‘ታይ ግዱ ህግደፍ መንደፍ፣ እንተኾነሉ ሰብ ይነድፍ፣ እንተሰኣነ ገንዘብ የግድፍ

ምልካዊ ስርዓት ኢሳይያስ፣ ነቲ ንኤርትራ ሃገረ ዕስክርና ብምግባር፣ ንመላእ ህዝቢ ኤርትራ ሰጥ ልበጥ ኣቢሉ ብወተሃደራዊ ሕጊ ንምቍጽጻሩ ኣብ ጽባሕ ናጽነት ዝሓንጸጾ ሜላ፣ ንኹሉ መንእሰይ ኤርትራ ብስም ሃገራዊ ኣገልግሎት ኣስገዲዱ ዓስከር ብምግባር ብዓንተብኡ እዩ ጀሚሩዎ። ንመንእሰይ “ኣልዚበዮ እየ” ኣብ ዝበለሉ እዋን ከኣ፣ ነቶም ምንኣስ መንእሰይ ዝኾኑ ኮቴቴ ‘ውን ብስም “ምፍጻም ካልኣይ ደረጃ ትምህርቲ” ናብ ሳዋ ኣውሪዱ ሕጹያት ዕስክርና ብምግባር ናብቲ ቀጽሪ ዕስክርና ኣስዒቡዎም።

እቲ ደረት ዘይብሉ ዘመተ ዕስክርና ኤርትራውያን መንእሰያት፣ ሓደ ካብ ቀንዲ ምንጪ ጃምላዊ ዋሕዚ ስደት ኮይኑ ፍሽለቱ ንመላእ ህዝቢ ኤርትራ ርኡይ ኮይኑ እኳ እንተሃለወ፣ ኢሳይያስ ነቲ መዕነዊ ፖሊሲ ብኣዝዩ ዘደንጹ ኣንደበት ኣስፊሑ ብምትሕሓዝ፣ ኣብዘን ዝሓለፋ ሒደት ዓመታት፣ ክሳብ 70 ዓመት ዝዕድሚኦም ሲቪል ሽማግለታት ከይተረፈ ብሓይሊ ብረት ኣዕጢቑ ነቲ ንመላኽነቱ ዝምእምእ ናይ ዕስክርና ውጥን ቀጺሉዎ። ብኢዱ ኣይግዳዱ፣ መን ዋና ኣለዎ!

ምልካዊ ስርዓት ኢሳይያስ፣ ስልጣኑ መታን ከይድፈር ንመእሰያት ኤርትራ ሓንሳብ ብወያነ ሓንሳብ ብ “ኣይሰላም ኣይኵናት” እናመሳመሰ ኣብ መሳርዕ ሰራዊት ኩሩንኵሪት ብምእሳር ምቍጽጻሩ፣ ብዓይኒ ህዝብን ሃገርን ክርአ ኸሎ ኣዕናዊ ኳ እንተኾነ፣ ከም ውልቀመላኺ ክርአ ኸሎ ዘዋጽኦ ስለዝገበረ ኣየገርምን እዩ። ሽማግለታት ብግዴታ ኣዕጢቑ፣ “ህዝባዊ ሰራዊት” ዝብል ስም ዓሳክር ገይሩ ኣብ ትሕቲ ምሉእ ምቍጽጻሩ ከእትዎም ምህቃኑ ግን፣ ነዛ ጭርኡ ኳ ምእማን ስኢኑ፣ ርእሰምትእምማን ኣጥፊኡ ምህላዉ ዘርኢ እዩ።

ድሕሪ ምዕጣቖም ግን፣ ከምቲ ዝሓሰቦ ኣብቲ ዘዋደደሎም መጻወድያ ኣእትዩ ከምድላዩ ክቆጻጸሮም ኣይከኣለን። ዕቡድ ስርዓት ደኣ ኮይኑ እምበር፣ ብቐደሙስ፣ መንእሰያት ደቆም ብኢሳይያስ ተዘሪዖም ናብራ ገዛ ኣብ እንግድዓኦም ዝወደቖም ሓረስቶት፣ ዕድመ ንእስነቶም ኣብ ገድሊ ኣብልዮም ኣብ ድርኵዅት ሽምግልና ንዝርከቡ ከዕርፉ ዝግብኦም ተጋደልቲ ነበር፣ ናብ ቤተክርስትያንን መስጊድን ክመላለሱ ዝነበሮም ሽማግለታት ኣቦታት፣ ሞያኦም ምስ ዕስክርና ዘይራኸብ ሰብ ሞያን ነጋዶን መልሓጥሓጥ ኢሎም ምእርናብ ክኣብዩዎ ባህርያዊ እዩ። ህልኹ ግን ኣይደቀሰን። ሰጥ ከብሎም ምእንቲ ከምቲ ኣብ ዝሓለፈ ኣዋርሕ ብዜናታት ዝስማዕኩሞ ናብ ታዕሊም ክወርዱ ክተሃላለኾም ቀዊዑ። እቶም ኣብ ታዕሊም ዝተረኽቡ ውሑዳት ስለዝኾኑ ተሃን ቍጽጽሩ ስለዘየውጽአ ኸኣ፣ እንሆ ሕጂ፣ በቲ በቲ ክሳብ ዝምብርከኹ ኣጥቢቑ ክሕዞም፣ ካብ ሰንሰለት ቁጽጽሩ እንተወጺኦም ድማ ገንዘብ ሸምጥጡ ከምኣመሉ ማሕፉዳኡ ክምልእ፣ ዕድሚኦም ሰሪሖም ዘጥረዩዎ ትካላቶም ክዘምት ሓድሽ መምርሒ ኣውጺኡ ኣሎ። ናይ ህዝብን ሃገር ግዲ ዘይብሉ ዓንዳሪ ስርዓት ዝብልኹም ከምዚ እዩ።

እቲ ዕብዳን ፍርሕን ተኣዋዊሱዎ ዘሎ ውልቀመላኺ ነዞም ብህዝባዊ ሰራዊት እናጸውዐ ዘባጭወሎም ዘሎ መሳኪን ኣመልኪቱ ናብ ሓለፍቲ ዘመሓላለፎ ውሽጣዊ ትእዛዝ እምብኣር ከምዘለዎ እንሀልኩም።    

 

ንደገ ክገሹ ዝፍቐደሎም ኣባላትን ዕጡቓትን፣

1. ብምኽንያት ሕማም ደገ ከይዶም ክሕከሙ ዝፍቐደሎም ቀጥታ ደብዳቤ ይጽሓፈሎም።

 

2. ወደይ ጓለይ ብምኽንያት ሕማም ደገ ከይዱ ክሕከም ስለዘፍቀድሉ ናብ ደገ ወሲደ ክሕክሞ ዝብል ሕቶ ዘቕረበ፣-

• ብዓልቲ ቤቱ ነቲ ሕሙም ናብ ደገ ወሲዳ ክትሕክሞ ከምዘይትኽእል ካብ ምምሕዳር ጭብጢ መረጋገጺ ምስዝቐርብ ጥራይ ይፍቀደሉ።

 

3. ኣቦይ ኣደይ ሓወይ ወዘተ… ናብ ደገ ከይዱ ክሕከም ስለዝፍቀደሉ ወሲደ ክሕክሞ ዝብል ሕቶ ዘቕረበ፣

• ጻንታ ማለት ንወለዱ ሓደ ንሱ ጥራሕ እንተኾይኑ መረጋገጺ እንተቕሪቡን ጥራሕ ይፍቐደሉ።
• ኣሕዋት ምስዝህልውዎ ኣይፍቀድን፣ ከም ፍሉይ ዝርኣ 4-5 ኣሕዋቱ ኣብ ሃገራዊ ኣገልግሎት ምስዝህልው እሞ ንህላዊኦም ዝምልከት መረጋገጺ ወረቐት ካብ ኣሃዱኦም ምስዘቕርብ ጉዳዩ ክርኣ ይክኣል።

 

4. ውላድ ዝኣበዮ ናብ ደገ ከይዱ ክሕከም ዝፍቀደሉ።

• ካብ ዝምርዖ ልዕሊ 5 ዓመት ከም ዝገበረ መረጋገጺ ወርቐት ዝቕረበ ብናይ 200.000 ሽሕ ናቕፋ ውሕስነት መገሻ ይፍቀደሉ። ኣብ ዝተወሰነሉ ናይ ግዜ ገደብ እንተዘይተመሊሱን ናይ ምምላስ ኣንፈት እንተ እንተዘይሃልይዎን እቲ ብውሕስነት ዘትሓዞ ገንዘብ 200.000 ሽሕ ናቕፋ  ናብ መንግስቲ ኣታዊ ምዃኑ ገያሻይ ናይ ውሕስነት ውዕል ክኽትም ኣለዎ።

 

5. ብዓልቲ ቤተይ ብጉዳይ ሕክምና ኣብ ደገ ስለዝርከብ ርእየዮ/ያ ክምለስ ዝብል ሕቶ ዘቕረበ ፣

• ብሕማቕ ኩነታት ከምዘላን/ሎን ናብ’ዚ ሃገር ባዕላ/ሉን ብኣካል መጺኣ ክትርእዮ ዘየኽእል ጭብጢ ኩነታት ከምዘለዎን መረጋገጺ እንተኣቕሪቡ ብናይ 200.000 ናቕፋ ውሕስነት መገሻ ክፍቐደሉ ይካኣል። ኣብ ዝተወሰነሉ ናይ ጊዜ ገደብ  እንተዘይተመሊሱን ናይ ምምላስ ኣንፈት እንተዘይሃልይዎን ድማ እቲ ብውሕስነት ዘትሓዞ 200.000 ናቕፋ ናብ መንግስቲ ኣታዊ ክኸውን ምዃኑ ገያሻይ ኣብቲ ናይ ውሕስነት ውዕል ክኽትም ኣለዎ።

 

6. ኣብ ዝኾነ ሃገር ዝኽፈሎ ናይ ጥሮታ ገንዘብ ስለዘለኒ ገንዘበይ ክቕበል ክኸይድ ዝብል ሕቶ ዘቕረበ፣

• ብናይ 200.000 ናቕፋ ውሕስነት ኣብ ዓመት ሓደ ጊዜ ጥራሕ ክገይሽ ይፍቐደሉ። ኣብ ዝተወሰነሉ ናይ ጊዜ ገደብ እንተዘይተመሊሱን ናይ ምምላስ ኣንፈት እንተዘይሃልይዎን ድማ እቲ ብውሕስነት ዘትሓዞ 200.000 ናቕፋ ናብ መንግስቲ ኣታዊ ክኸውን ምዃኑ ገያሻይ ኣብቲ ናይ ውሕስነት ውዕል ክኽትም ኣለዎ።

 

7. ካብ ደገ ኣገደስቲ ንብረት (ንትካል ዘድሊ ንብረት) ከእቱ ይፈቐደለይ ዝብል ሕቶ ዘቕረበ፣

• ናይ 300.000 ናቕፋ ውሕስነት ብምትሓዝ ኣብ 6 ወርሒ ሓደ ግዜ ጥራሕ ክወጽእ ይፍቐደሉ። ኣብ ዝተወሰነሉ ናይ ጊዜ ገደብ እንተዘይተመሊሱን ናይ ምምላስ ኣንፈት እንተዘይሃልይዎን ድማ እቲ ብውሕስነት ዘትሓዞ 300.000 ናቕፋን ትካሉን ናብ መንግስቲ ኣታዊ ክኸውን ምዃኑ ገያሻይ ኣብቲ ናይ ውሕስነት ውዕል ክኽትም ኣለዎ።

 

 

ዓወት ንሓፋሽ!!!

 

ቤ/ጽ ኣዛዚ ህዝባዊ ሰራዊት ኤርትራ

 

ሌ/ኮ ኣማኒኤል ኣርኣያ

 

Continue to read in pdf