ዕለት 06/19/2015 ሰላማዊ ሰልፊ ኣብ ዋሽንግቶን ዲሲ፤

ኣብ ዋሸንግቶን ዲሲ ነቲ ዓገብ ዝብለሉን ዝጣበቀሉን ሲኢኑ ዘሎ ውጹዕ ህዝቢ ኤርትራን፡ ጥፍኣት መንእሰያት ኣብ ባሕሪ ሚዲትራንያንን፡ ማሕረድቲ መንእሰያት ብዳዕሽን፡ ንዓለም ኣውያት ንምስማዕን ሓደ ዓቢ ሰለማዊ ሰልፊ ኣብ ዋሽንግቶን ዲሲ ንዕለት 06/19/15 ተዳሊዩ ኣሎ። እዚ ዓቢ ሰለማዊ ሰልፊ እዚ ንብምልኡ ደላይ ፍትሒ ዝምልከት ኮይኑ ኩሉ ድማ ኽሳተፎን ኽግስጉሰሉን ይግባእ።ምኽንያቱ እዚ ብኽያትን ኣውያትን ህዝብና ናብ ዓለም ንምቅላሕን እቲ ብኤውሮፖዊ ሕብረት ንህግደፍ ተዳሊዩ ዘሎ  ሓገዝ ገንዘብ ፥ኣድላዩ ከምዘይምካኑ ንምጽዋዕ ዝተዳለወ ዓቢ ሰለማዊ ሰልፊ  ኩሉ  ደላይ ፍትሒ ንኽሳተፎ ጻዊዒት ይቐርብ ኣሎ ኩሉ ድማ ኽድግፎ ይግባእ።

ኣብዚ ክንጸር ዘለዎ ግን እዚ ሰላማዊ ሰልፊ እዚ ኣገዳሲ ድዩ፣እቲ መልሲ ፍሉጥ እዩ: እወ ኣገዳሲ’ዩ ፥ ኣገዳሲ እንተኾይኑ’ከ መን እዩ ከዕውቶ ዘለዎ ፣ኩሉ ደላይ ፍትሒ እዪ እቲ መልሲ፥ እዚ እንተዳኣ ኣሚንና መን እዩ ኣበጊስዎ ዝብል ሕቶ እውን ክመጽእ ኣይግብኦን ፥ዘበገሰ የበግሶ ክሳብ ኣንጻር እቲ ስርዓት ዝኾነ ኩሉ ኽዓኮን፡ ከተባብዖን ፡ኽሳተፎን ይግባእ።ኣብ ደለይቲ ፍትሒ ፍልልይ ክህሉ ንቡር እዩ።ኣበይ ንፈላለ ግን ከነስተውዕል ይግበኣና ኣብ ገለ ኣርእስትታትን ኣገባብ ኣቀላልሳን ፍልልያት ክህልውና ንቡርን ትጽበዮ ነገር  እዩ።ኣብ ኩሉ ግን ክንፈላለ ኣይንኽእልን ኢና፥ ኣብቲ ናይ ሓባር ሮቛሒ ኩሉና ከምንሰማማዕ ዘማትእ ኣይኾነን ።ስለዝኮነ ድማ ነዚ ኣብ ፈታኒ ህሞት ዝኻየድ ዘሎ ሰላማዊ ሰልፊ ከም ናትና ወሲድና ከነዕውቶ ናይ ኩልና ደለይቲ ፍትሒ ሓላፍነት እዩ።እዚ ህሞት እዚ መንእሰያት ኣብ ዝጸንትሉ ዘለው: ህግደፍ ንዓለም እገዳ ንኽላዓለሉ ብኣምባሳደራቱ ላዕልን ታሕትን ኣብ ዝብለሉ ዘሎ እዋን :ኤውሮፖዊ ሕብረት ንህግደፍ መቃነዪ ገንዘብ ክህበሉ ኣብ ዝደናደነሉ ዘሎ እዋን ይካየድ ብምህላው እዚ ንኽዕወት ብዝተወደበ መልኽዑ ኩልና ኽንቓንዮ ይግበኣና።

ብፍላይ ናብ ዲሲ ዝቀረባ  ከተማታት ዝቅመጥ ደላይ ፍትሒ ዝገደፈ ገዲፍ ብሕልና ንሓንቲ መዓልቲ ክውፈ ደም ናይቶም ዝጠፍኡ መንእሰያትን፥ ሕድሮም ዘይተተግበረ ሰማእታትን፥ ይጽውዕ ኣሎ።ከምቲ “ተመሊስካ እንእትረድኦ ገዲፍካዬ ኣይትእቶ” ዝበሃል ሎሚ ደለይቲ ፍትሒ ነንባዕልና ንነቃቀፈሉ ደኣንበር ንወናጀለሉን ቂም ንሕዘሉን እዋን ኣይኮነን። ኩላትና ናብ ሓደ ምምጻእና ዘይተርፍ ኽነሱ  ግዜ ምጥፋእን ምግድዳዕን ወጊድ ብምባል ኣብ ኩሉ መዳይ ተጸዋዊርና ሽግርና ንፍታሕ፥ ብሰንኪ ፍልልይና ዕድመ ጸላኢና ብምንዋሕ ህይወት የሕዋትና ነጥፍእ ኣለናሞ ሃየ ዋላ ነገራት ዕረ እንዳጠዓሙና ንትዕቢት ንምስባር መስዋእቲ ከፊልና ናብ ሓደ መጺእና ሓይልና ነትርር።

ኣብ መወዳእታ ከምቲ” ንሽሕ ፈልጺ መእሰሪተን ሓንቲ ልሕጺ ዝበሃል” ኩልና ደለይቲ ፍትሒ እዩ ስምና፥ ንኩልና ትኣስረና ድማ ንሳ እያ።ኩልና ደለይቲ ፈትሕን ፍትሓዊ ስርዓት ክንተኽል ንቃለስ ካብ ሃለና፣ኣብ ሕጂ ክንምልሶም ዘይንኽእል ሕቶታት ግዜና ከየጥፋእና አእጃምና ነልዕል ገለና ብጉልበትና:ገለና ብገንዘብና:ገለና ደማ ብሓንጎልና ንደጋገፍ ለውጢ ክቀላጠፍ።ነዚ ንፍዓት ኣበጊሶሞ ዘለው ሰለማዊ ሰልፊ ድማ ኢደይ ኢድካ ኢልና ነዕውቶ።እዚ ዕለት 06/19/2015 ዝኻየድ ኣገዳሲ ሰለማዊ ሰልፊ ንኹልና  ደለይቲ ፍትሒ ዝተጠርነፍናን ዘይተጠርነፍናን  ብማዕረ ዝብጻሓና ውድቀቱ ዘሕመና ዓወቱ ዝሕብነና ስለዝኾነ ብተገዳስነት ኽንሳተፎን ከነዕውቶን ናይ ኩልና ሓልፍነት እዩ።ብፍላይ ድማ መራሕቲ ውድባትን፡ ሲቢካዊ መሕበራትን ፡ሚድያታትን ኣብ ምዕዋት ኣዚ ሰለማዊ ሰልፊ ግዴታን ሓላፍነትን ስለዘልዎን ኣበርቲዖም ክሰርሑ ንምሕጸን።

ዓወት ንደልይቲ ፍትሒ ……ይኹኖ ባህታ ላስቬጋስ