ ኩነት ቀዳም 29 ጥሪ 2012 ዓ.ም አብ ከተማ ኦክላንድ ካሊፎርንያ እዩ ተኸሲቱ። ብድርኡ ዝሰማዕካዮም ሰባት ጽባሕ ማርያም እዩ ቤትክርስትያን ክንከይድ ኢናሞ፡ ትመጽእ ዲኻ ኢሎም ዕድመ የቕርቡልካ። እወ ወይ አይፋለይ ኢልካ ከይመለስካሎም አበየናይ ቤተ ክርስትያን ኢኻ ትኸይድ ኢሎም ሕቶ ዘስዕቡልካ’ውን ኔሮም። እዋእ እታ ማርያም አስተርእዮ ምጽዋዕ ነቶም ካብ ኩሉ ኩርናዓት ኤርትራ ዝመጹ አእላፍ አጋይሻ ብዘይ ጸገም ሓቑፋ አእንጊዳ ነናብ ቦትኦም ትሰዶም ከምዘይነበረት ማርያም ኦክላንድ ደአ እንታይ እዩ ጸገማ ንአጋይሻ አብ ክልተ ቦታ ትእንግዶም ኢሉ ዝሓትት ኤርትራዊ ዘሎ አይመስለንን። እቲ መልሱ “ዘራጊ እንከሎ ጹሩይ ማይ ነይስተይ” እዩ።

ማርያም ሓንቲ ማርያም እያ ናይ ሎሚ ናይ ትማሊ ናይ ጥንቲ። እዛ ቅድሚ ገዛእቲ ዝነበረት ማርያም ብዘመን መግዛእቲ ጥልያን፣ እንግሊዝ፣ ሃይለስላሴ ኮነ በቲ ሃይማኖት ዘይነበሮ ማሕበርነታዊ ስርዓት ደርግ ሓንቲ ከም ባሕቲ እያ ኔራ። ሕጂ ግና እቲ ሓዳር አፋቲሑ አሕዋት ደቀባት አናቑቱ ክነብር ዘይሓንኽ ፉንፉን ስርዓት ህግደፍ እሳ ተሪፋቶ ኔራ ነታ ሓንትን ቅንዕትን አደ ድኻ ቤተክርስትያንና ኢዱ አንቢሩላ። ስለዝኾነ ድማ አብ መላእ ዓለም ዘሎ አማኒ ኦርቶዶክስ ህዝብና አብ ክልተ ተኸፊሉ ንረኽቦ። ምስክናይ ህዝብና ንቕሓቱን ድኹም ጎኑን መዝሚዞም’ባ ይጻወቱሉ አለው። እዚ ውዲት እዚ ናብቶም ንቑሓት አቕሽሽቲ ዘለወን ሃይማኖታት ካቶሊኽን ወንገላዊትን እንተዝወስድዎ ዝሰርሕ ኮይኑ አይስመዓንን።

እቲ ዘገርም በዓል ክሻ ሓሶት፤ ፈኮስቲ ከም ክሻ ሓሰር ትማሊ ትማሊ “ሓደ ህዝቢ፡ ሓደ ልቢ” ይብሉ ከምዘይነበሩ ሕጂ ግደፎ ንህዝብና ነታ ናይ አቦታትና ናይ አቦሓጎታትና ተዋህዶ ኦርቶዶክስ ቤተ ክርስትያን አብ ክልተ ከም ሕምባሻ ውራይ ከፊሎማ። ዝግበር ነገር ስለዘየለ ድማ ኤርትራዊ አማኒ ኦርቶዶክስ ተዋህዶ ከተማ ኦክላንድ ገሊኡ ናብቲ ብስርዓት ህግደፍ ተቐባልነትን ደገፍን ዘለዎ ቤተ ክርስትያን፤ ገሊኡ ድማ ናብቲ ህግደፍ ኢድካ ካብ ሃይማኖትና አልዕል ዝብል ቤተክርስትያንን ተኸፋፊሉ ንማርያም ከብዕላ ተገዲዱ ውዒሉ።

አነ አብ ሃይማኖት ንጡፍ አይኮንኩን። የግዳስ እቶም ቀዳሞት ቤት ክርስትያን ነቶም ዳሕረዎት እዚኦም ተሃድሶ እዮም ማርያም አይአምኑን እዮም ኢሎም ከጸልምዎም ሰሚዔ እየ። ዎዮ እቶም ዳሕረዎት ማርያም አይአምኑን ዝተባህሉ ሓድሽ እንዳ ማርያም ቤት ክርስትያን ምስ ገበሩ ድማ ተጓይዮም ታቦት ናይ ማርያም አብቲ እንዳ መድህን አለም የእትዮም። በቃ ሃይማኖት ሎሚ ዘመን ጉያ ጉያ እዩ ኮይኑ። ደቀይ አብቲ ቀዳማይ ናይ ህግደፍ መዳኸርቲ ዝዕንድሩሉ ቤተ ክርስትያን እዮም ተጠሚቖም ብውሳኔ ናይታ ሙሉእ ሓላፍነት መንፈሳዊ ጉዳይ ስድራና ዘለዋ በዓልቲ ቤተይ። ንዓይ ጸገም የብሉን ኩሉ ቀዳማ’ዩ ዳሕራ’ዩ ቤተ ክርስትያነይ እዩ። ጸገመይ ምስቲ ጠንቂ ምፍልላይ ህዝቢ ኮይኑ ዘሎ ዱሑር ስርዓት ህግደፍ እዩ።

ቀደም አዴታትና አንቲ ማርያም አስመረይቲ ነዞም አባይና ጽርግ አብልልና ኢለን ክልምንአ ትሰምዔን ኔራ። አብ 1990 ዓ.ም ስርሒት ፈንቅል፤ ማርያም አስተርእዮ ውራያ ዓጽያ ቀልጢፋ እያ ነቶም ተጋደልቲ ደቃ መርሓባ ኢላ ዝተቐበለቶም። ሎሚ ግና ግዜ ተቐይሩ እዩ። እተን ሓቀኛታት አዴታተይ ሕጅ’ውን ከመይ ህግደፍ መንደፍ ማርያም ትንቀሎ ኢለን እየን ዝምህለላ። ነቶም አብ በረኻታት ኤርትራ አብ ስደት አብ ሲናይን አብ ቀላያት ባሕሪ ሓደጋ ሞት ዝልብልቦምን ዘንጸላልዎም ዘሎ ደቀን ጸልየናሎም እየን ዝድቅሳ። እንተ እተን ጽጋብ ዝሰርነቐን አዴታት ግና ኪሎ ወርቂ አብ ኢደን፣ ፍርቂ ኪሎ ወርቂ አብ አእዛነንን ክሳደን፣ ተወሳኺ ወርቂ ሚዶ አብ ርእሰን ነቲ ተረፍ ወርቂ ቁልፊ አስሪሔን “ረአዩና እንታይ ንመስል አለና”  ክብላ ሰሚዕናየን።

ከይጸገቡ ነይዘሉ ዲዩ ተባሂሉ፣ ቆሎ ትድረር ኔርካ ሕጂ እንጀራ ዓዲ ሃገር በሊዕካ ሸብዳዕዳዕ መቸም መዓልቲ አለዎ። ኩሊት አሓትናን አሕዋትናን ብደዎም ብሂወቶም ክምንዛዕ ትምህለልን ትጽልይን አደ እምበር “ንሕና ንሱ፡ ንሱ ንሕና” ኢላ ስእሊ ውልቀ መላኺ ቀታል ሰብ አንጠልጢላ ፍቖድኡ ሸናዕ እትብል አደ አዴና አይግበራ። እቲ ዘገርም ደገፍቲ ህግደፍ ነቲ አብ ቃልዕ ዝኸሰርዎ ፖለቲካ ብጉልባብ ቤተክርስትያንና ከነጣጥፍዎ ህርዲግ ይብሉ ምህላዎም ከነስተውዕለሉን እግሪ እግሮም እንዳኸድና’ውን ክንቃለሶ ይግበአና።

እንታይ ክንገብር ከይፈተና ህግደፍ ብዝፈጠሮ ጸይቂ ብሃይማኖት አቢልና ናብተን ዘይውርዙያት አንስቲ አቲና ከይተረዳአና። እሞ አጆኹም ደቂ ኤረይ ከምቲ አብ ገዛ ስመር ዝበልኩሞ አዞም ስቓይ ህዝቢ ዝምገቡ ልክዕ ከም ቁስሊ ገጻብ መጽዓኛ ዝቕለብ ጭርናዕ፤ ነውኒውና ነጽድፎም። ሃየ ስንኹም ንኸሱ። አወ ምስ’ዞም ናይ ዘመንና ጭርናዕ ተመሻኺንካ ዝመጽእ ለውጢ የሎን።

እንተ እታ አደይ ማርያም ኩሉ ግፍዕታት ህግደፍ አብ ማእከል አስመራ ኮፍ ኢላ ትዕዘቦ እያ ዘላ። ከምቲ ንደርጊ ነዞም ጠላማት’ውን መዓልቶም ትቖጽረሎም ከምዘላ ርጉጽ እዩ። አወጋዝን ተወጋዝን ዘይብላ አብ ትሕቲ ጎይታ ብሓደ ብጹእ ወቅዱስ ዝኾነ ፓትርያርክ እትምራሕ ተዋህዶ ኦርቶዶክስ ቤተ ክርስትያን አብ ቀረባ ጊዜ ከምእትህልወና ርግጸኛ እየ። ጸሎት አዴታተይ ሓያል እዩ። ንሓጻውን ራሻን ንሽሾ ሰራዊት ኢትዮጵያን ዝሰዓረ ጸሎት ህጂ’ውን ንውዲት ህግደፍን አምሰሉ አመንቲ ኢና ዝብሉን ዝብላን ጭርናዓት እውን ክስዕሮም እዩ።

አብ መወዳእታ ነተን ዝጽሕፈን ዝነበርኩ ቁሩብ ቁራቦ ዘንበቡ ሕጂ ካብ ዘይጽሕፍ አዋርሕ ከም ዝገበርኩ ዝፈለጡ ጉዱሳት ንኽጽሕፍን ንኸየቋርጾን ንዝገበሩለይ ምትብባዕ ከየመስገንኩዎ አይሓልፍን።

ስመርርር ጭርናዕ ሎም ዘመን ብቕልጽምና ንኽድከር!

ሰሎሙን ገብረእየሱስ- ኤርትራውያን መንእሰያት ንለውጢ

ኦክላንድ ካሊፎርኒያ